Hello，大家好，我哋係由韓國人每日提供最新韓國旅行資訊嘅Creatrip。
自從韓國解封之後，應該有唔少人都plan住嚟玩~ 如果大家之後打算同另一半一齊飛韓國，又唔知有咩地方好去嘅話，就等小編推薦一啲地方同活動俾大家啦！
情侶飛韓國可以做嘅事
1. 去主題公園
韓國咁大，淨係首爾已經有3個主題公園（愛寶樂園、樂天世界、首爾樂園）等住大家去！每一間都有唔同特色，但共通點就係經常都有超多情侶去！
韓國人只要拍拖就好鍾意放閃，就好似要話俾全世界知佢哋就係一對咁！佢哋除咗會去買頭飾戴之外，當然唔少得就係著返一set校服去打卡！
特別係主題公園附近有唔少呢啲租借校服嘅鋪頭，除咗有一般嘅學生制服，就連KPOP偶像著嘅制服都可以搵到，而且尺寸齊全，大家唔需要擔心唔啱著。如果唔知揀邊間好，可以參考下面條link（透過我哋預約仲可以有優惠添啊）！之後同另一半飛韓國，想留低一個難忘回憶，就可以租返套去影相打卡啦！
2. 去N首爾塔（南山塔）
N首爾塔係好多人第一次嚟旅行都會去嘅景點之一，因為喺上面可以望到首爾靚景！加上南山一直都係唔少情侶去打卡嘅地方，如果想同另一半長相思守，咁就要買個鎖匙扣嚟鎖住啦。
由南山山腳一直往首爾塔方向行，會經過南山公園，雖然要行好多級樓梯，但當散步、爬吓山都幾唔錯~ 而家透過我哋買N首爾塔觀景台門票仲可以有優惠添！
3. 去整戒指
比起去首飾店就咁買情侶戒，大家會唔會想同另一半自己去整返一隻獨一無二嘅戒指呢？大家可能都會擔心唔識韓文唔知點算好，但戒指大學嘅職員可以用簡單英文溝通，亦都會好細心咁教大家點整，所以就算係第一次整呢啲手工都可以放心。
除咗純銀戒指之外，而家韓國都好流行整木戒指，製作材料來自廢棄傢俬同滑板等，夠曬環保之餘仲可以為地球出返一份力！
4. 去Shopping
講到潮流，韓國真係變得好快，加上佢哋喺穿搭方面亦都好有講究，只係簡單襯都可以好有型！想一次過買到男/女裝，小編最推薦大家可以去M PlayGround，弘大2號店有成3,000件貨品任君選擇，而且價錢都超抵，買多幾件都唔肉赤！除咗弘大，新村同建大都有分店，要去嘅話都好方便！
5. 去影人生四格
呢幾年韓國真係好流行影人生四格，可以留住當下嘅美好回憶啊嘛！感覺就有啲似係以前中學時代會影嘅貼紙相，而家韓國嘅人生四格鋪頭就好似便利店/Cafe一樣多，唔使特登搵都可以見到有一間喺左近。加上而家好多鋪頭進化到可以自己用remote去控制幾時影，頭飾可以任戴，甚至有啲鋪頭會提供梳/直髮夾俾大家扮完靚再去影！而且影一次通常￦4,000（約HKD 24）就會有2張！
6. 去食燭光晚餐
喺香港想同另一半喺出面食餐燭光晚餐特別貴，不過一場嚟到韓國，點都要搵個機會享受一吓浪漫氣氛！位於龍山區嘅I.O.U係一間首爾人氣求婚名店，嚟呢度無論坐邊個位，都可以望到漢江同63大樓，唔少情侶都會嚟呢度一齊過紀念日，連韓國人都好難搶到位！想嚟嘅話記住要事先預約啦！
7. 去影傳統婚禮相
平時講到婚禮，大家可能只會諗到西式婚紗或者中式旗袍，大家又有冇諗過試吓著韓國傳統婚禮韓服呢？我哋而家有同緊仁寺洞一間鋪頭合作，俾大家可以體驗吓傳統韓式婚禮！影完相之後會send USB檔俾你，再幫你哂埋相~ 價錢合理，有興趣嘅朋友可以考慮吓！
8. 去漢江踩單車
首爾有一個無人單車租借系統叫做「Seoul Bike（따릉이)」，幾乎周圍都可以搵到佢，佢價錢超平，￦1,000（約HKD 6）就可以踩一個鐘！大家之後會唔會都想租架單車喺漢江吹吹風，用另一個角度去欣賞首爾呢？（另外某啲韓國大城市都會有自己嘅一套單車租借system，去旅行之前大家可以search吓~）
9. 去動物Cafe
韓國有唔少動物cafe，由普通貓貓/狗仔Cafe，到超特別嘅浣熊、爬蟲類動物、羊咩咩Cafe都有！有時候行景點行到攰，想搵地方坐低休息吓，鍾意小動物嘅情侶們不妨可以去呢啲動物Cafe同小動物互動，可以同時療癒身心靈！
10. 去按摩
最後一個小編想推薦大家去做嘅就係按摩！嚟旅行人生路不熟，日日都會行好多路，有時真係攰過返工，呢個時候最就係去揼骨鬆一鬆！位於明洞嘅「Blue Arirang」本身就有好多韓國人同外國人去，呢度空間好乾淨，職員亦都好有禮貌同親切，俾人一種好放鬆嘅感覺。除咗揼骨，佢最大賣點係有埋瘦臉面部按摩，想輕鬆擁有V臉，不妨可以嚟試吓！
其實韓國比想像中多嘢玩，同另一半都有唔少活動可以一齊做，plan緊行程嘅你可以考慮吓以上介紹嘅活動！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
