三清洞「BR雪糕」介紹
BR雪糕進駐北村韓屋村！以傳統韓屋方式設計，相當有韓國傳統風味，之後去開要順便打卡啦！
Hello，大家好，我哋係由韓國人每日提供最新韓國旅行資訊嘅Creatrip。
相信大家嚟韓國食雪糕第一時間都會諗到BR，佢哋每個月都會出新口味，而且每一個地區都可以隨時搵到佢嘅蹤影。今次小編去嘅係上年三清洞新開嘅BR分店，同其他分店唔同，佢係用傳統韓屋方式去設計，相當有韓國風味，之後去開除咗要食雪糕之外，順便要埋打卡啊！
三清洞「BR雪糕」介紹
베스킨라빈스 삼청마당점
- 地址：서울 종로구 율곡로3길 74-1
- 營業時間：10:00 - 21:30
- 小Tips：由安國站1號出口行過去大約20分鐘左右。
由安國站1號出口，往北村三清洞方向行，大概行20分鐘左右就會見到。
平時去開嘅BR店好多時都可以直接睇有咩雪糕口味可以揀，但呢度只有Menu掛喺右邊，或者可以參考機器上顯示嘅口味。
落單可以用機器（不過只收信用卡），如果係想俾現金可能就要直接去櫃檯同職員講。
而喺櫃檯中間，小編見到呢個韓國以前用嘅傳統鐵鍋，雖然唔知係用嚟做咩，不過見到都覺得幾得意
入面座位唔算多，不過就好有feel，每一個都好適合打卡。
另外呢間三清洞分店韓文店名係「삼청마당점」，中文翻譯為三清庭院店，而喺店門口，亦可以見到有唔同高矮嘅板凳區，如果天氣好，都可以坐喺出面食雪糕。
而喺韓屋屋簷下嘅一角，呢度有可以坐3至4個人，喺度吹住風食住雪糕真係好舒服。
大家落完單之後唔使5分鐘，小編叫嘅凍美式咖啡（₩3,000）同「華華糕（와와떡）」（₩6,100）就拎到啦！
「華華糕」係好多韓國YouTuber推薦嚟到一定要食嘅口味，而拎嘅時候，職員仲會附上一個手指手套，大家食窩夫嘅時間就唔怕會污糟，好貼心。
呢個窩夫裡面仲有好煙韌嘅年糕，同雪尼拿雪糕一齊食真係特別好味，食嘅時候會明白點解咁多人都推佢！食完一個好有衝動會想食多個添
唔知大家之後嚟韓國又會唔會想去試下呢？比起其他BR分店，呢度特別有韓國傳統風味，鍾意打卡嘅朋友千祈唔好錯過！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
