南大門市場總整理
首爾最大傳統市場「南大門市場」原來可以咁好行，南大門美食整理、必行商家攻略
Hello，大家好，我哋係由韓國人每日提供最新韓國旅行資訊嘅Creatrip。
小編覺得每去一個國家，都必去當地嘅傳統市場，因為唔理係喺邊個國家，只要行當地市場都可以發現一啲新奇有趣嘅事。所以今日就要為大家介紹，位於4號線會賢站（회현역）嘅南大門市場啦～
「南大門市場」簡介
- 地址：서울 중구 남대문시장4길 21
- 營業時間：12:00 - 23:00、逢星期日休息 （每間鋪頭營業時間都唔一樣）
「南大門市場」介紹
南大門市場又被稱乜都有嘅「鬼怪市場」，以為好細無咩嘢行？咁你就錯啦！呢到嘅鋪頭大約有1萬間咁多㗎！每日平均會有30萬名訪客嚟，係一個規模相當大嘅市場。
南大門市場有好多嘢賣，例如：童裝、首飾、廚房用品、手工藝品、食品、鞋等1,700樣商品，基本上要搵嘅嘢呢度都會搵到。
除咗韓國傳統小食之外，呢度仲有世界各地嘅零食。
南大門有啲商場會已經標明好每一層係賣啲咩，只要去返相關樓層，就可以搵到想要嘅嘢。
因為呢度大，通常如果人有三急，廁所可通常可以喺一樓或者地下一樓搵到。
如果唔知要點行，可以去詢問處用英文問，職員都會好親切咁教大家。
或者如果大家行到蕩失路，都唔需要太擔心！只要搵到著住紅色衫黑色褲，戴埋頂紅色嘅義工，佢哋就會教大家點樣行。
提提大家：因為係市場未必每一間舖頭都肯收信用卡，建議大家可以帶定現金。
南大門美食推薦
1. 糖餅（호떡）
去到南大門市場最唔可以錯過嘅就係韓式糖餅。
普通糖餅係麵團入面放一啲砂糖同堅果類嘅小食，但南大門就係以蔬菜糖餅而出名，一個 ₩1,000（3個口味統一）。
小編介紹嘅呢一間相當之出名，每一次都係大排長龍，而且用料新鮮，外脆內軟！
呢間係會賢站3號出口一出就會見到嘅糖餅店，因為雜菜糖餅出名，所以成日都會見到好多人喺到排緊隊，老闆係以即叫即做嘅方式去整，所以糖餅一定係熱辣辣㗎！
除咗雜菜糖餅之外，呢到亦有甜甜嘅原味糖餅，糖餅係啱啱出爐嘅情況下，中間嘅砂糖有可能會流出嚟，而且好熱！所以大家食嘅時候一定要小心！
2. 魚糕條（핫바）
價格：₩2,000 - ₩3,000
魚糕條係魚糕裡面放香腸同年糕等食材而整成嘅，同平時食到嘅魚糕唔同。
可能因為加咗醬汁，食落去會覺得有啲甜，喺南大門市場行嘅話，一定會見到好多有賣魚糕條嘅鋪頭，男女老少都鍾意食！
3. 餃子（만두）
南大門市場入面有兩間非常出名嘅餃子鋪頭。
第一間要同大家介紹嘅係「효자손 왕만두（孝子手 王餃子）」，呢到有賣泡菜、豬肉、炸餃同煎餃（6粒₩5,000、10粒₩7,000），無論係咩時候都係勁多人排緊隊，唔怕搵唔到，見到最多人排隊個到就係㗎啦！
第二間要介紹嘅係「가마골 왕만두（烤窯王餃子）」，同樣都係超多人排隊買，不過職員好快手，唔使等好耐就買到！餃子一粒₩1,000、蒸包一個₩1,500。
餃子有泡菜同牛肉兩種口味，另外仲有包賣。
小編試咗呢度嘅泡菜餃子，入面超多餡料，而且仲好多汁，超好味！
4. 冬甩（도너츠）
呢間冬甩係同啱啱介紹嘅효자손 왕만두（孝子手 王餃子）同一間，呢度嘅冬甩有紅豆、咖哩餡等。
因為聞到咁香小編都忍唔住買返一個紅豆餡嚟試，出面仲會撒糖，超好味！不過大家唔好太心急食，如果唔係就會焫親個嘴。
款式有好多，大家可以同朋友買一兩個share食㗎。
5. 刀削麵街（칼국수골목）
- 地址：서울 중구 회현동 남대문시장4길 42-1
- 價格：₩7,000 - ₩8,000
喺南大門市場裡面有刀削麵一條街，街道兩邊都聚集咗好多間刀削麵店，一開始入到去可能會有啲混亂唔知去邊間比較好～但因為每間價錢都差唔多，所以有啱心水去嗰間就得㗎啦～
呢度嘅刀削麵唔單止夠平，就連份量都勁多，只要叫刀削麵就會附送大醬湯、涼拌冷麵同大麥飯～全部都係一人份！所以大家去南大門市場之前，一定要留定個胃！
6. 牙帶魚街（갈치골목）
- 地址：서울 중구 남대문시장길 22-6
南大門市場裡面嘅牙帶魚街，就喺刀削麵街隔離，喺呢到可以食到煎或者燉。辣燉牙帶魚係牙帶魚入面放蔬菜，再用辣椒粉、醬料去煮成嘅小食，送飯一流！
喺南大門市場嘅「牙帶魚街」，周圍都可以見到唔少鋪頭喺到燉緊辣牙帶魚鍋～遠遠都聞到香味，如果怕食辣嘅朋友，可以選擇乾煎牙帶魚，一樣咁好味㗎！
小編無論係煎定係燉都有試！兩款都係₩10,000，燉嘅話啲肉啱啱好熟，而且骨頭同魚肉好易分開，辣辣地好惹味！如果係煎嘅話一啲都唔油膩，外脆內軟，令人諗返起都好想再食！
除咗煮食之外呢度都有唔少小菜，例如蒸雞蛋，一樣都係超好味！
如果大家都想試吓韓國傳統美食，嚟呢度絕對唔會令你失望！
7. 魚糕（어묵꼬치）
- 地址：서울시 중구 남창동 34-46
講到魚糕又點可以唔提釜山呢？不過去唔到釜山唔緊要，喺南大門一樣可以食到同買到～
喺寒冷嘅天氣，一邊食住魚糕一邊飲熱辣辣嘅魚糕湯，簡直係天堂！一串係₩1,000， 嚟到南大門市場一定要試吓啦！
8. 東京食品（동경식품）
- 地址：서울시 중구 남대문시장4길 8
南大門市場入面，有間專門賣乾貨叫做「東京食品（동경식품）」老闆係一位慈祥嘅老伯伯，所以好多遊客都叫呢間做老爺爺食品店～
一大包可以食好耐！鍾意食士多啤梨嘅你又點可以錯過呢～就算唔食都可以買返去當手信派，一定好受歡迎！大家亦可以將佢配雪糕、沙律、Yougurt食。
0.jpg)
9. 長安商社（장안상사）
- 地址：서울시 중구 남대문시장4길 3 C외 8호
另一間想同大家介紹嘅就係長安商社，一樣只要係我哋會員都有9折優惠！
呢度嘅士多啤梨乾好甜，用成粒新鮮士多啤梨烘乾，顏色鮮艷、好睇，超好食，加上密封包好，品質更好同乾淨、可以放得耐啲。
除咗士多啤梨乾之外，呢度仲有賣無花果乾、魚乾、紫菜、人蔘、紅蔘等遊客都會買嘅商品，一次過喺度買哂超方便！
10. 南大門花卉市場
- 地址：서울특별시 중구 남대문시장4길 21 E동 3F
- 營業時間：星期一至四 03:00 - 15:00、星期五至六 03:00 - 16:00、逢星期日休息
如果鍾意花嘅朋友，小編亦都推薦大家可以去南大門附近嘅花卉市場，呢度可以用超平價錢就可以入到手！
除咗鮮花之外，仲有各種花瓶，大家可以襯返一套咁買。
要點樣先去到南大門市場？
如果去南大門市場，可以搭地鐵4號線去到會賢站，喺5號同6號出口出嚟就會見到市場入口，加上佢位置係喺明洞同忠武路附近，要去話咁易！
5號出口即刻出嚟就會見到南大門市場。
如果大家有帶行李唔想拎住，地鐵站有得租Locker，4小時係₩2,000起，全日就₩8,000， 有需要嘅朋友都可以參考吓！
以上係小編整理好最新嘅南大門市場總整理，希望可以幫到之後嚟旅行嘅大家啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk