樂天世界總整理
樂天世界必玩機動遊戲！必影打卡位又喺邊？
- 樂天世界簡介
- 點買樂天世界門票？
- 魔幻島推薦機動遊戲
- 探險世界推薦機動遊戲
- 樂天世界推薦打卡位
- 必食同必買紀念品
- 表演、遊行&特別活動
- 樂天世界小Tips
- 樂天世界附近活動
- 點樣去「樂天世界」？
Hello，大家好，我哋係由韓國人每日提供最新韓國旅行資訊嘅Creatrip。
樂天世界係首爾主題公園必去之一，嚟到唔單止可以玩刺激機動遊戲，同時仲可以影到唔少靚相！今日就等小編同大家一齊去睇吓有咩係必玩、必食同必睇啦！
樂天世界簡介
- 地址：서울 송파구 올림픽로 240
- 營業時間：10:00 - 21:00（時間可能會有所變化，去之前請先確認時間 )
樂天世界入場券價錢
樂天世界 + 國立民俗博物館 | 樂天世界 | |||
1-Day | 16:00後入場 | 1-Day | 16:00後入場 | |
成人 （19歲至64歲） | ₩62,000 | ₩50,000 | ₩59,000 | ₩47,000 |
青少年 （13歲至18歲） | ₩54,000 | ₩43,000 | ₩52,000 | ₩41,000 |
小童 （3歲至12歲） | ₩47,000 | ₩36,000 | ₩46,000 | ₩35,000 |
幼兒 （36個月以下） | ₩15,000 | ₩15,000 | ₩15,000 | ₩15,000 |
※12-36個月以下幼兒可以免費入場，但要玩兒童遊樂設施，必須單獨購買門票。
※0-12個月以下幼兒可以免費入場同可以玩兒童遊樂設施（Kidtoria 等）。
Creatrip優惠價！
樂天世界全日通門票 | ₩41,000 |
Magic Pass
專for唔鍾意排隊嘅人而設，可以快啲玩到機動遊戲。
5次 | ₩49,000 |
10次 | ₩89,000 |
「樂天世界」注意事項
- 魔幻島可能會因落大雨或落大雪會開閉。
- 開放或關閉時間可能會因季節而變，請提前確認。
- 門票可以去到現場或提前網上買。
- 活動或表演時間可能會有唔一樣。
- 有啲機器維修緊會冇得玩，詳情請參考官網。
- 出咗場之後唔可以再入場。
樂天世界地圖
樂天世界只要搭地鐵就可以輕鬆去到，穿過購物中心就可以去到樂園入口。
樂天世界分為魔幻島（室外）同探險世界（室內），但如果落大雨/大雪，可能室外會唔開，出發之前請先Check天氣報告。
點買樂天世界門票？
購買門票有3種方式：喺櫃檯排隊買、用自動售票機同網上預訂。
如果有韓國電話卡或者Kakao Talk嘅朋友，可以直接去自動售票機買，但如果冇直接去櫃檯買會方便啲。
小編今次去買咗一張普通門票同一張Magic Pass， 而且Magic Pass可以揀5或者10次唔使排隊就玩到，真係會慳返唔少時間！
職員英文都幾流利，大家嚟到唔需要擔心溝通唔到！
買完門票之後，職員就會俾一張門票同手帶（用於Magic Pass），只要玩一次機動遊戲，職員就會扱個印喺上面做紀錄。
如果有韓國電話號碼同kakaotalk ID，可以喺售票機17號直接買Magic Pass。
只要揀玩幾多次，之後輸入手機號碼，比完錢之後，系統就會send QR Code去你嘅Kakao Talk。
入場之前向職員出示QR Code，之後就可以入去玩啦！
入口區域有韓文、中文、日文、英文等唔同語言小冊子，有需要嘅朋友可以喺度拎返本。
魔幻島推薦機動遊戲
1. 亞特蘭提斯（推薦用Magic Pass）
