Hello，大家好，我哋係由韓國人每日提供最新韓國旅行資訊嘅Creatrip。
雖然韓國求其一間餐廳都好好味，不過想食到最正宗最地道嘅韓國美食，一定唔可以錯過今日要介紹嘅呢幾間！嚟韓國冇去食過其中一間嘅話都唔可以話自己去過韓國！
韓國人氣排隊美食餐廳推薦
1. 松雞屋 狎鷗亭店（송계옥 압구정점）
- 地址：서울 강남구 선릉로161길 34
- 營業時間：16:00 - 22:30、週末 15:00 - 22:30
平時飛韓國可能大家都會話去食燒五花肉，但其實韓國最近好流行食燒雞！「松雞屋」位於狎鷗亭羅德奧站附近，平時人氣都好高，每次經過都會見到好多人排隊，加上宋江都幫襯過，所以令呢度更加出名！
松雞屋什錦拼盤（송계옥 모둠 한판）₩44,000
松雞屋什錦拼盤入面除咗有雞柳同鹽燒雞脾肉之外，仲有雞心、雞腎、雞軟骨同雞頸4款特別部位。叫一個拼盤就可以食到6個部位嘅肉，CP值極高！
如果覺得只食肉有啲Dry，可以叫埋松雞屋冷烏冬、松雞屋撈麵或燒飯糰，款款都好好味！另外呢度亦都好出名飲伯爵茶High Ball，而家買Creatrip特快通行證&優惠券，去松雞屋消費滿指定金額就可以免費得到兩杯，咁抵點可以錯過！
2. 漢南洞漢方烤雞（한남동한방통닭）
- 地址：서울 용산구 대사관로34길 38
- 營業時間：16:00 - 00:30、星期五及六 16:00 - 01:30（逢星期日休息）
「漢南洞漢方烤雞」之所以咁出名，係因為超多韓星去捧場，平時晏晝4點就會開門，只係開咗15分鐘就已經冇哂位，門口甚至仲有好多人等拎外賣。
漢方烤雞（한방통닭）₩20,000
因為呢度只得一個menu，所以通常唔洗講，職員都會自動幫大家落單。烤雞外皮烤到脆卜卜，入面包住糯米飯、紅棗、蒜頭等，只睇食材已經覺得好補身！雞皮烤到好脆，紅棗味滲入雞肉，令雞肉有種甜味，不過可惜有啲部位會有少少乾。
3. 年糕辣燉雞湯（떡도리탕）
- 地址：서울 강남구 테헤란로1길 28-9
- 營業時間：11:30 - 22:30（Break Time 15:30 - 17:00、Last Order 14:30、21:30）
來源：Youtube 재밌는 거 올라온다
如果想喺江南站附近搵間韓式料理餐廳，小編會推薦大家去「年糕辣燉雞湯（떡도리탕）」！之前韓國超受歡迎嘅YouTube飲食節目都有介紹過，每逢Lunch Time都會見到坐滿哂人！
年糕辣燉雞湯（中）₩29,000
小編去嘅時候叫咗中Size，3個人食份量都好夠。睇落去紅卜卜以為會好辣，點知味道係偏甜，唔會太辣，如果真係唔太食得辣都可以同職員講去調整辣度。
雞髀好滑，而雞胸肉會有少少乾，不過佢哋嘅年糕真係令人一試難忘，因為真係好煙韌，令人忍唔住食完一條又一條！如果覺得唔夠飽可以另外加公仔麵或者最後叫多個炒飯。
4. 傳說中的馬鈴薯排骨湯（소문난성수감자탕）
- 地址：서울 성동구 연무장길 45
- 營業時間：24小時
韓國有好多鍋類食品，但要講到嚟韓國必食嘅當然唔少得薯仔排骨湯啦！對於遊客嚟講最出名嘅莫過於位於聖水洞嘅「傳說中的馬鈴薯排骨湯」，佢曾經上過《白鐘元的三大天王》，另外仲有好多美食節目都有介紹過，就算唔係食飯時間都一直係大排長龍。
馬鈴薯排骨湯 細份（감자탕 소）₩27,000
坐低落完單冇幾耐，職員就會拎馬鈴薯排骨湯上檯，配其他小菜一齊食好豐富。
炒飯（볶음밥）₩3,000
不過食完之後覺得佢哋湯底唔夠濃郁、紫蘇葉味道過重，排骨嘅肉同骨比較難分開，另外炒飯食落都係覺得有啲淡，雖然味道整體嚟講係唔差，但就有啲失望。如果係為咗佢去聖水洞就真係唔太推薦啦...
