景福宮「大瓦房」醬油蟹介紹
首爾首屈一指醬油蟹餐廳「大瓦房」！搬遷+加價之後質素仲一唔一樣？
Hello，大家好，我哋係由韓國人每日提供最新韓國旅行資訊嘅Creatrip。
講起首爾最出名嘅醬油蟹餐廳，一定唔少得位於景福宮北村嘅「大瓦房」。不過呢間鋪頭最近搬咗，價錢亦都貴咗唔少，今日就等小編帶大家去睇吓到底味道有冇變，仲值唔值得嚟啦！
大瓦房（큰기와집）
- 地址：서울 종로구 북촌로 22
- 營業時間：星期二至日 11:30 - 21:00（Break Time 15:00 - 17:00、Last Order 20:00）
- 小Tips：地鐵3號線安國站（안국역）2號出口直行
「大瓦房」距離安國站2號出口非常近，外觀同招牌非常搶眼，離遠就會見到。
不過大家要注意，因為「大瓦房」有Break Time，所以通常晚市開始之前就會有人喺門口排隊，通常排到入口位都仲可以第一批入到去，但如果已經排到上行人路，咁就有可能要等多一段時間先入到去坐啦。
小編當時係平日晚市時段去嘅，好早就已經排曬長龍。
等位嘅時候可以參考門口前面嘅menu，睇吓想食咩。
鋪頭空間唔大，加埋入面啲房，總共應該淨係可以容納到10組客人。而且呢度樓底比較低，同搬遷之前嘅韓屋風格好唔同。
| 간장게장 醬油蟹 | ₩53,000 |
| 양념게장 辣味醬蟹 | ₩38,000 |
| 게장비빔밥 醬油蟹拌飯 | ₩36,000 |
| 인삼갈비찜 人參燉排骨 | ₩33,000 |
| 소금게장 鹽醬蟹 | ₩80,000 |
餐牌全部都係中英日韓對照，完全唔需要擔心睇唔明！除了招牌嘅醬油蟹，仲有辣味醬蟹同鹽醬蟹可以揀，如果同行朋友唔鍾意食生嘢，都仲有人參燉排骨等等嘅menu可以叫。
呢度嘅嘢食都真係唔平，不過都一場嚟到，小編最後決定叫最出名嘅醬油蟹試吓。
叫完嘢食之後，店員好快手咁送上一壺熱茶、餐具同超多小菜。店員好熟手咁將啲小菜擺成一個圈，留返中間個位擺醬油蟹。大家記住唔好亂郁啲碗碟，如果唔係老闆娘就會行埋嚟㗎啦
過咗一陣之後，小編叫嘅「醬油蟹」同「人參燉排骨」就嚟咗啦！呢度仲會送一個大醬湯，辣辣地非常開胃。
人參燉排骨（인삼갈비찜）₩33,000
喺「大瓦房」食飯，每個人都要叫一份嘢食，而因為同小編一齊去嘅朋友唔太鍾意食醬油蟹，所以就另外叫咗個人參燉排骨，一上枱就聞到勁香！
排骨肉燉到骨肉分離，睇落好似好正咁，但味道其實並冇想像中咁好食。味道同普通燉排骨差唔多，都係鹹鹹甜甜，只係多咗少少人參嘅香味，而啲肉亦都冇睇落咁軟熟，有幾嚿仲有啲難咬添... 小編朋友話有少少後悔，早知叫其他嘢食。
醬油蟹（간장게장）₩53,000
不過「大瓦房」嘅招牌係醬油蟹，一齊嚟睇吓好唔好食啦！
一份醬油蟹只有一隻，不過有勁多金黃色嘅蟹膏，加埋用藥材釀製嘅醬油，聞落都幾香。
小編首先用筷子將蟹膏推出嚟，放喺紫菜上面，再加一啖飯...味道真係驚為天人，可以話係小編人生中食過最好食嘅醬油蟹！
小編喺韓國都算食過唔少醬油蟹，好多食落都好似，通常都會用好濃嘅醬汁去隱藏腥味。但呢度嘅醬油唔太鹹，可以食到蟹肉同蟹膏本身嘅鮮甜味，亦都完全唔腥。
連小編嘅朋友都話覺得呢度嘅醬油蟹冇澀味，比起佢以前食過嘅好食好多。
呢度嘅醬油蟹蟹肉都非常飽滿，食落好似啫喱咁，而且非常鮮甜。如果覺得唔夠味，大家可以配埋醬油一齊食，味道會更加豐富。
大家都知道食醬油蟹一定唔少得將啲飯擺落蟹蓋撈蟹膏食！上面圈住嗰啲位有好多收收埋埋嘅蟹膏，大家記住一定要用匙羹或者筷子撩出嚟，一啖都唔好曬。撩曬出嚟之後，將白飯放落去撈勻，一啖食落肚，可以話係人生一大享受。
喺韓國，醬油蟹又被稱為「白飯小偷」，喺「大瓦房」食完之後小編終於明白點解啦！小編都差啲忍唔住叫多幾隻蟹同幾碗白飯食，真係非常唔錯！
整體嚟講，雖然呢度價錢偏貴，但係醬油蟹味道比小編想像中好食好多！不過小編建議大家唔好叫唔係蟹類嘅menu，所以如果大家冇海鮮敏感，又對醬油蟹有興趣嘅話，就一定要嚟「大瓦房」啦！
Book唔到大瓦房仲有邊幾間選擇？
如果有更多想知嘅內容，都可以隨時留言或者dm話俾我哋知：）
Instagram：creatrip.hk