韓國五大宮殿
關於韓國五大宮殿嘅一切就喺哂呢度！
Hello，大家好，我哋你由韓國人每日提供最新韓國旅行資訊嘅Creatrip。
如果本身係鍾意歷史嘅你，嚟韓國一定要去參觀首爾5大宮殿，可以欣賞到朝鮮王朝以前係點生活、文化同建築等，今日就等小編同大家講解佢哋每一個宮嘅特點同歷史背景啦！
韓國五大宮殿
1. 景福宮（경복궁)
光化門（광화문）
景福宮係喺1395年由朝鮮王朝第一任國王太祖（李成桂）首次建成，佢係五大宮殿之中最大，而且最出名，係好多遊客嚟到必去旅遊景點之一。
勤政殿 （근정전）
宮殿內建築多不勝數，每一座建築都有一段故，景福宮主樓係勤政殿 ，呢度會舉行國王生日儀式、加冕儀式同娛樂儀式等重要活動。其他主要建築物包括王與臣下學習嘅「思政殿」、王嘅寢殿「康寧殿」、王妃寢殿「交泰殿」、煮飯嘅「燒廚房」，以及世宗大王研究韓文地方「集賢殿」等。
香遠亭（향원정）
香遠亭係景福宮最靚嘅地方，歷經三年修復，喺2021年11月重新向外開放。
想俾大家一個參考：景福宮喺1592年臨津戰爭期間，大部分建築被戰火燒毀，係到咗1860年代先被高宗重新修復，而家好多地方仲係修復當中，希望可以恢復朝鮮王朝完整原貌。
慶會樓（경회루）
慶會樓位於景福宮勤政殿西北邊，建於太宗永樂十年，係國家每逢喜事或迎接外交使節時舉行宴會嘅地方，有興趣想入去參觀嘅朋友，可以先網上預約之後再去！
- 地址：서울 종로구 사직로 161
- 營業時間：11月至2月 09:00 - 17:00、6月至8月 09:00 - 18:30、3月至5月&9月至10月 09:00 - 18:00、逢星期二休息
Closed Tuesdays - 價格：成人（19歲至64歲）₩3,000、青少年（7歲至18歲 ）₩1,500 、著韓服免費
- 小Tips：景福宮站3-1號出口出嚟之後一直直行，左邊就會見到光化門入口。
- 想知更多關於景福宮嘅一切，可以撳我了解更多。
2. 昌德宮（창덕궁）
仁政殿（인정전）
昌德宮係五個主要宮殿中唯一被聯合國教科文組織列為世界遺產宮殿，實際上比景福宮更長時間作為朝鮮主要宮殿。
熙政堂（희정당）
昌德宮係由朝鮮王朝太宗喺1405年建造嘅第二座宮殿，自從殺咗自己兄弟造反成為王後，太宗就住喺昌德宮，即使景福宮同昌德宮都因日本入侵朝鮮而被燒毀，但第15代朝鮮光海君只恢復昌德宮，只因佢哋當時認為景福宮建得唔好，所以佢哋更鍾意昌德宮。
樂善齋（낙선재）
景福宮只係喺朝鮮王朝建立初期，以及1860年修復後先作為朝鮮主要宮殿，相比之下昌德宮有大約500年期間被用作朝鮮主要宮殿，歷史相當悠久，其中樂善齋係朝鮮末代太子李方子夫人，以及末代公主德惠翁主共度餘生嘅地方。
昌德宮後苑（창덕궁 후원）
昌德宮之所以成為世界遺產中唯一宮殿，係因為佢將朝鮮王朝原始形態保存得最好，如果大家想去昌德宮後苑（秘苑）係需要買入場門票先可以入場，加上因為一年四季都靚，如果唔先前預約可能會買唔到。
- 地址：서울 종로구 율곡로 99
- 昌德宮營業時間：11月至1月 09:00 - 17:30、2月至5月&9月至10月 09:00 - 18:00、6月至8月 09:00 - 18:30、逢星期二休息
- 後苑營業時間：12月至1月 10:00 - 16:30、2月&11月 10:00 - 17:00、3月至5月&9月至10月 10:00 - 17:30、6月至8月 10:00 - 18:00、逢星期一休息
- 後苑網上預約：撳我
- 昌德宮入場費用：成人（19歲至64歲）₩3,000、青少年（7歲至18歲）₩ 1,500、著韓服免費
- 後苑入場費用：成人（19歲至64歲）₩3,000、青少年（7歲至18歲）₩ 1,500
- 小Tips：安國站3號出口行大約6分鐘
- 想知更多關於昌德宮嘅一切，可以撳我了解更多。
3. 昌慶宮（창경궁）
名政殿（명정전）
昌慶宮係朝鮮王朝第四代國王世宗喺1418年就位時，為父親太宗同王室家族設立嘅單獨宮殿，由於昌慶宮同昌德宮係相連，推薦大家可以一次過去。