呢個係樂天世界最受歡迎過山車之一，時速高達72千米/小時，如果唔用Magic Pass可能需要等大約2小時，鍾意刺激嘅朋友一定要嚟試！身高必須係135cm~190cm之間先可以玩。
2. 彗星特快車（推薦用Magic Pass）
魔幻島地下過山車，身高至少超過120cm先可以玩，玩嘅過程360度旋轉，超有快感！小編去到嘅時候超多人玩，但用Magic Pass可以慳返唔哂時間。
3. 搖擺圓盤（推薦用Magic Pass）
4. 高空降落
呢個跳樓機相當刺激，由高空直落，身高要係130cm至190cm之間，一次最多只可以坐40人，相對等嘅時候唔會太耐。
5. 旋轉圓盤
呢個就好似另類嘅海盜咁，上下搖擺，速度比想像中快，超刺激！玩呢個機動遊戲身高要超過125cm。
6. 旋轉秋千
炎炎夏日玩呢個就最爽！喺高空飛嚟飛去，大人細路都鍾意玩，身高要超過120cm。
7. 高空落體
由38千米高處以時速90千米速度降落！身高要係130cm至190cm之間先可以玩。
探險世界推薦機動遊戲
1. 法國雲霄飛車（推薦用Magic Pass）
小編個人最鍾意玩嘅機動遊戲之一， 超越360度，貫穿成個探險區，韓國人超鍾意玩！身高要超過120cm，每一次至少要等2小時以上，推薦大家用Magic Pass。
2. 西班牙海盜船（推薦用Magic Pass）
小朋友同大人都鍾意玩，如果鍾意刺激，推薦大家坐最後！身高至少要超過110cm。
3. 急流泛舟
由高處直落，不過玩呢個遊戲要小心，因為坐最前排嘅話會濕晒身！唔想濕太多可以坐中間或者後面，身高要超過110cm以上先玩得。
4. 熱氣球飛行
原本以為係可以坐住熱氣球，喺高空欣賞樂天世界景色，點知實際上係需要企喺度，上到去嘅時候會有啲晃動，成個過程大約15分鐘，如果有位高嘅朋友唔太推薦玩，另外至少要6歲先可以玩。
樂天世界推薦打卡位
1.旋轉木馬（探險世界）
旋轉木馬應該係唔少主題公園都會有，不過每一次去到都會令人忍唔住去打卡，呢度氣氛好浪漫，快啲拖住另一半影返一輯放閃相啦！
2. 魔幻城堡（魔幻島）
呢個城堡可以話係必去打卡景點之一！ 唔喺度影返幅，都唔當係去過樂天世界！
甚至好多人為咗嚟呢度影相要排隊添！
必食同必買紀念品
去得主題公園又點可以品買紀念品？呢度有好多頭飾、公仔同氣球等。
呢度嘅頭飾平均係₩7,000至₩10,000， 款式多可以慢慢揀。
樂天世界入面有唔少餐廳同埋小食店，唔需要怕肚餓嘅時候搵唔到嘢食。
小編晏晝嘅時候買咗沙冰₩3,500、香腸&薯條₩4,000同西班牙油條₩3,500， 價錢唔貴而且都好夠飽。
呢個小食只有喺高空降落前面有得買， 形狀夠晒特別。
另外仲買咗一個樂天世界主題角色Lorry嘅波板糖，係咪好可愛呢？
以上小食價錢大約係₩2,000至₩5,000。
表演、遊行&特別活動
除咗各種機動遊戲之外，樂天世界仲有好多特別表演同活動。
每日有咩表演，可以撳我參考。
樂天世界一年入面會舉行唔同主題嘅活動，每一次去紀念品、小食等都會唔同，所以好有新鮮感！好似小編之前去係 11/3/2022 - 6/6/2022期間係World School Festival。
坐月球船&UFO
呢個係魔幻島舉辦活動，朝早同夜晚都可以體驗，但如果係夜晚去會著哂燈，超靚！
- 位置：魔幻島區域
- 營業時間：12:00 - 21:00 （營業時間可能會有變動）
- 價格：月球船₩25,000（最多3人）/ UFO船₩35,000（最多5人）
- 使用時間：20分鐘
