四種羊毛背心穿搭
韓妹轉季最鍾意著咩？一次教你四種羊毛背心穿搭法！
Hello，大家好，我哋係由韓國人每日提供最新韓國旅行資訊嘅Creatrip。
大家知唔知道韓妹喺轉季嘅時候，會著啲咩去增加穿搭上嘅層次感呢？其實大部分韓國人一到春天同秋天就會入手好多件羊毛背心，唔單止可以保暖之外，仲可以襯出唔同造型。小編今日就同大家介紹四款韓妹好鍾意嘅Style啦！
四種羊毛背心穿搭
1. 羊毛背心+恤衫
其實以物料上嚟講，恤衫同冷衫嘅物料係好夾！不過喺襯搭嘅時候就要注重一下恤衫同冷衫嘅厚薄度，太厚嘅話好容易會顯肥！呢啲style其實有啲係會比較緊身，有啲就鬆啲，揀比較鬆身嘅反而更加顯瘦！
大家要留意嘅係兩件嘅寬鬆程度要差唔多，咁就顯得更加韓啦！另外一樣要注意嘅就係最好要揀白色襯衫，因為出面件背心好多時都係會有啲花紋。一件白色襯衫有光滑感得嚟有容易襯，絕對係襯咩色同咩款嘅背心都好睇啊！
소녀나라
如果你想有女人味啲或者鍾意可愛風格，下身都可以配長襪短裙都好襯！
2.羊毛背心+恤衫+直筒褲
其實呢個造型同上面第一款嘅差唔多，只不過係轉咗下身做一條直筒褲。有時想打扮得男仔頭啲，都可以襯返一條藍色直筒牛仔褲，咁睇落就會比較型格！
除咗牛仔褲之外，大家都可以揀啲軍褲，就會顯得更加型格！
3.羊毛背心+長恤衫裙+帆布鞋
另外一個著法都係配搭一件恤衫，不過今次件恤衫就比較長少少，有種one piece嘅感覺！大家記得要揀一件大約喺膝蓋上面嘅恤衫，咁就可以明顯同背心長度唔同，帶出有兩層layer嘅感覺！呢個style仲會俾人覺得你有女強人嘅感覺添！
喺鞋方面，大家都可以著返一對帆布鞋或者靴，兩種都好睇！
4.羊毛背心+連身裙+畫家帽
呢種style俾人一種好少女文青嘅感覺，大家如果想咁樣著嘅話記得揀兩件同色tone嘅衫，襯氣上嚟就會更加夾。戴埋頂畫家帽仲更加有仙氣添！
咁樣襯嘅時候可以揀返比較輕身嘅羊毛背心，咁樣就會更加顯瘦啦！
以上就係四款羊毛背心嘅穿搭法，唔知大家最鍾意邊款呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
