延南洞體驗活動總整理
原來延南洞有咁多嘢玩？以前唔知唔緊要，睇完save底下次嚟一次過做哂！
Hello，大家好，我哋係由韓國人每日提供最新韓國旅行資訊嘅Creatrip。
去弘大好多時都主要係去主街，會唔會都抽少少時間去延南洞一帶行吓呢？喺呢度除咗多Cafe、餐廳、Shopping嘅地方之外，仲有好多活動等住大家嚟體驗！
延南洞體驗活動推薦
1. 喺京義線林蔭道公園散步
由弘大入口3號出口出嚟之後，就會係京義線林蔭道公園，呢度原本係一個廢棄鐵路，而家變成一個令人耳目一新嘅公園。
因為好多年青人會喺度聚集，好多藝術家同設計師嚟到呢度，附近多咗唔少鋪頭，令到呢度變得更加熱鬧。
以前未有疫情前，如果天氣好，唔少人會坐喺公園度野餐！不過而家就算唔可以野餐都唔緊要，因為延南洞有好多活動等住大家去體驗！
- 地址：서울 마포구 연남동
- 小Tips：弘大入口站3號出口出嚟就係
2. 去投幣式K房
去韓國又點可以唔去投幣式K房？平時喺香港想去唱K，但未必有齊韓文歌？咁嚟韓國唱就絕對唔使擔心呢個問題！
基本上喺韓國₩1,000就可以唱到2-4首歌（根據每一間舖頭唔同），小編今次去嘅呢間延南洞Rex Coin就係₩1,000只得2首、₩5,000有12首、₩10,000有25首，另外亦都可以唱時間制，30分鐘₩4,000、1個鐘₩7,000。
雖然比起其他地方，價錢可能貴咗少少，不過勝在呢度夠乾淨，而且每次唱完，職員都會即刻去清掃同打理，令人好放心。
- 店名：Rex Coin （렉스코인노래연습장）
- 地址：서울 마포구 동교로 226 3층
- 營業時間：每日 11:00 - 03:00
- 價格：₩1,000只得2首、₩5,000有12首、₩10,000有25首；另外時間制：30分鐘₩4,000、1個鐘₩7,000
- 小Tips：由弘大入口站3號出口行4分鐘左右
3. 影人生四格
嚟韓國唔影人生四間都唔可以話嚟過韓國！由幾年前已經開始興起，本身只係得幾間分店，慢慢而家喺各個地區都有。
不過而家人生四格太普通，已經逐漸升到六格或者九格，另外以前影嘅時候會好似貼紙相機咁要部機倒數先影得，但而家有埋手掣俾大家去控制，想影嘅時候先撳。
另外基本上而家好多間影相人生四格嘅舖頭，都會有埋免費頭飾俾大家影相嘅時候戴，同朋友一人戴返一個，不知幾開心！
- 店名：Photoism Box
- 地址：서울 마포구 동교로 230
- 營業時間：24小時
- 價格：六格（6-CUT） ₩5,000、四格（4-CUT） ₩4,000
- 小Tips：由弘大入口站3號出口行4分鐘左右
另外再講多兩間俾大家參考
呢間喺弘大入口3號出口一出嚟望右邊就會見到，相當之近！而且喺門口有個花花牆，大家已經可以喺嗰度打卡。
同樣地都有好多頭飾，或者公仔俾大家戴住或拎住打卡。
另外呢度仲有提供梳、髮夾、直髮夾等，喺正式影之前，可以喺鏡前面整理一下儀容。
- 店名：SIGNATURE（포토시그니처）
- 地址：서울 마포구 양화로 191 1층
- 營業時間：24小時
- 價格：四格（4-CUT） ₩4,000
- 小Tips：由弘大入口站3號出口行1分鐘左右
唔知呢度有冇鍾意迪士尼公仔同愛麗絲嘅朋友呢？如果有就要去呢一間影啦！
同樣地呢度都有好多頭飾，不過最特別嘅都係米奇同米妮（喺其他地方好少見到），帶嚟影情侶照啱晒！
另外呢度嘅鏡都印有唔同愛麗絲主題，喺前面自拍幾張都唔錯。
最後提提大家：如果借咗頭飾，記住用完一定要擺番原位，千祈唔好戴走啊！
- 店名：SELF STODIO（인생[ㅇ]네컷）
- 地址：서울 마포구 양화로23길 34 1층인생네컷
- 營業時間：24小時
