韓國特色Starbucks門市整理
度度都有Starbucks，旅行唔值得去？10間好值得去打卡嘅韓國特色Starbucks門市！
Hello，大家好，我哋係由韓國人每日提供最新韓國旅行資訊嘅Creatrip。
韓國人鐘意飲咖啡，食飯前飲，食飯後都飲，不論係韓國idol定演員都會見到佢哋成日每人手拎住一杯「아아 （아이스 아메리카노 Iced Americano）」。雖然韓國有無數咁多cafe，但相信對韓國人嚟講，最有代表性嘅cafe都係Starbucks。韓國嘅Starbucks推出唔少週邊，唔只受韓國人歡迎，亦有好多朋友專程搵人代購添。不過你又知唔知，韓國嘅Starbucks除咗週邊商品靚之外，佢哋有唔少門市嘅裝修都好有特色？
今日小編就整理咗10間位於首爾有特色嘅Starbucks門市，一齊嚟睇吓邊間最靚，遲啲嚟打卡啦！
Starbucks VS Starbucks Reserve
韓國好多特色Starbucks都係「Starbucks Reserve」店，到底同普通Starbucks分店有咩唔同？本身「Starbucks Reserve」係為咗同其他咖啡品牌競爭，所以經過精挑細選之後會用來自世界各地嘅咖啡豆，而且烘焙嘅時候會分批逐少烘，務求達到最高品質。呢度用嘅咖啡豆亦都經過「保護國際」認證為冇傷害或剝削人類、動物、自然環境嘅商品。
不過其實全世界得幾間「Starbucks Reserve」烘焙店，而韓國嘅「Starbucks Reserve」店全部都唔係以上介紹嘅烘焙店，而係兼賣限定版咖啡嘅Starbucks分店。
韓國特色Starbucks
1. Starbucks THE北漢山
- 地址：서울특별시 은평구 대서문길 24-11
- 營業時間：07:00 - 22:00
睇到個名就知道，呢間Starbucks分店開喺北漢山附近，所以可以睇到超靚山景！呢度總共有三層，最頂層更加係一個rooftop，總共有253個座位，規模非常大。
行到最入大家可以見到一個超大嘅麵包同甜品陳列櫃，平時喺Starbucks邊有咁多花款啊！更加有幾款嘢食係「Starbucks THE 北漢山」限定，例如係「蘋果批配有機雪糕」同「意大利軟芝士忌廉酥皮包」。
上到天台可以360度咁睇到四周圍嘅景色，天氣再暖返啲嘅時候應該會超多人。想知道點去，邊個位影相靚，就記住撳下面條link睇詳細介紹啦！
2. Starbucks京東1960
- 地址：서울특별시 동대문구 고산자로36길 3 3、4F
- 營業時間：09:00 - 22:00
位於京東市場嘅「Starbucks 京東1960」喺2022年12月15號正式開張，係韓國Starbucks為咗透過將年輕人鍾意嘅文化融入社區，推動世代間交流而新設嘅分店。呢度以60年代嘅戲院為主題，實際上亦都係由服務市民三十載之後廢置嘅京東戲院改建而成。
收銀台隔離有提供餐牌，除咗有平時Starbucks賣開嘅餐飲同期間限定飲品之外，仲有「Starbucks 京東1960」限定嘅麵包款式！
「Starbucks 京東1960」另外一個特點係職員唔會好似平時咁大叫你個名或者號碼，而係會投影喺呢兩塊牆上面，大家記住要一直望實啦~
呢間分店雖然好大，但係因為真係好受歡迎，成日都好快坐滿，所以如果大家有興趣，建議大家可以朝早去！撳下面條link睇埋詳細介紹啦~
3. 梨大Starbucks 1號店
- 地址：서울특별시 서대문구 이화여대길 34
- 營業時間：星期一至四 08:00 - 19:00、星期五至六 08:00 - 20:00、星期日 09:00 - 19:00
INSTAGRAM：starbuckskorea
位於梨大門口前面嘅一號店係韓國第一間Starbucks，之前為咗慶祝Starbucks喺韓國開業20周年，呢間分店亦都轉咗為更加靚同高級嘅Starbucks Reserve店，係一個好適合打卡嘅地方。
一入到去就可以見到玫瑰金色同黑色為主嘅裝潢，高級嘅程度真係同其他一般分店差好遠。加上呢間Reserve店亦採用類似開放式廚房嘅設計，等你可以坐喺吧檯，直接將咖啡送到你面前，超有feel！雖然坐位唔算好多，規模亦都唔係好大，但絕對係韓國Starbucks最歷史嘅一間，如果之後有機會嚟韓國玩，去到梨大行攰咗，不妨可以嚟呢間特別嘅Starbucks Reserve店體驗吓啊。
梨大星巴克（新/舊）
4. Starbucks The鐘路店
- 地址：서울 종로구 종로2가 종로 51