文政殿（문정전）
朝鮮英祖有一個仔「思悼世子」，係宮女所生，英祖擔心大家會因為思悼世子母親家境貧寒而睇佢唔起，由細就對思悼世子進行嚴厲教育，冇諗到因為咁令到思悼世子越嚟越兇狠。原本聰明伶俐嘅佢，因朝廷官員疏遠同父親壓力，失去身為世子尊嚴，最終喺父親英祖命令下被關起，喺放米糧櫥（뒤주）中餓八日而死，而發生呢段咁悲慘嘅事，係發生喺文政殿。
玉川橋（옥천교）
只要一到春天，就有唔少人會去昌慶宮，因為呢度可以欣賞到超靚櫻花，1907年大韓帝國開國皇帝朝鮮高宗被日本人推翻，純宗即位。高宗住喺德壽宮、純宗皇帝住喺昌德宮，當時日本以安撫純宗為幌子，喺昌慶宮種咗象徵日本嘅櫻花，將呢度裝飾成日本庭園，成為韓國歷史上最羞辱記憶。
大溫窒（대온실）
當時日本人仲喺度建造玻璃溫室植物園同動物園，令昌慶宮失去作為國家宮殿尊嚴，即使韓國之後獨立，都冇將呢個地方拆除，而係選擇重新修復，一邊恢復昌慶功作為宮殿地位，一方面等大家可以嚟參觀。
- 地址：서울 종로구 창경궁로 185
- 營業時間：09:00 - 21:00、逢星期一休息
- 入場費用：成人（19歲至64歲）₩1,000、青少年（7歲至18歲）₩ 500、著韓服免費
- 小Tips：惠化站1號出口搭301巴士搭3個站之後落車，或者喺惠化站4號出口行大約15分鐘。
- 想知更多關於昌慶宮嘅一切，可以撳我了解更多。
4. 德壽宮（덕수궁）
德壽宮係首爾五座古宮殿中，唯一一座喺「大韓帝國」建國後，作為高宗皇帝居住宮殿。德壽宮隔壁係有貞洞展望台，可以喺高處望到德壽宮全景同首爾市景，加上昌慶宮相對開得夜啲，唔使買入場券，想幾時去都得。
中和殿（중화전）
德壽宮原本係朝鮮第9代君王成宗哥哥「月山大君」嘅屋企，但經過壬辰倭亂後l，被第14代宣祖臨時挪用宮殿，喺1897年高宗天皇為咗避開日本人追殺，而喺俄國公使館避難到呢個地方，作為臨時王室。
靜觀軒（정관헌）
當年高宗皇帝喺俄羅斯公使館避難，第一次飲咖啡，之後就愛上咗，亦係同時大韓帝國開始同西方國家建立外交關係，大家可以喺德壽宮見到受西方影響嘅獨特建築。
石造殿（석조전）
石造殿係一個用咗10年去建造嘅建築，同時係君王居住空間，包括寢室同會客室，但喺1910年因韓日合併條約，大韓帝國完全落入日本手上，同昌慶宮一樣都有一段令人心痛嘅歷史。
- 地址：서울 중구 세종대로 99
- 營業時間：09:00 - 21:00、逢星期一休息
- 入場費用：成人（19歲至64歲）₩1,000、青少年（7歲至18歲）₩ 500、著韓服免費
- 小Tips：市廳站2號出口一直直行幾分鐘就會見到。
- 想知更多關於德壽宮嘅一切，可以撳我了解更多。
5. 慶熙宮（경희궁）
崇政殿（숭정전）
慶熙宮由朝鮮第十五代國王光海君喺1620年建成，係一座擁有100多座建築物嘅宮殿。
同其他宮殿相比，慶熙宮冇其他宮殿咁出名，因為喺日治時期，慶熙宮被拆毀，原本係宮闕位置改建京城中學（現今「首爾高中」），好多建築物都被拆毀。
資政殿（자정전）
慶熙宮資政殿係日殖時期受損最嚴重嘅地方，所以剩底建築好少、同時唔多遊客嚟，但呢度相對夠靜，可以慢慢睇清楚以前歷史痕跡。
瑞巖（서암）
慶熙宮另一個值得注囓係被稱為「瑞巖」嘅神秘岩石，聽講光海君喺呢度建造慶熙宮，就係因為可以從岩石上感受到「王的力量」。
之前Netflix拍嘅《屍戰朝鮮》第二季就係喺呢度取景，唔知大家又有冇印象呢？
- 地址：서울 종로구 새문안로 45
- 營業時間：09:00 - 18:00、逢星期一休息
- 入場費用：免費
- 小Tips：西大門站喺4號出口出嚟之後直行400m，就會見到慶熙宮喺左手邊。
- 想知更多關於慶熙宮嘅一切，可以撳我了解更多。
以上就係首爾五大宮殿嘅介紹，雖然建於同一朝代，但每個地方都有自己歷史背景同故事，希望對之後去嘅大家有啲幫助啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk