弘大美食總整理
2024最新弘大美食整理！每日食都食唔完嘅人氣餐廳，嚟弘大前必讀攻略！
- 弘大貓頭鷹（홍대씨부엉）
- 夏威夷烤貝殼（하와이조개 홍대점）
- 申美京弘大炒辣雞（신미경홍대닭갈비）
- 飽肚烤腸（배떼기곱창 홍대점）
- 給豚的男人（돈주는남자）
- HONKAZ 弘大店（혼가츠）
- 二代祖薯仔排骨湯（이대조 뼈다귀）
- 翁多來燉雞（옹다래찜닭）
- 荒謬的生肉 弘大店（엉터리생고기 홍대점）
- 弘大風川鰻魚（풍천장어）
- HONGOJIB（혼고집）
- 江南豬肉商會 弘大店（강남 돼지상회 홍대점）
- 橋村炸雞 弘大店（교촌치킨 홍대점）
- 兔子停（토끼정 홍대점）
- 牛雅（우아하게）
- 豬腳小姐 弘大總店（미쓰족발 홍대본점）
- Amazing Nongkhai（어메이징 농카이）
- 弘's小章魚（홍스쭈꾸미 홍대본점）
- 弘益醬蟹（홍익게장）
Hello，大家好，我哋係由韓國人每日提供最新韓國旅行資訊嘅Creatrip。
無論係遊客定係韓國人，都好鍾意去充滿年輕氣息嘅弘大玩！小編相信大家嚟韓國玩，都一定會將弘大放入行程入面。但係呢度實在有太多舖頭，有時候一時之間唔知道有咩好食，今日小編就整理咗最新2023版本嘅弘大餐廳攻略，之後大家嚟弘大玩可以參考吓！
2024弘大美食總整理
弘大貓頭鷹（홍대씨부엉）
- 地址：서울 마포구 서교동 358-39
- 營業時間：11:00 - 00:00
「弘大貓頭鷹」係一間專門食炒年糕嘅餐廳，雖然地方唔大，但非常乾淨企理。鋪頭入面仲有賣弘大學生創作嘅藝術作品，賣出之後得到嘅收益會俾返學生們，大家有興趣可以支持吓佢哋。
海鮮炒年糕（씨볶이）2人份
呢度嘅招牌菜係「海鮮炒年糕」 ，辣炒年糕上面擺滿曬八爪魚、扇貝、青口，仲有各式各樣嘅炸物同麵，睇到呢個賣相都覺得震撼，嚟到大家應該都會相機食先！
夏威夷烤貝殼（하와이조개 홍대점）
- 地址：서울 마포구 와우산로21길 19-8 B1F
- 營業時間：12:00 - 00:00
有冇朋友嚟韓國玩都鍾意去食燒貝殼呢！夏威夷風嘅裝修配上韓式燒貝殼超特別，而且因為餐點份量都好大+高質，所以好受韓國年輕人歡迎！
小編覺得呢度其中一個最大優點係唔需要開瓶費，而且仲有免費即食麵，大家可以盡情飲飽食醉！
申美京弘大炒辣雞（신미경홍대닭갈비）
- 地址：서울 마포구 서교동 364-22
- 營業時間：11:00 - 22:40（Last Order 21:50）
「申美京弘大炒辣雞」雖然位置唔顯眼，但好多人嚟到弘大都會專程嚟呢度食炒辣雞！鋪頭內部非常大，亦都有提供各種語言嘅Menu，唔需要擔心睇唔明或者唔識叫嘢食。
芝士蔬菜炒辣雞（치즈퐁듀 야채닭갈비）
小編最推薦嘅係「芝士蔬菜炒辣雞」，辣炒雞肉配上芝士，香口得嚟可以中和到辣度，食到差唔多叫多份炒飯就唔怕食唔飽啦！食唔到辣嘅朋友們都唔洗驚，呢度可以調整餐點嘅辣度㗎~
飽肚烤腸（배떼기곱창 홍대점）
- 地址：서울 마포구 양화로18안길 26-6
- 營業時間：15:00 - 00:00（Last Order 23:30）、逢星期二休息
「飽肚烤腸」係弘大其中一間非常出名嘅烤腸店，曾經有好多電視台都嚟訪問過。呢度裝修得非常local，亦都有種復古嘅感覺。
