首爾各區住宿/酒店推薦
嚟首爾住邊度最好？小編整理好首爾各區住宿，希望可以幫到之後嚟旅行嘅大家啦！
Hello，大家好，我哋係由韓國人每日提供最新韓國旅行資訊嘅Creatrip。
正所謂：「休息就係為咗走更長嘅路」，去旅行有時住宿都唔可以揀得馬虎，不過首爾咁大，冇時會唔會都煩惱住邊呢？今日小編整理好首爾住宿地區，希望可以望到之後嚟旅行嘅大家啦！
首爾住宿總整理
首爾市行政區域
Seoul Solution
喺正式介紹住宿之前，小編想先等大家了解一下首爾每一區。中間將首爾劃分一半嘅係漢江，可能大家都會聽過常江東、江西、江北、江南等，其實就係咁就區分，其中好似中區、鍾路區等地，又有幾個比較著名嘅「洞」。首爾每個地區都有唔同魅力，而家就等小編逐人為大家介紹啦！
首爾住宿總整理
1. 中區
- 明洞
大家熟知嘅「明洞」，係由地鐵明洞站到乙支路、樂天百貨地段，呢度集結各種名牌、小物、百貨公司、免稅店，係外國人嚟到一定會去嘅景點之一，呢度交通方便，由三星級到五星級酒店通通都有，而且仲可以望到南山。
- 乙支路
朝鮮時代後期至八零年代，乙支路被稱為南村，係文化同藝術集結嘅文化中心，但而家嘅乙支路聚集咁唔少細規模嘅cafe同餐廳，以復古「Hip支路」氛圍吸引年青人去打卡，呢度每一條小巷都有唔少故事。另外乙支路離明洞同鍾路近，交通方便，但唔會好嘈，喺度住都唔錯！
首爾車站係連接首爾市內、韓國各地交通中心，包括京釜線、KTX、京義中央線、地鐵1號線和4號線、機場鐵路、無窮花號等，呢度幾時都係咁多人，附近有好多觀光景點，好似有崇禮門、南大門市場、N首爾塔等，如果想去首爾以外城市，喺度揀住宿都唔錯！
2. 麻浦區
- 弘大、延南洞
弘大係唔少年青人聚集嘅地方，無論時尚、美容、生活、設計品牌、餐廳、Cafe等都有，有時仲會見到有唔少人喺街頭表演，呢度永遠充滿青春氣息同活力，同時弘大3號出口嘅延南洞，好推薦大家都行，同弘大完全唔同風格。
3. 城東區、廣津區
- 聖水洞、建大
聖水洞過去係工業區，經過改造之後，呢度有唔少Cafe同文化空間，係好多人放假嚟打卡嘅熱門場所，附近仲有超大公園「首爾林」可以賞花、踩單車，甚至可以去就近嘅纛島漢江公園野餐、欣賞漢江風光，相當寫意。加上而聖水洞附近嘅「建大」係一個繁華區，呢度好多CP值高嘅美食、遊樂設施、精品店等住大家去尋寶。
4. 龍山區
- 梨泰院
梨泰院喺1997年由首爾市指定第一個特別旅遊區，居住超過兩萬多名外國人，係一個相當著名跨國多元文化區，加上80年代國際會議、1986年亞運會、1988年奧運會都喺首爾舉行，令梨泰院成為對外國人十分友善嘅旅遊勝地。
除咗鄰近嘅解放村、漢江鎮有好多打卡SNS名店，梨泰院同江南、弘大一樣，集結豐富夜生活，更有LGBT夜店進駐，對於想體驗「韓國式」夜生活嘅朋友，嚟呢度住就最適合不過。
5. 松坡區
- 蠶室
蠶室，令人第一個就會諗到樂天世界同樂天塔等，但其實附近仲有好多值得令人去打卡嘅景點，好似石村湖水公園、奧林匹克公園、首爾書寶庫等，加上鄰近松里團路，好多美食、Cafe等住大家去試！呢度住宿以高級酒店為主，住得高仲可以欣賞首爾美景。
