韓國校服介紹1910年簽訂「日韓合併條約」之後，校服就更進一步咁普及起嚟。不過校服嘅顏色反而受到咗限制，大部分都係以黑白為主。喺1920年代，大部分女性校服都採用白色上衣黑色裙嘅設計。而喺1930年日殖時期，日本將女性嘅校服統一做西裝，最常見係白色恤衫配上啡色裙嘅設計，冬天就着水手裝設計嘅校服。不過當時亦有學校照用韓服做校服。 着住몸빼上堂嘅學生（knnews） 喺1930年代後期至1940年代，因為日本參戰第二次世界大戰緣故韓國嘅學生被迫着工作服。呢種工作服被稱為「mom ppae（몸빼）」，不過都有啲學校唔遵守呢個規定。由1983年至1985年開始，為咗鼓勵尊重個人主義，推出咗政策取消咗一定要着校服嘅規定。之但係呢項政策最終喺1986年取消咗，自始就越嚟越多學校要求學生着校服。 而家大部分學校都有自己嘅校服，佢唔再只係一件普通嘅衫，而係一間學校嘅象徵，亦係樹立品牌嘅手段，更成為咗唔少學生選擇高中嘅其中一個指標添。 對於韓國校服嘅爭議 喺韓國對於着校服嘅爭議好多，因為大多數女學生嘅校服都係短裙，所以有好多女學生都不幸成為性騷擾或者偷拍嘅受害者。因為咁韓國教育部都由2000年開始不斷鼓勵學校將校服改為褲，但成效唔大，仍然有好多學校以短裙做校服，當中仲要好多都好貼身，令學生喺日常活動嘅時候好唔方便。 另外，當講到天氣，韓國嘅校服都有佢嘅缺點。韓國嘅夏天好熱，冬天亦好凍，所以冬天會見到好多女學生喺裙下面着褲，或者喺裙上面圍住毛毯周圍走。夏天嘅時候，學生都要好小心，唔係短裙會好易走光。因為咁有好多學校會喺每張枱前面安裝塊板遮住腳嘅位置，以防學生走光。 韓國一套校服幾多錢？ 韓國嘅校服分三種，分別係冬季校服（동복）、夏季校服（하복）同體育服（체육복）。而男學生嘅校服多數包括外套、背心、有領白色長袖恤衫、tie同長褲。 女學生嘅校服就通常包括外套、有領白色長袖恤衫、背心、bow tie同百褶裙。 至於價錢，唔可以否認韓國校服真係好貴。平均嚟講一套冬季校服大概係20萬至30萬won（HKD 1,380-2,070）。夏季會平啲，大概係7萬至9萬won（HKD 490-620），至於運動服都分為夏季同冬季，大概係7萬至15萬won（HKD 490-1,040）都有。所以如果要買哂咁多套校服，就算唔加埋另外要一兩件替換，每個學生都要平均要洗30萬至50萬won（HKD 2,070-3,450）嚟校服，真係好貴。 所以大家睇韓劇嘅時候，或者都有見過一個家庭為仔女買校服嘅時候，感到好大壓力嘅橋段。因為咁亦有唔少家長提出簡化校服細節嘅意見，不過似乎仲有好多學校覺得校服係一間學校形象嘅象徵而冇做任何改變。 首爾校服最貴嘅學校 以下小編同大家介紹首爾校服最貴嘅學校，一齊睇吓韓國學生喺校服上面要洗幾多錢啦！ 月溪高中（월계고등학교） , 月溪高中2021年最新嘅校服有3套，包括係冬季校服（257,000won）、夏季校服（88,000won）同體育服（148,000won），一共有493,000 won（HKD3,400）。 龍文高中（용문고등학교） 夏季校服係88,000won、體育服係79,000won、冬季校服係210,000won，如果買埋冷衫就係57,000 won。成套校服係434,000won（HKD3,000），呢間亦係國民MC 劉在錫嘅母校添！ 祟義女子高中（숭의여자고등학교） 숭의여고 학생회 呢間女子高中總共有３套校服，冬天校服240,000won、夏季校服60,000won同運動服81,000won，全套一共係381,000won（HKD 2,630）。 首爾公演藝術高中（서울공연예술고등학교） 呢間係好多idol都會上嘅高中，所以或者好多人都會好奇呢度校服幾錢。首爾公演藝術高中嘅冬季校服一套係207,000won，如果加埋冷衫就再加65,000won。冬季運動服係60,000won，唔計夏季校服嘅話，全套冬季校服係332,000won（HKD2,290）。 翰林演藝藝術高等學校（한림연예예술고등학교） 翰林演藝藝術高等學校一樣係好多idol嘅母校，呢度校服都唔平！冬季校服成套係362,000won，背心係75,000won。就算唔計夏季校服，都已經係495,000won（HKD 3,420）。 以上就係關於韓國校服嘅介紹啦，大家對於韓國校服有咩意見都歡迎留言同我哋分享啊！ 如果有更多想知嘅內容，都可以隨時留言或者dm話俾我哋知：） Instagram： ...
a year ago
24813 