雪花烤腸2人份（눈꽃막창(2인)）
呢間餐廳最出名嘅就係呢個「雪花烤腸」啦！搽滿香辣醬汁嘅烤腸上面堆滿好似一座雪山咁多嘅芝士，簡直係天衣無縫嘅組合。因為芝士會中和返啲辣味，所以就算唔太食得辣都唔洗太擔心啊！
給豚的男人（돈주는남자）
- 地址：서울 마포구 잔다리로6길 34-9
- 營業時間：星期一至五 13:00 - 23:00（Break Time 15:00 -17:00、Last Order 22:00）；星期六及日 13:00 - 23:00（Break Time 15:00 - 16:00、Last Order 22:00）
「給豚的男人」喺條巷仔入面，雖然外觀睇落其貌不揚，但係佢喺弘大連續八年攞第一！
呢度嘅烤盤係用鐵煲蓋，而且會先喺外面用炭火燒熟豬肉外皮，咁做可以鎖住肉汁之餘仲會多一陣碳香！食嘅時候推薦大家可以點中間嘅特製麻藥醬汁，甜甜辣辣好惹味！而家外國人都終於可以喺網上預約啦！
HONKAZ 弘大店（혼가츠）
- 地址：서울 마포구 와우산로21길 36-6
- 營業時間：11:30 - 22:00
呢間專賣炸豬扒嘅「HONKAZ」曾經上過韓國美食節目《白種元的三大天王》，非常受當地人歡迎。鋪頭空間算大，都可以容納到唔少人，而且牆上面嘅塗鴉令呢度嘅睇落都幾趣緻。
王炸豬扒（왕돈까스） / 芝士炸豬扒（치즈돈까스）
韓式炸豬扒同日式炸豬扒有少少唔同，好似左邊呢款「王炸豬扒」咁，上面會淋上甜甜地嘅醬汁，份量仲非常大添！鍾意食炸豬扒嘅朋友不妨嚟試吓~
二代祖薯仔排骨湯（이대조 뼈다귀）
- 地址：서울 마포구 동교로 196
- 營業時間：10:00 - 23:00
二代祖薯仔排骨湯係弘大最受歡迎嘅薯仔排骨湯餐廳之一，相信好多人都有食過！雖然佢而家轉咗做唔係24小時營業，但係嘢食味道同水準依然冇變！
薯仔排骨湯（小）（감자탕 소）
排骨肉燉得非常軟熟，而且湯底夠惹味，食到咁上下想加肉、炒飯或者麵都得！如果係自己一個人去，都可以去食一人石鍋版！
有見到想去嘅餐廳？🤤
翁多來燉雞（옹다래찜닭）
- 地址：서울 마포구 양화로 122
- 營業時間：星期一至六 11:00 - 23:00、 星期日 11:00 - 22:00
「翁多來燉雞」位於弘大入口站9號出口附近，喺弘大超出名，價錢平得嚟份量又夠多，CP值好高。
翁多來燉雞S（옹다래찜닭S）
雞肉完全唔會腥，而且非常滑，加埋惹味醬汁，真係令人停唔到口。食完雞之後仲可以用剩底嘅醬汁撈飯食，食完超滿足。
荒謬的生肉 弘大店（엉터리생고기 홍대점）
- 地址：서울 마포구 어울마당로 118 2F
- 營業時間：11:00 - 23:00
講起韓國燒肉，相信大家應該都會諗起主打韓燒任食放題嘅「荒謬的生肉」，唔單止係遊客，連韓國人都非常鍾意嚟呢度！呢間燒肉鋪賣嘅全部都係新鮮豬肉，即叫即切，食落都安心啲。
小編認為呢度係弘大燒肉鋪之中品質最穩定嘅店鋪，而且無論係五花肉定梅頭豬，或者係大醬湯同小菜，全部都可以任食 ，食肉獸們真係唔可以錯過！
韓燒任食放題（1人）
不過因為呢度真係太受歡迎，大家要做好心理準備午餐同晚餐時段都一定要等位，記住預多少少時間啦！Download埋我哋嘅coupon仲可以享有全單95折優惠！