- 價格：四格（4-CUT） ₩4,000
- 小Tips：由弘大入口站3號出口行1分鐘左右
4. 去機鋪
有時去旅行嘅目的就係為咗舒壓，除咗shopping、食好西之外，仲有冇咩好做？小編推薦去機鋪！
延南洞有間超細間嘅機鋪，雖然鋪面唔大，但都有唔同款嘅遊戲機，例如啪啪機、籃球機、夾公仔機等。
每個遊戲都係₩500～₩1,000，相信無論大人定小朋友嚟度玩一陣都會好開心！小編最後仲夾咗兩個鎖匙扣，其中一個仲要一夾就中！
- 店名：RETRO ARCADE（콤콤오락실）
- 地址：서울 마포구 성미산로 187
- 營業時間：24小時
- 價格：一鋪遊戲 ₩500～₩1,000
- 小Tips：由弘大入口站3號出口行10分鐘左右
5. 去整鎖匙扣
如果你都鍾意整手作，小編好推薦大家去延南洞整鎖匙扣，喺嗰度可以邊整邊嘆咖啡，價錢仲要一啲都唔貴。
舖頭會提供唔同圖案俾大家参考，可以跟住佢畫，或者大家可以發揮小創意去自創。有問題嘅時候，老闆都會好親切咁教大家。
想嚟韓國嚟啲不一樣嘅體驗，整鎖匙扣都係一個唔錯嘅選擇。
- 店名：Cafe Neulbo
- 地址：서울 마포구 동교로51길26 2F
- 價格： 玫瑰梳打（장미에이드） ₩6,000、 奶油抺茶鮮奶（크림말차） ₩6,500、鎖匙扣（슈링클스） ₩6,300
- 營業時間：星期三至五 14:00 - 21:00、週末13:00 - 21:00（Last Order 20:00）逢星期一、二休息
- 小Tips：由弘大入口站3號出口行14分鐘左右
5. 整霓虹燈
除咗鎖匙扣之外，韓國亦都好流行整霓虹燈版，不過如果有興趣需要事先喺Naver預約。
青年工房裡面都幾多位，坐底次後職員會提供向各種圖案（圖片右上角星星代表製作難度，建議如果係新手，請揀3粒星星以下去整），大家亦可以自己準備鍾意嘅圖案嚟製作。不過需要注意嘅係，因為圖案係由一條燈條連接而成，所以太過複雜或者連接點太少嘅圖案，完成度可能未必會似預期所諗咁。
決定好整咩圖案之後，職員就會帶大家去暗室揀要燈光顏色，如果要兩個顏色以上要加₩5,000，製作過程都好簡單，一直卷就得，小編揀嘅圖案難道係兩粒星，製作時間大約一個鐘，整完之後大家記得要幫作品影返張靚相啊！
- 店名：青年工坊（청년공방）/ NED ON（네온사인 네드온 본점）
- 地址：서울 마포구 동교로 239 3층
- 營業時間：平日14:00 - 22:00、週末及公眾假期13:00 - 22:00
- 價格：需事先喺Naver預約，網版價格為₩35,000、壓克力版價格為₩30,000、加一種顏色+₩5,000
- 小Tips：由弘大入口站3號出口行5分鐘左右
6. DIY護膚品同唇膏
有邊個女仔係唔貪靚嘅呢？相信真係少之又少，大家會唔會想整一支獨一無二嘅爽膚水或者唇膏呢？
延南洞就有一間美容中心可以俾自己DIY，用嘅原料都係最優質，大家都可以放心。
全世界獨一無二嘅唇膏或爽膚水同精華，無論係自用定係送俾朋友都好有心思，有興趣嘅朋友都可以搵我哋預約㗎！
- 店名：VIC'S LAB KOREA（빅스랩코리아）
- 地址：서울 마포구 양화로 100-13 3F
- 營業時間：13:00 - 17:00
- 價格：護膚產品製作（스킨 케어 제품 제작）₩77,000、K-Beauty唇膏製作（K-Beauty 립스틱 제작）₩66,000
- 小Tips：由弘大入口站3號出口行6分鐘左右
下次去延南洞唔再只係去嘆咖啡，以上嘅活動都係幾有趣，如果苦惱之後去弘大要點排行程，不如都加番一兩個活動落去啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
