聖水洞/建大美食總整理
14間私藏聖水洞/建大美食！中式、西式、韓式等通通都有！
Hello，大家好，我哋係由韓國人每日提供最新韓國旅行資訊嘅Creatrip。
唔知大家平時嚟韓國旅行，多唔多去聖水洞同建大嗰一邊呢？今日小編整理好一篇美食清單，因為嗰度好多大學生，價格都相對平，如果你想去韓國年輕人都鍾意去嘅地方，咁就一定唔可以錯過啦！
聖水洞&首爾林美食總整理
1. 奶奶的食譜（할머니의 레시피）
- 地址：서울 성동구 서울숲2길 44-12
- 營業時間：11:30 - 21:30（Break Time 15:40 - 17:00；Last Order 15:00、20:30）、逢星期二休息
呢一間「奶奶的食譜」雖然睇落好樸素，但係味道真係超乎想象！食譜係由奶奶傳俾媽媽、再傳俾個仔同埋新抱，完整重現傳統家庭式料理味道。
韓式料理特徵就係又鹹又辣，但「奶奶的食譜」無論係主食定食小菜都相對地清淡，可以食到食物本身味道。如果想食得健康啲，唔少人都會嚟呢度。
「奶奶的食譜」咁多款料理之中，用大骨熬煮12小時嘅辣牛腿湯最受歡迎，令人一試難忘！而其他同小菜都係簡單又好味，令人有種返咗鄉下嘅溫暖感。
2. 大成肋排（대성갈비）
- 地址：서울 성동구 서울숲4길 27
- 營業時間：12:00 - 21:00（Break Time 14:30 - 16:30；最後就座時間 19:30）、逢星期日休息
80年代前後，聖水洞有好多間工廠，聚集好多工人餐廳，其中呢間「大成肋排」已經開咗20幾年，係屹立不倒嘅在地人氣餐廳，只睇裝修已經可以feel到好有舊時代嘅氣氛，內部好闊落、座位多，啊需要擔心冇位坐。
「大成肋排」CP值好高，肉質新鮮，醃過之後更加開胃，食起嚟甜中帶辣，令人意猶未盡。呢種用炭火燒嘅豬排，配埋生菜同小菜一齊食，真係超滿足！
3. 祖傳三代馬鈴薯排骨湯（소문난 성수 감자탕）
- 地址：서울 성동구 연무장길 45
- 營業時間：24小時
SBS《白種元的三大天王》節目都有介紹嘅聖水洞「祖傳三代馬鈴薯排骨湯」，有三個Size俾大家揀，就算一個人嚟食都冇問題。
馬鈴薯排骨湯一人份（감자국 식사 일반）₩10,000
馬鈴薯排骨湯用豬骨熬煮而成，食落辣辣地好惹味！如果兩人以上去，小編建議叫小鍋（₩27,000）就夠，因為份量好多，叫中size都未必食得哂。大家記住最後一定要叫多份即食麵，或者加個炒飯啊！
4. Gogong（고공）
- 地址：서울 성동구 왕십리로8길 10
- 營業時間：星期一至五 16:00 - 23:00 （Last Order 22:00）、星期六至日 16:00 - 22:00（Last Order 21:00）
只睇外觀可能會以為係一間Cafe或工作室，但一入到去就會被驚艷到！
因為入面係一間燒肉店！價格雖然偏貴，但佢哋堅持唔用冷凍肉，加上工作人員會直接喺座位隔離切肉，令人食得好安心，甚至佢哋仲會幫大家燒，唔需要自己落手！
5. Maple Top Pancake Club（메이플탑 팬케이크클럽）
- 地址：서울 성동구 성수이로14길 14 2F
- 營業時間：星期一至五 10:00 - 19:00、星期六至日 09:00 - 19:00（Last Order 18:30）
聖水站附近有一個新興景點叫做「聖水聯邦」，係一個複合文化空間，除咗有展覽之外，仲有好多美食聚集喺呢度，由西式到正統韓式料理都有，而小編呢次就去咗食美國南方早午餐「Maple Top」。
想食返餐豐富嘅早午餐，可以叫一份Egg Benedict配手撕豬肉加上燒烤醬！如果另外加₩20,000，仲可以享有2小時酒類無限飲，酒鬼們記住唔好錯過啦！
6. 聖水閣樓（성수다락）
- 地址：서울특별시 성동구 뚝섬로9길 20 2F
- 營業時間：11:30 - 21:00（Break Time 15:00 - 16:30 / Last Order 14:30、20:30）
「聖水閣樓」係一間西餐廳，呢度嘅入口超特別，大家嚟到會見到有三度門！唔好以為嗰度啡色大門係入口啊，其實中間白色嗰度細門先係真正嘅餐廳入口XD