5. 熟成到 涯月店（숙성도 애월점）
- 地址：제주 제주시 애월로1길 24-16
- 營業時間：12:00 - 21:30（Break Time 15:30 - 16:30、Last Order 20:45）
去濟州島唔食返一次黑毛豬都對唔住自己！如果問韓國人最推薦邊一間，大多數人都一定會講去「熟成到」，因為佢喺網上評價超高！成個濟州島有4、5間分店，每間都要大排長龍，唔想排隊嘅話建議大家可以買定張Creatrip通行證，包可以快速入座，仲有獨家優惠等緊你！
960熟成帶骨豬里肌（960 숙성 뼈등심）₩38,000/350g
960熟成帶骨豬梅花（960 숙성 뼈목살）₩37,000/360g
本身小編係一個唔係好食到肥膏嘅人，見到成嚿肉有一半都係肥膏都真係驚咗，點知食落完全唔漏，反而口感好正，而且夠曬Juicy同香口，唔怪得韓國人都會叫呢度做「人生燒肉」啦！
食燒肉當然唔少得要包生菜食！職員仲有教小編可以配辣醬、Wasabi、辣椒、泡菜等等一齊食，而且因為有好多款醬，所以大家可以不斷mix & match，搵出自己最鍾意嘅配搭！
6. 囕盈豚（남영돈）
- 地址：서울 용산구 한강대로80길 17
- 營業時間：16:00 - 22:00、週末 12:00 - 21:00
「囕盈豚」被譽為韓國三大燒肉店之一，外觀偏日式風格，唔講都唔知係韓式燒肉店！
「囕盈豚」開咗鋪30幾年，佢哋會用傳統炭火去燒，啲肉食落都會有陣炭香味。另外小菜同調味料都有好幾款俾大家揀同點嚟食，同時仲會送一大碗泡菜湯，味道好濃郁，唔會太鹹，同肉一齊食好夾！
7. 金豬食堂（금돼지식당）
- 地址：서울 중구 다산로 149
- 營業時間：11:30 - 23:00（Last Order 22:15）
首爾有好多間燒肉店，但講到最多人識同出名，應該非「金豬食堂」莫屬，因為佢已經連續5年被選定為米芝蓮餐廳，平日未開門已經有好多人排緊隊拎籌等位。
呢度嘅職員會由頭到尾幫大家燒，只要啲肉燒到金黃色，職員就會教大家點咩醬最好食，五花肉燒到外脆內juicy，加埋有咬口嘅豬皮，口感非常好！另外推薦大家一定要點佢哋秘製嘅醬汁，真係好正！
8. 夢炭（몽탄）
- 地址：서울 용산구 백범로99길 50
- 營業時間：12:00 - 22:00（Last Order 21:00）
「夢炭」位於梨泰院一帶，由三角地站（삼각지역）8號出口直行就會搵到，外觀有啲似係舊式殖民時代風格，非常顯眼。
稻草五花肉（짚불삼겹살）₩15,000/150g
原條牛仔骨（우대갈비）₩25,000/250g
嚟到當然一定要試佢哋招牌「稻草五花肉」同「原條牛仔骨」啦！上檯之前職員會先將啲肉拎去炭燒，所以食嘅時候每嚿都有陣炭香味。
而且職員會幫大家燒完再將肉排好，相當貼心！
9. 大瓦房（큰기와집）
- 地址：서울 종로구 북촌로 22
- 營業時間：星期二至日 11:30 - 21:00（Break Time 15:00 - 17:30、Last Order 20:00）
「大瓦房」距離安國站2號出口非常近，外觀同招牌非常搶眼，離遠就會見到。
醬油蟹（간장게장）₩53,000
「大瓦房」係好多遊客嚟到必去打卡餐廳之一！因為佢哋嘅醬油蟹出名多蟹膏，加埋用藥材釀製嘅醬油，真係色香味俱全！
呢度嘅醬油蟹一啲都唔腥，可以食到蟹肉同蟹膏本身嘅鮮甜味，去過嘅朋友都話會想再去第二次！
10. 真味食堂（진미식당）
- 地址：서울 마포구 마포대로 186-6
- 營業時間：12:00 - 20:00（Break Time 15:30 - 17:00）、星期日及公眾假期休息
除咗大瓦房出名之外，「真味食堂」更加係數一數二出名嘅醬油蟹餐廳，由2017年開始到而家已經連續獲得米芝蓮推薦！佢哋用最高級花蟹去醃製，所以一直都超有人氣！
醬油蟹又被稱為「白飯小偷」，喺度食真係會忍唔住叫多幾碗白飯食！雖然一份醬油蟹要₩45,000，價錢都唔算太平，但食完就會覺得好值，好推薦大家一定要嚟試！
以上就係小編幫大家整理出嘅韓國超受歡迎排隊餐廳，下次飛韓國記住plan返兩三間落行程啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