6. 江南區
- 江南
首爾江南區係現代潮流文化聚集地之一，周圍有好多高樓大廈，大品牌、餐廳、Cafe、夜店同整容外科聚集，住宿由高價到合理價一般民宿都有，相信大家都會鍾意。
- 新沙洞、狎鷗亭
富有時尚藝術感嘅新沙洞林蔭大道，呢度有好多名牌聚集，係首爾富人區的代表之一，唔少藝人成日會喺呢度搞Party，想撞星話咁易！如果係揀住得高樓層嘅住宿，朝早可以望到漢江，夜晚可以欣賞到首爾同南山塔夜景，同江南相比，價錢會平啲啲。
- 三成洞
三成洞係亞洲最大地下購物中心、高層建築同世界級品牌聚集地，特別係三成站連接Starfield COEX Mall，附近仲有千年歷史奉恩寺，係歷史同現代結合嘅完美區域。
附近嘅「韓國都心機場」因為可以辦理登機手續同出境審查，好受遊客歡迎，不過呢度附近民宿選擇唔多，反而多適合上班族嘅商務旅館同豪華五星酒店。
7. 鐘路區
- 景福宮
首爾古宮殿「景福宮」，就算冇去過都一定聽過佢大名！好多人嚟到都會去附近借韓服，欣賞韓國過往歷史，嚟呢度推薦大家可以住返一晚韓屋，瞓過一晚都會好難忘。
- 北村、三清洞
北村三清洞位於景福宮同昌德宮之間，係朝鮮王朝時期建造貴族住宅區。舊有韓屋令現代化首爾增添親切感，大家平時會去食嘅Baskin Robbins，呢度外牆仲以韓屋打造，如果係第一次飛韓國，好推薦大家可以住呢度。
- 西村
位於景福宮西邊嘅西村同北村相似，但呢度會有多種文青藝術氣息，曾經電影《初戀築夢101》、IU專輯《花書籤》、韓劇《鯊魚》都有嚟過取景。 舊書店「大悟書店」係大家嚟到都會去打卡嘅景點之一，有時間仲可以去通仁市場享受銅錢便當樂趣。
- 仁寺洞
仁寺洞有好多傳統鋪頭，由古董、藝術畫廊、家具同民間工藝品都有，街道四周有好多街頭小食、韓餐等特色料理，集結日本殖民風格嘅傳統茶館、韓國代表性紀念品都可以喺度買，對於想體驗豐富文化行程嘅朋友，仁寺洞可以話係首選。
- 益善洞
全長801米嘅益善洞，同仁寺洞唔同嘅係，呢度有好多的色Cafe同餐廳，好多韓國情侶放假都會嚟打卡，附近就係鐘路三街酒吧、好多一檔檔嘅布帳馬車，想體驗在地夜生活，呢度一流！不過有個缺點係住低樓層，只到一到夜晚同週末就會好嘈。
8. 東大門區
大家應該對「東大門」唔陌生，除咗係批發區之外，呢度有咗DDP之後，好多遊客會嚟呢度感受城市壯麗建築，同時興仁之門公園隔離好適合散步、行到攰嚟呢度稍作休息。加上東大門係1號線、2號線、4號線等多條地鐵線路交彙地方，住呢度相當方便！
購物 | 東大門、明洞 新沙、狎鷗亭 |
交通 | 首爾站、三成洞 |
在地藝文 | 益善洞、仁寺洞 乙支路、延南洞 |
傳統歷史 | 西村、景福宮 北村、三清洞 |
在地氛圍 | 蠶室、聖水 建大、弘大 |
夜生活 | 江南、梨泰院、弘大 |
首爾各區酒店整理
以上就係小編為大家整理好首爾各地住宿，希望可以幫到大家一啲幫助啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
