首爾最安全地區TOP10
首爾到底邊度最安全？最安全又代唔代表最好？
- 第10名 | 城東區(성동구)
- 第9名 | 廣津區(광진구)
- 第8名 | 麻浦區(마포구)
- 第7名 | 城北區(성북구)
- 第6名 | 江西區(강서구)
- 第5名 | 蘆原區(노원구)
- 第4名 | 恩平區(은평구)
- 第3名 | 江東區(강동구)
- 第2名 | 陽川區(양천구)
- 第1名 | 道峰區(도봉구)
- 其餘首爾地區安全排名
Hello，大家好，我哋係由韓國人每日提供最新韓國旅行資訊嘅Creatrip。
韓國每年都會公佈一個叫「社會安全指數」嘅指標，喺經濟活動、生活安全、健康保健同居住環境4個範疇對韓國各大城市/地區進行評價。分數越高，就代表嗰個地方相當適合居住！
不過對遊客嚟講，最重要嘅考量一定係安全，到底大家今次揀嗰間酒店身處嘅地區夠唔夠安全？今日就等小編幫大家整理最新2024韓國社會安全指數嘅「生活安全」分數排名啦！
首爾最安全地區TOP10
第10名 | 城東區(성동구)
- 分數：59.98
- 著名地點：聖水洞、首爾林、馬場洞畜產市場
近呢幾年最受歡迎嘅首爾地區之一嘅聖水洞就係位於城東區啦！城東區除咗安全，交通都非常發達，尤其係區內嘅往十里站同時有4條地鐵線（2號線、5號線、京義中央線、水仁盆唐線），仲有可以去到春川嘅京春線！
城東區吃喝玩樂攻略💡
🐂韓國必食韓牛餐廳推薦
😋聖水洞美食總整理
🛍️2024聖水必去餐廳/Cafe/購物地點推薦
🌲首爾林總整理
第9名 | 廣津區(광진구)
- 分數：60.35
- 著名地點：建大、纛島漢江公園、兒童大公園
聽到廣津區呢個名大家可能唔知喺邊，不過好多韓國大學生都會去嘅建大商圈就係位於呢度！不過都要提提大家，雖然廣津區嘅生活安全分數排名偏高，但係始終區內每個area都唔同，建議如果係自己一個/一班女仔嚟就要避開夜晚去建大酒吧區啦！
廣津區吃喝玩樂攻略💡
第8名 | 麻浦區(마포구)
- 分數：60.41
- 著名地點：弘大、延南洞、上岩DMC、天空公園
遊客們最熟悉嘅首爾地區之一一定唔少得麻浦區，而原來麻浦區嘅生活安全分數都躋身頭十！除咗大家每次嚟都必去嘅弘大同延南洞，秋天粉紅芒草勝地——天空公園同錄製音樂節目嘅攝影棚——上岩DMC都係位於麻浦區。加上麻浦區交通都夠方便，係唔少朋友們揀住宿首選之地！
麻浦區吃喝玩樂攻略💡
🚗仁川機場→弘大交通攻略
🍽️弘大美食總整理
🥓弘大早餐推薦總整理
🍝延南洞美食總整理
第7名 | 城北區(성북구)
- 分數：60.44
- 著名地點：高麗大學、誠信女大
城北區距離首爾市中心有一段距離，喺韓國留學/工作嘅朋友們應該會對呢區比較有印象，遊客們可能最多去過高麗大學校區參觀，或者去過誠信女大個商圈行街。可能因為城北區有唔少高等學府，亦都有唔少豪宅，所以相對地會比較安全同靜！
第6名 | 江西區(강서구)
- 分數：61.07
- 著名地點：金浦機場、麻谷、首爾植物園
江西區亦都係一個遊客比較少去嘅地方，除咗因為呢邊不斷進行緊開發，喺麻谷亦都有個大型商業園區（LG科技園就係喺呢度），更加因為香港冇直接飛去金浦國際機場嘅航班，所以相信大家都會覺得比較陌生。
第5名 | 蘆原區(노원구)
- 分數：62.03
- 著名地點：無...
