韓國11月天氣&穿搭小貼士
韓國11月秋冬正式交替！11月可以同時睇到紅葉、銀杏同初雪？11月去韓國又要點著？
- 韓國11月天氣🔆
- 首爾11月最高/最低溫度🌡️
- 釜山11月最高/最低溫度🌡️
- 韓國11月初雪❄️
- 韓國11月穿搭/著衫小貼士🧥
- 韓國11月特別活動✨
- 飛韓國之前你仲需要...💡
Hello，大家好，我哋係由韓國人每日提供最新韓國旅行資訊嘅Creatrip。
大家知唔知幾時先係韓國嘅冬天？韓國秋天大約會喺11月尾結束，由呢段時間開始天氣將會越嚟越冬，係初冬嘅開始！11月韓國仲有冇紅葉同銀杏睇？幾時會落初雪？11月嚟韓國又有咩好玩？今日就等小編一次過整理俾大家啦！
11月推薦體驗/活動
🛍️韓國超市/百貨公司休息日
🦀️韓國必食醬油蟹餐廳推薦
🍁韓國紅葉團特價熱賣中
👩🍳《黑白大廚(흑백요리사)》參賽者餐廳總整理
韓國各月份天氣&穿搭小貼士💡
1月 | 2月 | |
12月 |
韓國11月天氣&穿搭小貼士
韓國11月天氣🔆
기독일보
10月尾到11月中嘅韓國會係最舒服嘅秋天天氣，雖然溫度睇落好低，但其實冇想像中咁凍，不過要注意日夜溫差真係超大，最高同最低溫度可以相差10度以上，出門口嘅時候一定要帶多件外套！
而由11月尾開始溫度將會直線下降，去到韓國初冬時節，最低溫亦都會跌破0度。
首爾11月最高/最低溫度🌡️
- 最高溫度：0°C~25°C
- 最低溫度：-8°C~20°C
2023年11月首爾溫度（weatherspark）
首爾11月頭同11月尾嘅天氣完全係兩個世界，上半個月嘅最高同最低溫度都會係0度以上，而由11月中開始，最低溫度將會跌穿零下。
首爾嘅紅葉同銀杏差唔多去到11月中亦都會全數消失，由呢個時候開始首爾就會冇咗大家心目中嗰種秋日氣氛，反而會有種冬天冷冷清清嘅感覺。
11月嚟首爾之前，大家睇天氣App可能會俾啲數字嚇親（因為睇落勁凍XD），不過因為韓國11月通常都唔會濕凍，所以雖然溫度睇落好低，但其實體感上唔會！
釜山11月最高/最低溫度🌡️
- 最高溫度：8°C~25°C
- 最低溫度：-3°C~15°C
2023年11月釜山溫度（weatherspark）
而位於韓國南部嘅釜山就自然會暖過首爾少少，不過要注意釜山11月嘅日夜溫差亦都非常大！
基本上釜山11月最低溫度都會維持喺0度左右，日頭天氣舒服乾爽，入夜之後偏涼，尤其係風比較大嘅時候，體感溫度會比較低，所以記住要帶多件擋風外套啦。
韓國11月初雪❄️
相信好多人都會想知道韓國初雪幾時落！最近十幾年嘅首爾初雪記錄當中，得2020年嘅初雪係喺12月落，其他時候都係喺11月中~尾落，所以如果大家想睇初雪，大約係11月尾嚟就差唔多。不過呢個只可以做一個參考，確實幾時會落真係一個未知數，睇到初雪嘅朋友可以話真係超好彩！
韓國11月穿搭/著衫小貼士🧥
무신사
11月去韓國旅行嘅時候大家都仲可以帶好多靚衫嚟，只不過記住一定要帶外套同保暖配飾，例如一般短版外套、長版乾濕褸到冷帽、頸巾，大家可以根據當日天氣著同除，咁就唔洗怕會太熱或者凍親啦！
可能會有朋友問，到底11月去韓國玩洗唔洗著羽絨？基本上11月頭都唔太需要著，而去到11月尾氣溫驟跌嘅時候，建議比較怕凍嘅朋友不妨可以帶定嚟。
무신사
普遍嚟講，11月仲未係韓國最凍嘅時候，所以穿搭比較多樣化。而且因為通常都唔會喺戶外逗留太耐，所以建議用洋蔥式穿搭方式襯衫，著返件比較厚嘅外套就得。
韓國11月特別活動✨
韓國紅葉
- 時間：大約開到10月尾~11月初
今年韓國紅葉喺10月中下旬慢慢出現，10月尾~11月頭會開到最靚，之後就會開始慢慢凋謝。不過因為每個景點嘅楓樹品種不同，11月想睇紅葉嘅朋友們可能就需要搏一搏啦。
精選紅葉團👇🏻
韓國銀杏
- 時間：大約開到11月中
韓國銀杏大約會喺紅葉開始轉紅後1個禮拜後開始轉黃（大約係10月下旬），去到11月中之前變成燦爛嘅金黃色，非常靚！不過大家記住唔好踩到啲銀杏果實，如果唔係陣臭味會跟足你全日XD
釜山國際煙火節
- 日期：2024年11月9日（星期六）
釜山每年其中一件盛事就係喺11月舉辦嘅煙火節，大家不妨去最佳觀賞位置，親眼睇住煙花以廣安大橋為背景燦爛盛放，搭配五光十色嘅燈光同音樂，感受釜山秋日煙火節嘅浪漫啦！
飛韓國之前你仲需要...💡
🍁參加一日遊去近郊睇紅葉啦👇🏻
如果有更多想知嘅內容，都可以隨時留言或者dm話俾我哋知：）
Mail：help@creatrip.com