新堂洞「金豬食堂」介紹
連BTS同EXO都會去排隊食嘅燒肉！連續5年蟬聯米芝蓮餐廳榮譽嘅餐廳係唔係真係咁正？
Hello，大家好，我哋係由韓國人每日提供最新韓國旅行資訊嘅Creatrip。
首爾有幾間米芝蓮餐廳，其中一間就係位於新堂洞嘅燒肉店「金豬食堂」啦！呢度會咁出名嘅另一個原因係因為BTS、EXO等等嘅韓星都經常會嚟食飯！下次嚟韓國不妨將呢間餐廳放落行程，話唔定下一個偶遇明星嘅就係你！
新堂洞「金豬食堂（금돼지식당）」
新堂洞「金豬食堂」資訊
- 地址：서울 중구 다산로 149嘅
- 營業時間：11:30 - 23:00（Last Order 22:15）
- 小Tips：藥水站（약수역）2號出口行3分鐘
新堂洞「金豬食堂」介紹
「金豬食堂」連續5年被選定為米芝蓮餐廳，亦都被韓國人口中首爾三大必食烤肉之一！即使係平日，仲未到開門時間都已經排曬長龍，到底係唔係真係咁好食呢？
去到之後記住要先去撳機攞籌！不過因為要輸入韓國電話號碼（好多韓國餐廳等位都要），建議大家整返張有電話Number嘅韓國Sim卡，再唔係可能就要主動問職員啦。
NAVER @hg_7033
BTS柾國、智旻、V、EXO Suho、少女時代 Yoona等超多韓星都有嚟過「金豬食堂」，大家嚟到嘅時候可能食食吓飯都會見到附近有明星！
「金豬食堂」總共有兩層，不過Lunch Time就只會開放1樓，所以建議大家早少少嚟，如果唔係就要等好耐㗎啦！
呢度雖然得韓文Menu，不過都有圖可以參考！肉類選擇唔算多，不過就有好多款酒可以揀，酒鬼們唔好錯過啦！
帶骨五花肉（본삼겹）₩38,000/2人份
「金豬食堂」嘅招牌Menu相信一定係呢款帶骨五花肉，幾乎每枱都會叫！
呢度嘅職員會由頭到尾幫大家用炭火燒肉，亦都會教大家點咩醬最好食，保證大家可以食到最juicy最好味嘅肉~
五花肉燒到外脆內juicy，加埋有咬口嘅豬皮，口感非常好！再點埋呢度嘅獨家大葱醬汁，酸酸甜甜嘅味道可以幫手解膩~
小編每次食燒肉都鍾意用生菜包住食，放一嚿肉、燒好嘅蒜頭同雞脾菇同醬汁，真係好正！
豬肉泡菜湯（통돼지 김치찌개）₩8,000
「金豬食堂」另一款招牌Menu就係呢款豬肉泡菜湯啦！泡菜湯超足料，入面有好多泡菜同肉，而且味道夠曬濃郁，兩個人食一煲差唔多，覺得唔夠喉仲可以加個公仔麵（₩2,000）落去煮，為呢餐畫上一個完美句號！
之前見到咁多人都會去排隊，小編都好好奇到底有冇咁好食。今次去完之後發現「金豬食堂」會咁出名真係有佢嘅原因！所有Menu都夠高質，大家如果想食韓燒，但又唔知去邊度好嘅話，推薦大家嚟「金豬食堂」！
如果有更多想知嘅內容，都可以隨時留言或者dm話俾我哋知：）
Instagram：creatrip.hk