蘆原區之前曾經經過大規模開發，所以比起其他首爾地區，呢邊相對上有比較多公寓屋苑、小學同中學。比較值得一提嘅係蘆原區居民當中外國人嘅比例係首爾咁多地區當中最低，證明真係得韓國人會去呢度住...？
第4名 | 恩平區(은평구)
- 分數：63.22
- 著名地點：恩平韓屋村、北漢山城
恩平區同樣位於距離首爾市中心比較遠嘅地方，隔離就係高陽市。不過正正因為咁，呢度嘅氛圍更加寧靜舒服，如果大家唔想日日都人逼人，推薦可以搵日去恩平韓屋村踩單車、影靚相同去韓屋Cafe，享受返寫意嘅一日。
恩平區吃喝玩樂攻略💡
🌺恩平韓屋村介紹
☕Starbucks THE 北漢山實地探訪
第3名 | 江東區(강동구)
- 分數：64.10
- 著名地點：廣渡口漢江公園、姜草漫畫街
Visit Seoul
計劃會發展成一個可持續發展&環境友善地區嘅江東區，比起其他地區多好多公園，就算係屋苑附近都有唔少後花園同山坡。雖然江東區同商業活動蓬勃嘅江南區好近，不過成個感覺都非常唔同，而且相對上流動人口比較少，所以生活安全分數亦都相對比較高。
第2名 | 陽川區(양천구)
- 分數：66.60
- 著名地點：SBS電視台本部大樓、木洞、首爾南部出入境管理局(?)
陽川區講真唔係個個都去過（小編自己都冇去過...），不過原來SBS本部大樓係喺呢區！而住喺首爾南部嘅朋友們可能就會比較經常去出入境搞visa同外國人登錄證XD
第1名 | 道峰區(도봉구)
- 分數：66.73
- 著名地點：雙門洞
내 손 안에 서울
唔知大家有冇睇過《大力女都奉順》呢？呢套韓劇入面嘅背景就係道峰區！雖然劇中道峰區好似係一個好危險嘅地區咁，成日都發生罪案，不過其實佢係首爾入面最安全嘅地區！《請回答1988》嘅雙門洞都係屬於道峰區，不過大家見小編淨係用韓劇嚟介紹，都應該大概feel到呢度其實冇咩好玩...
其餘首爾地區安全排名
第11名 (58.28分) | 九老區 (구로구) |
第12名 (57.79分) | 銅雀區 (동작구) |
第13名 (56.64分) | 中區 (중구) |
第14名 (56.61分) | 瑞草區 (서초구) |
第15名 (56.58分) | 江北區 (강북구) |
第16名 (55.97分) | 松坡區 (송파구) |
第17名 (54.22分) | 冠岳區 (관악구) |
第18名 (53.64分) | 永登浦區 (영등포구) |
第19名 (53.35分) | 龍山區 (용산구) |
第20名 (53.19分) | 西大門區 (서대문구) |
第21名 (53.17分) | 鐘路區 (종로구) |
第22名 (52.14分) | 中浪區 (중랑구) |
第23名 (52.10分) | 東大門區 (동대문구) |
第24名 (49.56分) | 衿川區 (금천구) |
第25名 (47.60分) | 江南區 (강남구) |
以上排名只係代表嗰個地區嘅安全排名，揀酒店嘅時候當然要考慮埋地理位置、交通等等嘅因素！大家都可以睇到排名越高嘅地區通常都係人口流動比較少嘅地方，不過都希望今日呢篇blog可以幫到揀緊住宿，甚至係準備讀語學堂/喺韓國做嘢又搵緊屋嘅你！
行程突然有變都可以免費取消👍🏻
如果有更多想知嘅內容，都可以隨時留言或者dm話俾我哋知：）
Mail：help@creatrip.com