呢度嘅招牌Menu係「閣樓蛋包飯」（₩15,000）同「香辣忌廉意粉」（₩17,000），兩款都好啱相機食先，味道都非常唔錯，唔怪得咁多韓仔韓妹會喺度打卡！
7. HDD Pizza（HDD피자）
- 地址：서울 성동구 성수이로7길 46
- 營業時間：12:00 - 22:00
藏身喺聖水站附近嘅一條小巷，會發現呢一間細細地又有美式風格嘅Pizza舖頭，座位唔算多，所以小編都趁住唔係熱門嘅時候去。
半半Pizza（₩20,000）可以食到兩款口味，小編叫咗基本款義大利臘腸，以及帶有獨特香氣嘅松露，兩款都好入味，餅皮好有口感！
8. Meal°（밀도）
- 地址：서울 성동구 왕십리로 96
- 營業時間：11:00 - 21:30
Meal°可以話係聖水洞最受歡迎嘅麵包舖！呢度冇得堂食，不過成日都會見到有人排隊。
매일경제
呢度最出名嘅係方包，睇落好似平平無奇，但真係超軟熟，好多人都話會食過返尋味！
9. ZESTY SALOON漢堡（제스티살룬 성수）
- 地址：서울 성동구 서울숲2길 19 2F
- 營業時間：11:30 - 21:00（Last Order 20:30）
如果唔係好想食韓式料理，咁不如就嚟食西式漢堡啦！呢度嘅食譜係自家製，吸引唔少人去幫襯。
Chipotle chilli burger ₩9,800
Wasabi shrimp burger ₩10,800
小編叫咗兩款招牌漢堡，分別係Chipotle Chilli同Wasabi shrimp burger，兩個味道都好唔錯，而且多汁，食完好有飽肚同滿足感。
10. 擔擔麵工房 首爾林店（탄탄면공방 서울숲점）
- 地址：서울 성동구 왕십리로 50 2F
- 營業時間：11:00 - 21:00（Last Order 20:30）
「擔擔麵工房」係韓國重新詮釋中華料理知名連鎖店，湯底熬足72小時，加咗啲辣味，完全符合哂韓國人胃口。
擔擔麵工房（首爾林店）喺聖水洞Megabox電影院大樓2樓，喺度睇完戲，肚餓可以去試吓！只要係我哋會員，叫一人套餐仲可以有免費餃子食添！
建大美食總整理
1. 荒謬的生肉 建大店（엉터리생고기 건대역점）
- 地址：서울 광진구 아차산로 218 2F
- 營業時間：11:00 - 00:00
好多大學附近都會有燒肉放題餐廳，建大都唔例外！「荒謬的生肉」係一間燒肉放題連鎖店，五花肉同埋大醬湯都係無限任食，自認大食嘅你記住要去食返餐啦！
2. 生氣的黃牛烤腸 建大本店（뿔난황소곱창 건대본점）
- 地址：서울 광진구 아차산로29길 16
- 營業時間：星期日至四 16:00 - 01:00、星期五至六 16:00 - 02:00
韓牛烤腸1人份250g（한우 소곱창 1인분 250g）₩21,000
除咗燒肉之外，好多人嚟到都會想試食烤腸。如果問小編有咩好推薦，小編覺得大家可以去食「生氣的黃牛烤腸」！呢間舖頭有好多間分店，而總店就正正位於建大，好受歡迎。呢度嘅韓牛烤腸夠曬香口，而且口感唔會話太韌，真係好正！
3. 火腸熱肉（불막열삼）
- 地址：서울 광진구 아차산로33길 24
- 營業時間：16:00 - 01:00（逢星期日休息）
如果想一次過食到燒肉同埋烤腸，咁可以去呢一間「火腸熱肉」，舖頭內部好乾淨，擺設都井井有條，評價都幾高！
大腸頭1人份150g（막창 1인분 150g）₩10,900
跟餐會送各種小菜、生菜、韓式蒸蛋，相當豐富！
4. 半天妖烤魚（반티엔야오 카오위 건대점）
- 地址：서울 광진구 동일로20길 106 2F
- 營業時間：11:00 - 22:00（Last Order 21:00）
如果想喺韓國食到最正宗中式料理，小編推薦「半天妖烤魚」，以獨特醬汁熬煮，係韓國少見專門烤魚料理餐廳。
呢度有麻辣、清花椒等口味，如果覺得唔夠，仲可以加其他配料。
之後去開聖水洞、首爾林同建大一帶，不妨就試吓小編推薦嘅14間美食啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
