延南洞購物總整理
原來延南洞都幾多嘢行！特色文創小店、復古懷舊風二手店等住你去尋寶！
Hello，大家好，我哋係由韓國人每日提供最新韓國旅行資訊嘅Creatrip。
講到延南洞，大家可能只會諗到特色Cafe，但其實呢度都有唔少隱藏本土品牌同文青小物，而家就等小編為大家介紹啦！
延南洞購物 - 服飾
1. 50% Sale Market（50퍼센트）
延南洞「50% Sale Market」顧名思義，即係可以用好平嘅價格入手，呢度款式偏向黑白、柔和色系等韓妹基本款，風格大眾。
*提提大家，現場會有兩個標價，比較平嘅係俾現金，大家記住要帶好子彈去買啦！ *
- 地址：서울 마포구 성미산로 150
2. Lovely4（러블리4）
弘大入口站3號出口前面，大家可以留意吓，一間招牌係用心電圖寫「Lovely4」，由恤衫、裙、褲等女裝單品，呢度通通都有，價格係中價位，風格簡單，但就吸引唔少人嚟買。
- 地址：서울 마포구 양화로21길 37
3. 時空間（시공간 연남동）
相信大家對「時空間」都唔會好陌生，呢度可以買到耳環、戒指、髮飾等單品，另外仲有一啲服飾可以俾大家揀，雖然款式唔算好多，但好多都係而家流行緊嘅熱門款，價格算係中低價位，買完首飾，會唔會都想買返件衫襯吓咁呢？
- 地址：서울 마포구 양화로21길 43
- 營業時間：12:00 - 22:00
4. Distangdal（디스탕달）
延南洞有唔少復古同行Hiphop風嘅賣衫鋪頭，例如呢間喺轉角位嘅「Distangdal」，異國風情同稀有設計款都可以喺度搵到，仲有唔少帽款，但價錢唔算好平，但如果你係鍾意尋寶，可以嚟呢間睇吓。
- 地址：서울 마포구 동교로 244
- 營業時間：11:00 - 23:00
5. 延南Y（연남와이）
呢間「延南Y」超大間，主要係賣復古裝，男、女裝都可以搵到，如果想執到平嘢，可以嚟呢度行一圈。
- 地址：서울 마포구 동교로 237
- 營業時間：12:00 - 23:00
6. 延南Vintage（연남 빈티지）
呢間喺啱啱介紹嘅Lovely4右手邊，外觀好顯眼，如果你係行開街頭風，落埋地下1樓行，應該會幾開心，大部分係₩40,000上下，偶然會執到寶！
- 地址：서울 마포구 양화로21길 37 B1
- 營業時間：11:00 - 23:00
7. Fennec Station（페넥 스테이션）
韓國品牌「Fennec」相信大家成日都會喺IG見到有好多人代購，原因係佢唔算好貴，而且夠簡單，如果一直都十五十六買咩色好，好推薦大家之後都可以去延南洞實體店睇吓。由銀包、手機殼、AirPods殼至Apple Watch配件等都有，材質係高級皮革，小編每次去都忍唔住入手....
- 地址：서울 마포구 성미산로 174
- 營業時間：12:00 - 20:00（Break Time 14:00 - 15:00）
8. VIEWMAP（뷰앱 연남스토어）
想配眼鏡或者買個款式唔錯嘅眼鏡框？推薦可以留意一吓VIEWMAP，質感好符合現代年輕人風格，圓鏡片、寬鏡片到各種形狀鏡片都有，鏡框價格係₩30,000以上，呢個價錢都好值得入手。
- 地址：서울 마포구 동교동 197-18
- 營業時間：平日12:00 - 21:00、週末10:00 - 22:00、Break Time 16:00 - 17:00
弘大延南洞購物 - 文青小物
1. Sokamono（소카모노）
講到延南洞，真係有唔少文具小物店呢！Sokamono以藍色貓咪為主視覺，現場有賣好多印有貓圖案嘅海報、貼紙、筆記簿等，係貓奴一定要嚟行！卡片₩1,500至₩2,000不等，手帳係₩10,000以上。
- 地址：서울 마포구 성미산로 167-1
- 營業時間：14:00 - 20:00、逢星期一休息
2. 五月商店（오월상점）
同其他鋪頭一樣，五月商店有賣好多卡片同紀念品，甚至仲有賣杯碟、鏡等特色產品。其中最吸引小編嘅係碗碟組合，唔單止生活中可以創造儀式感，作為禮物、紀念品送俾人都好合適。
- 地址：서울 마포구 동교로 267
- 營業時間：13:00 - 21:00
3. Anuu Vintage Shop（어느상점）
Anuu Vintage Shop行復古美式風格，可以搵到好多同童年記憶有關嘅卡通人物文具、模型、鑰匙扣等等，就好似細個成日會去嘅玩具鋪咁，一入去就令人失心瘋，行極都行唔完！
- 地址：서울 마포구 동교로38길 27-19 2F
- 營業時間：星期一至四14:00 - 21:00、星期五至日12:00 - 22:00
4. Adorable Me Gift Shop（어도러블미）
如果想買一啲隨性收納袋，小編推薦大家可以去延南洞嘅「Adorable Me Gift Shop」搵吓，另外呢度仲有好多貼紙、卡片同香氛蠟燭等，價錢係₩3,500起，一啲都唔貴。
- 地址：서울 마포구 동교로38길 27-8
- 營業時間：12:00 - 20:00
5. TETEUM（테틈）
TETEUM係韓國一間好出名嘅文創小店，大家應該喺SNS都會見過呢隻熊仔，由手機殼、AirPods殼到電腦袋、iPad套都有，價錢合理。
- 地址：서울 마포구 동교로36길 15
- 營業時間：14:00 - 19:00、逢星期一休息
6. 春夜，月（봄밤, 달）
位於延南洞嘅「春夜，月」粉色外型非常搶眼，主要銷售情侶飾品、耳環、戒指同一啲小物，呢度有好多其他鋪頭搵唔到嘅獨特款式，雖然備部唔算好大，但都有好多嘢等住大家去發掘。
- 地址：서울 마포구 성미산로 172
- 營業時間：13:00 - 20:00、逢星期一休息
7. 168cm東橋店（168cm 동교점）
168cm係一個韓國文創品牌，呢度嘅手機殼款式多，提供唔同型號，入到去點都會買返一兩個先走。
- 地址：서울 마포구 양화로23길 30
- 營業時間：平日13:00 - 21:00、週末12:00 - 22:00
弘大延南洞購物 - 美妝
1. The Ordinary（디오디너리）
The Ordinary係加拿大品牌，喺延南洞開有實體店面，因為品質高、價錢平而受到好多韓國人歡迎。
- 地址：서울 마포구 양화로21길 31
- 營業時間：12:00 - 21:00
2. Olive Young弘大機場鐵道站店（올리브영 홍대공항철도역점）
弘大入口站3號出口出嚟號時候，左手邊就會見到一間超大型Olive Young，只要經過都一定入去行返個圈。
- 地址：서울 마포구 동교동 155-27
- 營業時間：10:00 - 23:00
之後去延南洞shopping，不妨參考小編整理好嘅List，之後去睇吓會唔會執到寶啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
