Hello，大家好，我哋係由韓國人每日提供最新韓國旅行資訊嘅Creatrip。
Board game係受各年齡層同各性別歡迎，大家都鐘意嘅遊戲之一。韓國都由以前開始，就有好多唔同嘅board game，所以今日小編就同大家整合咗7個受韓國人喜愛嘅board game，一齊嚟睇下自己有玩過幾多款啦！
男女老少都鐘意嘅Board Game
1. 할리갈리 (Halli Galli)
呢個係一個由德國製造嘅遊戲，好多韓國人都由細開始就玩。只要湊夠2個人就開始玩得，最多可以6個人一齊玩，遊戲規則都好簡單： 只要出現5個相同嘅生果嘅時候撳鐘就得！因為咁呢個遊戲不論男女老少所有人都鍾意玩。
2. 루미큐브 (Rummikub)
Rummikub係由第二次世界大戰開始最暢銷，同樣係最經典嘅board game之一。2-4個就可以玩（有啲最多可以去到6個人玩），可以通過唔同方式同數字組合嚟清空手上嘅牌，最快清空哂啲牌嘅人就喺贏家。呢個係一款相對上需要專注力同思考能力嘅board game，但因為只要學識數字嘅概念就玩得，所以亦係一個好多韓國人由細玩到大嘅遊戲。
3. BANG!
呢個係可以同好多人一齊大叫'Bang'，好有氣氛嘅遊戲，呢個亦係令佢人氣好高嘅原因之一。最少4個人，最多甚至可以7個人一齊玩，遊戲方式可以話係Killer（狼人殺）嘅board game版，需要用心理戰去打敗敵人之餘，又唔可以露出馬腳俾對方捉到。因為咁呢個遊戲或者會比其他board game更難少少，係一個成年人都可以玩得好開心好投入嘅遊戲。
4. 부루마불 (Blue Marble)
Blue Marble係一個只要係韓國人都會識，普遍程度甚至可以稱之為國民board game! 聽閒佢係一個參考外國本身就存在嘅遊戲system，再將佢改編成韓國版嘅遊戲。玩家人數2至4個人，規則係通過世界旅行，喺各國城市起樓，再用收到嘅通行費用嚟賺錢嘅遊戲。遊戲形式同變咗手機遊戲app嘅「大家嘅marble (모두의 마블)」好相似，同香港人成日玩嘅大富翁差唔多。
5. 보난자 (Bohnanza)
Bohnanza係一款以農村為主題嘅德國board game，通過種植唔同嘅豆類嚟進行以物易物交易，再用儲埋一定數量嘅豆嚟換取金錢，最後最多錢嗰個為贏家。最多玩家人數可以到7個人，係一個玩家越多，再越可以玩得更開心嘅遊戲。
6. 다빈치코드 (Davinci Code)
呢個係一個由兩個人到四個人都可以玩嘅推理遊戲，喺唔會見到對方牌上數字嘅情況下，需要用推理去估個數字係咩，同時會有兩隻「百搭」去混亂大家，所以玩呢個game嘅時候，頭腦要好清晰。
7. 펭귄 얼음 깨기 (Ice Breaker)
呢個係2到4個人就可以玩嘅經典遊戲，規則係玩家轉動轉盤後，再決定要打邊粒冰落嚟，但要注意唔可以整跌冰上嘅企鵝。因為係個遊戲規則簡單，唔多需要用腦嘅board game，所以喺全世界都好受歡迎。
今日介紹咗幾款韓國人鐘意嘅board game，小編自己都有玩過其中幾個，唔知大家又玩過邊款呢? 最想玩嘅又係邊個呢? 歡迎留言話俾我哋知！冇玩過都唔緊要，mark低佢，下次去樓上cafe玩board game又可以多個選擇啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
