2024首爾八大賞銀杏景點
韓國秋天除咗紅葉就梗係要睇埋銀杏啦！其實唔使離開首爾都可以見到壯觀嘅銀杏㗎！
- 延南洞京義線林蔭道(경의선숲길)
- 松坡慰禮城街(송파 위례성길)
- 高麗大學-慶熙大學步行路
- 仁寺洞(인사동)
- 新沙洞林蔭大道(신사동 가로수길)
- 首爾林(서울숲)
- 成均館大學 明倫堂(성균관대학교 명륜당)
- 德壽宮石牆路(덕수궁 돌담길)
Hello，大家好，我哋係由韓國人每日提供最新韓國旅行資訊嘅Creatrip。
通常嚟韓國玩嘅朋友都會選擇秋天，除咗因為天氣最舒服，而且景色可以話係一年四季入面最色彩斑斕嘅季節。而紅色嘅楓葉同金黃色嘅銀杏就係韓國秋天最有標志性嘅景色。講起銀杏，相信大家第一樣諗起嘅會係佢陣味，但係其實當你抬頭一望，就會望到一片金黃色嘅樹葉，如果天氣好，加埋陽光仲會有金光閃閃嘅效果。
今日就等小編推薦係首爾市區都可以睇到一片金黃嘅銀杏景點，大家記住mark好嚟韓國嘅時候去啦！
首爾八大銀杏景點
延南洞京義線林蔭道(경의선숲길)
- 前往方法：弘大入口站（홍대입구역）3號出口
京義線林蔭道位於延南洞，係好多旅客嚟韓國旅行嘅時候都會去嘅地方。韓國政府將原本嘅京義線地下化之後，地面嘅空間就變咗做行人路。路嘅兩邊種滿曬紅楓樹同銀杏樹，所以一到秋天，呢度就會變成一片金黃色。連韓劇《今生是第一次》都曾經喺秋天嘅時候去取過景，鐘意呢套韓劇嘅朋友一定要嚟睇吓啦！
松坡慰禮城街(송파 위례성길)
- 前往方法：奧林匹克公園站（올림픽공원역）3號出口
慰禮城街其實就係圍住奧林匹克公園周邊嘅行人路，一出地鐵站就會即刻見到好壯觀嘅銀杏樹林，據小編所知，呢條路有超過一千棵銀杏樹㗎！大家除咗可以入奧林匹克公園參觀之外，仲可以沿住呢條路行，欣賞吓沿途嘅風景。
高麗大學-慶熙大學步行路
- 地址：서울 동대문구 청량리동 산1-137
- 前往方法：高麗大站（고려대역）3號出口
平時如果要由高麗大學搭地鐵去慶熙大學，要轉車先可以去到，但其實呢兩間大學相距唔遠，搭巴士10分鐘就到，而慢慢行嘅話30分鐘都去到，途中會經過嘅路每逢秋天就會變成金黃色，真係好浪漫㗎！
仁寺洞(인사동)
- 地址：서울 종로구 관훈동 123-6
- 前往方法：安國站（안국역）6號出口
雖然大家嚟旅行都會成日去仁寺洞，但大家知唔知道其實仁寺洞條主路兩邊其實係種滿曬銀杏樹㗎呢？加上仁寺洞原本就係一個充滿古代風情嘅地方，秋天嚟呢度會感覺自己好似翻咗幾十年前咁，時間都變得好慢好悠閒。
新沙洞林蔭大道(신사동 가로수길)
- 地址：서울 강남구 신사동 667-13
- 前往方法：新沙站（신사역）8號出口
新沙洞亦都係另一個好多朋友嚟韓國旅行嘅時候會去shopping嘅地方，林蔭大道嘅兩邊除咗有好多國内外品牌嘅衫舖同充滿特色嘅cafe，其實全條街都種滿銀杏樹，所以呢度亦都有個名叫「 銀杏大道」 ，喺呢條金黃色嘅大街散步嘅同時享受吓韓國秋天嘅魅力啦。
首爾林(서울숲)
- 地址：서울 성동구 뚝섬로 273
- 前往方法：首爾林站（서울숲역）5號出口
最近幾年聖水洞越嚟越受韓國年青人歡迎，而首爾林公園亦都係其中一個大家去聖水洞嘅時候必去嘅地方。首爾林公園係全首爾最大嘅公園之一，身處喺呢度就好似離開咗首爾，去咗郊外咁，四周圍都係各式各樣嘅植物同樹木。雖然春夏秋冬去都可以見到唔同嘅景色，但係小編就最推薦大家秋天嘅時候去啦！沿住大路行會見到一大片銀杏森林，而另一邊仲有楓樹林，充滿秋日氣息，非常適合大家去打卡。
成均館大學 明倫堂(성균관대학교 명륜당)
- 地址：서울 종로구 명륜3가 53
- 前往方法：惠化站（혜화역）4號出口
講起韓國嘅銀杏當然唔少得成均館大學明倫堂啦。明倫堂古時候曾經係儒生嘅學堂，歷史非常悠久。而喺佢側邊仲有一棵非常巨大嘅銀杏樹，呢棵樹其實係韓國第59號自然紀念物嚟㗎！銀杏樹葉隨風飄落，加上周圍古色古香嘅建築物，成個畫面非常詩情畫意，所以唔少韓國人都會趁秋天嘅時候嚟明倫堂同呢棵銀杏樹合照。而且成均館大學位於惠化站，交通方便，附近仲有個大學街商圈，大家打完卡之後仲可以去行嗰街shopping吓。
德壽宮石牆路(덕수궁 돌담길)
- 地址：서울 중구 세종대로19길 24
- 前往方法：市廳站（시청역）3號出口
德壽宮係首爾五大宮殿之一，除咗可以入去參觀呢個咁宏偉嘅宮殿，圍住德壽宮嘅石牆路亦都係韓國人同觀光客經常會去散步同影相嘅地方。而每到秋天，周圍嘅楓樹同銀杏樹紅黃相間，隨便影都可以影得好靚，啱曬嚟旅行嘅大家。
如果有更多想知嘅內容，都可以隨時留言或者dm話俾我哋知：）
Mail：help@creatrip.com