- 營業時間：平日 07:00-21:00、星期六 08:00至21:00、星期日 08:00至20:00
鄰近光化門嘅Starbucks The鐘路店，唔只大間同裝修華麗，落地嘅大玻璃喺天氣好嘅時候更會透入陽光，喺商業大廈林立嘅鐘路，享受住日光飲咖啡，寫意之餘仲可以幻想自己係韓國嘅打工仔添XD
Starbucks The鐘路店有好幾層，每層賣嘅產品都唔同，可以喺飲到其他門市冇嘅飲品。
上到樓上可以見到巨型嘅吧檯、好有空間感嘅設計同無數咁多嘅座位，亦可以見到有唔少打工仔趁lunch hour嚟嘆番杯咖啡添。
5. Starbucks Famille Park R店
- 地址：서울 서초구 사평대로 205
- 營業時間：07:00 - 22:00
由高速巴士地鐵站4號出口一出嚟，就可以見到相入面有一個玻璃屋頂，號稱係全首爾最靚嘅Starbucks啦！
以「都市的咖啡森林」為概念設計嘅Famille Reserve店，透過玻璃屋頂可以直接見到個天，感覺特別開揚之餘，喺空中漂浮嘅雀仔模型更加令人好似置身於天空之城咁。隨住太陽落山，令呢間分店嘅日與夜有住唔同嘅景色。同樣身為Reserve店嘅佢，會賣好多一般Starbucks唔會有嘅menu，非常推薦大家日後去朝聖吓！
6. 韓屋Starbucks小公洞店
- 地址：서울 중구 소공로 106
- 營業時間：平日 07:30 - 20:00、星期六 08:00 - 20:00、星期日 08:00 - 19:00
小公洞分店位於市廳站，附近係德壽宮，佢最特別嘅就係佢韓屋嘅外觀啦！佢都係一間Reserve店，所以裝修同樣好靚，而且有好多特別嘅menu。呢間韓屋Starbucks同附近其他高樓大廈引成對比，等嚟到呢度嘅客人喺鬧市當中都可以感受到韓國文化。
雖然呢間分店只係得外觀係韓屋style，內部同其他Starbucks冇咩分別，但都仍然受好多人喜愛㗎。
7. Starbucks Seoul Wave Art Center店
- 地址：서울 서초구 잠원로 145-35
- 營業時間：平日 08:00 - 21:00、星期六 07:30 - 21:30、星期日 07:30 - 21:00
Starbucks Seoul Wave Art Centre店最特別就係好似漂浮喺漢江上面嘅外觀啦。由碼頭行入去Starbucks有一條路，適合沿路上打卡影相。夜晚啲燈開咗之後更靚，仲顯到Starbucks更似一艘大型郵輪添。
走到入去見到四周都被漢江包圍，望落就更加似一艘船啦。咁特別嘅Starbucks都難怪佢逢週末都爆滿，遲啲有機會去呢間分店，建議都係平日嚟好啲啦。
坐到黃昏睇到嘅漢江日落景就更加突顯到呢間Starbucks嘅美麗之處啦！
8. Starbucks忠正路站店
- 地址：서울 서대문구 충정로3가 95-1
- 營業時間：平日 07:00 - 22:00、星期六至日 09:00 - 17:00
外觀獨特，頗有現代感嘅呢座黑色建築物就係位於忠正路嘅Starbucks分店啦。呢間分店最特別就係佢嘅外觀設計啦，就咁睇好似一個大型嘅地鐵站出口，但其實係一個樓底好高嘅cafe！
入到去就見到掛喺天花板好有氣氛嘅燈飾，令忠正路嘅Starbucks變有首爾有名嘅分店之一。
9. 清潭洞Starbucks第1000號店
- 地址：서울 강남구 도산대로57길 24
- 營業時間：08:00 - 21:00
清潭洞Star店係韓國第1000間Starbucks，貼合返有貴族氣氛嘅清潭洞，除咗裝修都金光閃閃特別高級之外，店面都特別大添。
跟住旋轉樓梯上去，眼前嘅大型吧檯令人產生嚟到酒吧嘅錯覺，上到三樓更有露天座位添。
10. Starbucks 星茶館店
- 地址：서울 중구 회현동2가 88 스테이트타워 남산
- 營業時間：平日 07:00 - 22:00、星期六至日 08:00 - 21:00
Starbucks星茶館店喺2021年3月26日開張，內部裝修沿用韓國傳統茶館（다방）元素，整體都係行木調，一行到入去仲煇見到一塊超大LED添！
呢間係全世界首次設置數碼藝術牆嘅Starbucks。小編去嗰一日就展示緊韓國作家李圭泰嘅作品，聽講係表現咗Starbucks咖啡農場Hacienda Alsacia嘅面貌。
今日同大家介紹咗首爾10間有特色嘅Starbucks，大家又最想去邊間呢？記得mark低佢之後有得嚟韓國嘅時候再去打卡啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