弘大風川鰻魚（풍천장어）
- 地址：서울 마포구 동교로27길 39
- 營業時間：11:30 - 22:20（Break Time 15:00 - 16:30、Last Order 21:30）
小編當日係平日中午時間去，開門冇幾耐就已經有好多客人，一樓更加已經坐滿曬！一入到就已經聞到超香碳烤味，令小編好期待！
職員會幫大家燒，仲會燒埋蒜頭俾大家可以配住一齊食。呢度嘅鰻魚口感同小編之前食過嘅唔太一樣，比起滑嫩嘅魚肉，呢度嘅鰻魚偏彈牙，而且味道都好惹味！
HONGOJIB（혼고집）
- 地址：서울 마포구 동교로30길 1 1층 혼고집
- 營業時間：11:30 - 22:00（Break Time 15:30 - 17:00、Last Order 21:30）
大家有冇諗過自己一個人都可以去食燒肉呢？弘大HONGOJIB係一間一人燒肉店，每人有一個一個獨立火爐可以慢慢食！
除咗燒肉仲有Shabu-shabu，份量啱啱好，自己一個人嚟旅行又想食韓式燒肉嘅話推薦大家嚟呢度！
自己一個去旅行都想食盡好西？
江南豬肉商會 弘大店（강남 돼지상회 홍대점）
- 地址：서울 마포구 서교동 355-28
- 營業時間：11:30 - 00:00
唔知道大家有冇聽過「江南豬肉商會」呢間燒肉鋪呢？餐廳內部非常乾淨，不過油煙味會有少少重，介意嘅朋友們要注意啦。
Set B（1人）
呢度最特別嘅地方係除咗燒肉，仲有炸雞任食！上圖呢個Set B 就係可以無限任食烤肉同炸雞嘅Set啦，唔知道食咩好嘅時候叫呢個一定冇錯。另外仲有普通燒肉任食嘅Set A同其他各種唔同配搭嘅Menu任君選擇。而燒肉放題嘅部位就包括冷凍五花肉、豬頸肉、豬皮同肥牛，一定有一種啱你口味。
橋村炸雞 弘大店（교촌치킨 홍대점）
- 地址：서울 마포구 서교동 371-3
- 營業時間：12:00 - 02:00
相信有關注韓國，或者有嚟過韓國玩嘅朋友們應該都會聽過，甚至食過「橋村炸雞」。弘大呢間分店空間非常大，仲有露台位，天氣好嘅時候大家不妨可以去呢度食炸雞。
橋村Combo（교촌콤보）
呢度最受歡迎嘅就係「橋村Combo」同「橋村蜂蜜炸雞Combo」，平時食炸雞通常都會係一隻雞所有部位都有齊，不過橋村炸雞有提供Combo（雞翼+雞鎚）呢個選項，每嚿都嫩滑多汁，唔鍾意食雞胸肉嘅朋友記住要叫Combo啦。
兔子停（토끼정 홍대점）
- 地址：서울 마포구 잔다리로2길 13
- 營業時間：11:30 - 22:00
「兔子停」係一間結合日韓風格嘅連鎖餐廳，而弘大呢間分店就有三層，裝修好靚，仲有落地玻璃，啱曬鍾意影相打卡嘅朋友們。
意粉兔子飯桌（파스타 토끼밥상）
忌廉咖哩烏冬（토끼정 크림 카레 우동）
忌廉咖哩烏冬係呢度最受歡迎嘅Menu，小編次次去都見到每枱最少會有一碗。另外呢度仲有好多非常適合相機食先嘅Menu，唔止睇得，仲好好食添啊！撳埋下面個掣，download優惠券，就會得到9折優惠啦！
牛雅（우아하게）
- 地址：서울 마포구 동교로 185
- 營業時間：11:30 - 22:00（Break Time 15:00 - 16:30、Last Order 21:30）
- Creatrip獨家優惠：點餐即送布利芝士/墨西哥薄餅/飲品（擇一）
牛雅主打用100%純牛肉炮製而成嘅韓式漢堡扒，仲有各款燒肉同海鮮。因為有定食，所以就算係自己一個人去都冇問題！
而且因為會即場喺你面前用炭火燒，有得影又有得食XD
豬腳小姐 弘大總店（미쓰족발 홍대본점）
- 地址：서울 마포구 어울마당로 123-1
- 營業時間：星期一及二 16:00 - 00:00 星期三至日 12:30 - 00:00
有嚟過弘大嘅朋友們，相信都曾經路過，甚至去過「豬腳小姐」。呢間餐廳位於弘大主街，非常容易搵到。
蒜味豬腳 (中)（마늘족발(중)）
小編之前去嗰陣就叫咗一份中size嘅蒜味豬腳，份量非常多，唔好睇佢上面好似好多醬，好似會好鹹咁，其實呢個蒜蓉醬甜甜地，辟到肉腥味之餘仲非常惹味！不過食到最後唔多唔少都會有啲膩，建議3個人share食就啱啱好~
Amazing Nongkhai（어메이징 농카이）
- 地址：서울 마포구 동교로 156-11
- 營業時間：11:00 - 20:30（Break Time: 15:20 - 17:00、Last Order 19:45）
講起弘大嘅泰國菜，一定唔少得「Amazing Nongkhai」，呢度有好多其他地方食唔到嘅特色泰國料理，而且好多明星都有嚟過，例如GOT7有謙同Bam Bam、仲有韓國著名廚師洪錫天都有到訪過，可想而知由幾好食啦！鋪頭入面仲佈置到令人覺得瞬間去咗曼谷咁，非常有異國風情。
小編上次去叫咗4個主菜，仲食埋甜品，全部都非常地道，連泰國同事都有認證，鍾意食泰國料理嘅朋友們絕對唔可以錯過！Download埋我哋張Coupon，二人同行就會即送一杯泰式奶茶或者凍牛奶！
弘's小章魚（홍스쭈꾸미 홍대본점）
- 地址：서울 마포구 어울마당로 146
- 營業時間：11:30 - 23:00
「弘's小章魚」鋪頭門面睇落好似平平無奇，可能平時行過都唔會發現到，不過其實呢度真係好受歡迎。成間鋪總共有3層高，小編去嘅時候，1樓同2樓已經坐滿曬添啊！
小編叫咗呢度最受歡迎嘅五花肉辣炒章魚，見到都流曬口水。食到差唔多，店員仲會幫大家炒個蟹籽炒飯，真係好好食（價錢入面包埋㗎！）。不過美中不足嘅係同價錢相比，份量唔算多，性價比唔太高，但鍾意食辣炒章魚嘅朋友不妨可以去試吓。
弘益醬蟹（홍익게장）
- 地址：서울 마포구 성산동 232-12
- 營業時間：11:30 - 21:30（Break Time 15:50 - 17:00）
講起韓國特色美食，當然唔少得醬油蟹啦！而位於弘大嘅「弘益醬蟹」係一間非常出名嘅醬油蟹任食放題餐廳，入面有分一般坐席跟地席，小編去嘅時候係坐地席嘅，非常有傳統嘅感覺。
醬油蟹、醬油蝦任食放題（1人）
其實小編一開始都唔夠膽食醬油蟹，但喺呢度食過一次之後，真係令人非常難忘。特別適逢秋冬天係蟹當造嘅季節，蟹肉非常鮮甜。呢個價可以食到高質嘅海鮮放題，真係好抵！
以上就係小編整理出嘅2024最新弘大美食攻略，嚟到弘大唔知食咩好嘅話不妨可以參考吓~ 亦都歡迎大家留言話俾小編知你最鍾意邊間弘大餐廳！
如果有更多想知嘅內容，都可以隨時dm話俾我哋知：）
Instagram：creatrip.hk