NAVER [아수]
樂天世界小Tips
1. 租校服去玩
去樂天世界之前，唔少人都會去租借校服，小編推薦大家可以去梨花校服。
- 地址：서울특별시 송파구 잠실동 40 B1 36-27
- 營業時間：09:00 - 22:00（最後歸還時間係21:30）
- 價格：租借全日₩19,000、兩日一夜₩24,000、三日兩夜₩29,000
或者大家可以去到樂天世界前面租，不過因為呢度排隊嘅人數多，等嘅時間都會長啲，如果太晏去，可能想要嘅設計或者尺寸都冇。
- 營業時間：平日 09:00 - 21:00、週末及公眾假期 09:00 - 21:30
- 價格：押金₩10,000（現金）、租借₩20,000起（現金或信用卡）
樂天世界入面有一間叫做Pixie Magic嘅鋪頭，一樣都可以借衫。
- 營業時間：平日 09:00 - 21:00、週末及公眾假期 09:00 - 21:30（必須喺20:00之前歸還）
- 價格：小童₩20,000、成人普通校服₩20,000起、高級校服₩25,000起
2. Download 樂天世界App
只要Download 樂天世界app，就可以知道而家每一個機動遊戲要等幾耐。
Magic Pass有分兩種，一個係一開始喺櫃檯買，另一個係可以用app度預約（免費），但有個唔好係每15到60分鐘先可以按一次，因為好多人都會搶成日都會冇位。
3. 同魔幻城堡影即影即有
想同魔幻城堡影相，可以去影即影即有，1張₩4,000、2張₩7,000。
想同朋友留低一個美好回憶，喺度影返張即影即有都幾唔錯㗎！
4. 借叉電器同儲物櫃
如果玩到手機唔夠電，可以嚟呢度借叉電器，另外儲物櫃可以放行李，價錢都只係₩1,000起。
5. 入樂天世界前買定啲小食
可能好多人都會擔心入到去樂天世界，好多嘢都唔好食而且貴，入去之前可以先喺商場餐廳或者小食店食嘢。
樂天世界附近活動
Ice Garden
- 營業時間：每 30 分鐘休息 13:00 - 13:30 / 14:30 - 15:00 / 16:00 - 16:30 / 17:30 - 18:00 / 20:00 - 20:30
- 價格：平日 成人₩19,000、小童₩17,000 / 週末及公眾假期₩21,000、小童₩18,000
除咗去樂天世界之外，大家亦都可以帶小朋友嚟呢度溜冰。
樂天世界水族館
- 營業時間： 星期一至四 10:00 - 20:00、星期五、六、日及公眾假期 10:00 - 22:00
- 價格：原價￦33,000，Creatrip優惠價￦22,000
呢度總共有650種，55,000個海洋生物，喺度可以見到白鯨、海獅、企鵝、魔鬼魚、食人魚、水母等稀有海洋生物。
樂天世界塔 & Seoul Sky
蠶室樂天塔「Seoul Sky」係世界第五高、韓國第一高觀景台，距離地面500米，可以360度零死角欣賞首爾市景，呢度唔單只有展望台，仲會不定期更新展覽空間、Cafe等，朝早同夜晚嚟完全唔同氣氛，推薦大家一定要嚟打卡！Seoul Sky附近就係蠶室松理團路、樂天世界，要去嘅話相當方便。
點樣去「樂天世界」？
蠶室站落車之後，往4號出口方向行。
一直直行。
見到Open Dining Pub嘅時候繼續直行。
見到有樂天世界粉紅色柱轉右，直走就會見到租校服嘅地方。
之後就會見到樂天世界正門。
以上係2023年最新樂天世界嘅介紹，希望可以幫到大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk