弘大「PLATTE」介紹（2022.3月結業）
全日不停播住iKON嘅歌仲要有齊佢哋出道以嚟所有專輯？iKONIC絕對唔可以錯過嘅弘大cafe！
Hello，大家好，我哋係由韓國人每日提供最新韓國旅行資訊嘅Creatrip。
作為iKON粉絲絕對唔可以錯過嘅地方，就係iKON大哥振煥家姐開嘅cafe—PLATTE啦！喺弘大行攰咗，或者想enjoy吓iKON嘅音樂嘅朋友，都不妨可以去吓呢間位於弘大嘅cafe！今日就等小編同大家介紹吓啦！
iKON振煥家姐開嘅Cafe
- 店名：PLATTE
- Instagram: kim_seiyeon_
- 地址：서울 마포구 성미산로 105
- 營業時間：星期一至六11:00-21:00, 星期日11:00-19:00
- 小Tips：弘大入口站2號出口行15分鐘，或者喺2號出口搭麻浦6號巴士再喺景城初高中，弘益設計高中站（경성중고,홍익디자인고）落車
PLATTE位於弘大，大家可以搭地鐵去到弘大入口站，2號出口出嚟，行過去係大約15分鐘左右，唔想行嘅亦都可以喺2號出口附近搭巴士去cafe。間cafe一啲都唔難搵，去到門口仲有隻狗會出嚟迎接你添!
Instagram @kim_seiyeon_
呢間cafe由振煥家姐開，好彩嘅話仲會遇到佢家姐添，iKONIC絕對唔可以錯過。
Cafe嘅空間好大，而且有好多座位。小編當日搭正開鋪時間去就已經有好多人，不過好彩多數人都係外賣拎走。Cafe入面嘅設計好簡潔而且都好光猛，就算想喺度做嘢或睇書都冇問題。
行入少少就會見到counter可以落單，呢度嘅招牌係多士，包括係咖椰多士同士多啤梨果醬多士。
喺counter亦可以見到飲品嘅menu，如果唔知道應該點啲咩飲，亦都可以參考隔離打咗紅色星星嘅飲品，係最受歡迎飲品嘅意思。呢度仲有提供wifi，好適合啲鐘意喺cafe做嘢或睇書嘅人。
如果係鐘意飲茶嘅朋友，呢度亦都有超過10種茶類飲品，點都會一款啱你！小編去當日咁啱就係振煥家姐幫小編落單，佢好得意而且好親切，仲推薦咗menu俾小編添！
Cafe入面嘅一面牆上有振煥兩姐弟嘅相做裝飾，仲貼住振煥家姐，佢嘅寵物狗同代表iKON嘅Krunk熊嘅畫作。寵物狗叫做Givangchy（지방이），係隻好得意嘅哥基，不過就算幾得意都唔好亂咁摸佢啊，唔係會好易嚇親佢。
Cafe嘅另一邊亦有一個corner擺放咗玻璃杯同蠟燭等等嘅產品，等客人可以買嚟留為紀念。
除咗唔同嘅畫作，仲有一個振煥嘅生日蛋糕添！背景係好多振煥家鄉濟州島嘅名產—柑橘。
而呢個區域就展放咗iKON出道以嚟發行過嘅專輯啦！
除咗iKON嘅專輯，呢邊亦都有振煥兩姐弟嘅畫作同明信片，呢啲明信片係免費可以攞番屋企做紀念㗎！
喺cafe四圍參觀咗一陣，小編點嘅飲品同食物都準備好啦，當日小編點咗PLATTE嘅招牌咖椰多士、好受歡迎嘅土多啤梨乳酪沙冰同綠茶星冰樂。
咖椰多士 (₩4,000)
咖椰多士係好多地方都食到而且做法冇咩難度，但呢度嘅咖椰多士比起其他地方更特別嘅係加咗芝士同牛油。本身小編都有諗過呢幾樣嘢會唔會唔夾，但食落發現咖椰醬嘅甜同芝士嘅微鹹互相融合，食落唔會太甜之餘，牛油更加令口感更豐富，同時都令麵包更香，方包亦都烤得啱啱好，整體嚟講真係好好食。食完即刻明白咖椰多士點解會係呢度嘅招牌。
士多啤梨乳酪沙冰 (₩5,000)
之後要介紹嘅飲品就係呢個份量好足嘅沙冰，唔會太甜之餘，士多啤梨同乳酪嘅比例亦都好平衡！
綠茶星冰樂 (₩5,000)
呢杯嘅綠茶味真係好香，只不過就有啲甜，鐘意飲甜嘢嘅朋友應該會好鐘意！但呢到嘅飲品真係好大杯又足料，仲要唔算太貴添！
小編可以保證只要係iKONIC都一定會鐘意呢間cafe，除咗佢係成員家人開嘅鋪頭之外，仲要係咁播住iKON嘅歌添！而且cafe入面嘅專輯仲可以任意攞嚟影相㗎，當然影完要放番原位啦！
當然仲有鎮店之寶Givangchy啦！不過要記得唔好太騷擾到佢啊，因為振煥家姐會隨時睇住㗎哈哈。
PLATTE嘅廁所位於二樓，通過呢啲門上去就可以見到，不過要記住個密碼先好去啊。
對於iKON嘅回歸或者成員嘅生日，cafe入面都會搞唔同嘅活動慶祝，就例如最近嘅《Why Why Why》活動嘅時候，cafe所有飲品都只係賣￦3,000咋！
想知道cafe進行中嘅活動，所有人都可以透過門口出面嘅告事板知道詳情。小編去嘅當日，多士加美式咖啡嘅套餐只係賣￦5,500，而且所有外賣飲品都比堂食平￦1,000添！
以上就係對於cafe PLATTE嘅介紹啦，想嚟朝聖嘅iKONIC記得mark低佢啦！
遲啲有機會嚟韓國嘅iKONIC記得去呢間位於弘大嘅cafe PLATTE去探吓振煥家姐同Givangchy啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
