2020韓國拉麵
仲只係食緊辛辣麵？韓國近期熱門、特別款拉麵一次過話你知！下次嚟韓國你知點揀啦？
Hello，大家好，我哋係由韓國人每日提供最新韓國旅行資訊嘅Creatrip。
如果講到韓國拉麵，大家第一個又會諗到咩呢？10個人裡面大概有9個人應該都會話係「辛辣麵」。不過除咗辛辣麵之外，韓國拉麵種類可以話係五花八門，無時無刻都推出緊新商品。
今年推出嘅，每一款都好熱賣，冇幾款我哋仲可以幫大家代購！鍾意食拉麵嘅朋友，就唔好錯過啦！
2020韓國拉麵
1. 浣熊拉麵辣味版
原本韓國農心浣熊拉麵已經夠hit，不過韓國人覺得都係唔夠，而家推出新款。新款嘅辣度足足比原本辣三倍有多，鍾意食辣嘅大家又點可以錯過？
湯底係辣得嚟又帶有海鮮同海帶嘅鮮味。魚片除咗有可愛浣熊造型之外，麵都夠粗身，超有口感。
2. 青陽辣椒拉麵
三養集團真係創意無極限！2020年直接將青陽辣椒加入拉麵，仲一次過出咗三款口味，分別係青陽炸醬麵、青陽海鮮湯麵同青陽辣椒乾拌麵。只係諗都覺得一定超辣！不過大家又唔洗咁驚，佢嘅辣度比一般紅辣椒稍微冇咁辣，值得一試！
而家買麵仲送韓國復古碗，超有sense！用咗佢即刻有韓國feel，大家係咪都應該要買返個呢？
3. 妖怪拉麵
妖怪拉麵雖然出咗一段時間，但小編真心覺得呢款拉麵超特別。
乾麵（紅色包裝）味道超香，辣得嚟又好有韓國地道風味。
雙倍忌廉（白色包裝）完全就係carbonara感覺，超濃郁，呢款亦係小編最愛。
至於義式蜆肉（藍色包裝）就係蒜頭蜆肉味道，煮出嚟又係超香。
4. BB奶油辣醬撈麵
早排超hit嘅八道（PALDO）BB奶油辣醬撈麵，一上市就已經轟動全城。兩包調味料就好似化妝品咁，一包係奶油口味調味粉、一包係辣汁。一開始食，大家可能會俾奶油香氣吸引，不過食咗大約5秒之後，辣味後勁就會湧上嚟，絕對係帶嚟刺激層次口感。
5. 農心水冷麵/辣拌麵
炎炎夏日，大家係唔係都會好掛住韓國嘅水冷麵呢？其實呢類冷麵做法超方便簡單，煮熟之後加凍水沖洗，再倒啲冰同醬料一齊攪勻，就可以食到韓國至地道冷麵。農心一次出咗兩款水冷麵同乾拌冷麵，完全就係冷麵愛好者必買清單啊！
6. 泡菜刀削乾拌麵
呢款都係農心推出嘅夏季新款泡菜拌麵，佢唔係一般嘅撈麵款，佢係食落去口感會更加豐富同有口感嘅刀削麵。
7. 海鮮烏冬麵
對韓國有一定程度了解嘅朋友應該都知道白種元老師，呢款特別版海鮮麵，係白種元老師覺得依家年青人都唔太食健康食物，特別係海帶。
所以好多漁民，因為銷量不如預期而生活得好辛苦，所以白老師就打電話畀不倒翁社長，請佢喺麵中多放一片海帶，一嚟係希望可以令人食得更健康，二嚟係希望可以幫助漁民！
鍾意食海帶同烏冬麵嘅朋友，係唔係應該都要買返包嚟試下呢？
除咗以上幾款拉麵之外，小編仲想介紹「只睇外表完全唔知道係咁辣」嘅韓國拉麵。
相信大家都應該估到係可愛辣雞包裝啦！尤其係粉紅色卡邦尼辣雞，呢款係加咗拉麵同年糕綜合版本，完全就係辣得嚟又令人忍唔住要係咁食！
對唔食得辣嘅朋友嚟講，亦可以揀東源出嘅呢款芝士炒年糕、炸醬炒年糕系列。
以上係小編整理出最新2020年韓國拉麵熱門、特別款，唔知呢幾款拉麵口味，唔知大家又覺得點呢？
唔想再只係食辛辣麵，不如就試下轉以上幾款口味啦。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
