Hello，大家好，我哋係由韓國人每日提供最新韓國旅行資訊嘅Creatrip。

平時大家喺韓國食燒肉一係就豬，一係就牛，想有啲新意，食特別啲嘅燒肉？今日就跟住小編一起去位於狎鷗亭嘅炭火燒雞專門店「松雞屋」一探究竟啦！（細細聲同大家講，宋江係呢度嘅常客嚟㗎~）

想去首爾最hit餐廳/Cafe但唔想排隊？
買一套即享人氣餐廳即時入場 + 獨家優惠！

狎鷗亭「松雞屋（송계옥）」

狎鷗亭「松雞屋」資訊

• 地址：서울 강남구 선릉로161갈 34
• 營業時間：星期一至五 16:00 - 22:30、星期六至日 15:00 - 22:30（Last Order 21:30）
• 小Tips：狎鷗亭羅德奧站（압구정로데오역）5號出口行4分鐘

狎鷗亭「松雞屋」推薦原因

• 「松雞屋」係一間炭火燒雞肉專門店，除咗平時食開嘅雞脾肉、雞扒、雞柳之外，仲有其他特殊部位，超特別！
• 呢度嘅伯爵茶High Ball好出名，連演員宋江都一試愛上！
• 除咗宋江之外，仲有好多藝人都定期會嚟呢度食飯，可能下一次就輪到你偶遇明星！

狎鷗亭「松雞屋」價錢

狎鷗亭「松雞屋」介紹

講起最近突然爆紅嘅韓國餐廳，一定唔少得位於狎鷗亭嘅炭火燒雞專門店「松雞屋」！呢度最出名嘅除咗燒雞，仲有喺好多韓國節目都出現過嘅伯爵茶High Ball！

宋江亦都係呢度嘅熟客，門口亦都有佢嘅簽名。

如果係兩個人一齊嚟嘅話可以揀坐1樓Bar枱位。

不過因為小編同朋友一行三個人，所以就上咗2樓坐大枱~ 2樓空間比較闊落，完全唔會覺得翳焗。

叫完嘢食之後，店員就會幫大家上小菜同醬汁。

松雞屋什錦拼盤（송계옥 모둠 한판）₩44,000/2~3人份

小編同朋友今次就叫咗最受歡迎嘅「松雞屋什錦拼盤」，入面除咗有雞柳同鹽燒雞脾肉之外，仲有雞心、雞腎、雞軟骨同雞頸4款特別部位。叫一個拼盤就可以食到6個部位嘅肉，CP值夠曬高！

伯爵茶High Ball（하이볼 얼그레이） ₩8,500

嚟到「松雞屋」就當然要叫埋宋江都一試愛上嘅伯爵茶High Ball啦~ 伯爵茶夠香濃，而且甜甜地，唔鍾意飲酒嘅小編都覺得幾好味！

呢度嘅店員會幫大家燒肉，確保大家可以食到最juicy最嫩滑嘅雞肉。

店員一邊燒仲會一邊解釋呢款係咩肉，點邊款醬最好食等等，好貼心！

呢度有蒜蓉、青陽辣椒、醃辣椒、是拉差辣椒沙律醬、鹽同豉油等多款醬汁，一次過可以試到幾款配搭！

小編同朋友仲叫咗幾款主食，職員會喺大家食緊燒肉嘅時候上埋，等大家可以配住一齊食！

松雞屋冷烏冬（송계옥 냉우동）₩9,000

呢款冷烏冬係夏天限定Menu，煙韌嘅烏冬配雞肉同溫泉蛋，清爽得嚟好開胃！

松雞屋撈麵（송계옥 비빔）₩9,000

將麵同切碎嘅蔬菜、雞肉、紫菜撈勻就可以食啦！麵唔會太腍，味道都唔錯，推薦大家可以配埋燒雞肉一齊食~

燒飯糰（야끼 오니기리） ₩4,000/2個

燒飯糰外面有層脆卜卜嘅飯焦，飯亦都有事先調味過，加埋紫菜鹹鹹地幾特別！

「松雞屋」喺弘大、聖水同蠶室都有分店，如果想試新嘢，又鍾意飲酒嘅話，推薦大家嚟「松雞屋」邊食燒雞邊飲High Ball，盡情享受美酒佳餚！

狎鷗亭「松雞屋」前往方法

喺狎鷗亭羅德奧站（압구정로데오역）5號出口出，然後向出口相反方向行。

第一個路口轉左。

行到街尾轉右。

見到鐘錶舖之後轉左。

直行3分鐘，「松雞屋」會喺你嘅右邊。

「松雞屋」特快通行證&優惠券適用分店位置_{(※狎鷗亭店唔適用)}

弘大店（송계옥 홍대점）

• 地址：서울 마포구 홍익로5길 30
• 營業時間：星期一至五 16:00 - 22:00、星期六至日 15:00 - 22:00

聖水店（송계옥 성수점）

• 地址：서울 성동구 아차산로11길 11
• 營業時間：星期一至五 16:00 - 22:00、星期六至日 14:00 - 21:00

蠶室店（송계옥 잠실점）

• 地址：서울 송파구 올림픽로32길 38
• 營業時間：星期一至五 16:00 - 22:00、星期六至日 15:00 - 22:00

以上係狎鷗亭「松雞屋」嘅介紹，有任何問題請先詳讀呢篇文章。

如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購

Mail：help@creatrip.com