廣安里美食總整理
廣安里有超多美食等住大家！韓式、日式、西式通通都有！
Hello，大家好，我哋係由韓國人每日提供最新韓國旅行資訊嘅Creatrip。
去到釜山廣安里海水浴場一帶，除咗要望海景之外，當然唔可以錯過嘅就係佢哋嘅地道美食！今日小編整理咗廣安里附近嘅推薦餐廳，韓式、日式、西式通通有齊！
釜山廣安里美食總整理
1. Your Type（유어타입）
- 地址：부산 수영구 광남로 189-1
- 營業時間：平日 09:00 - 18:00（Last Order 17:00）、週末 09:00 - 19:00（Last Order 18:00）
- 小Tips：廣安站（광안역）1號出口行10分鐘
位於廣安站1號出口，往海邊方向行會見到一間叫做「Your Type」嘅餐廳，佢出名食Brunch，每日提供嘅食材都係新鮮、即叫即整，價錢又唔貴。
雖然舖頭內部唔算好大，不過佢裝修得就好有feel，以簡約色系同擺設營造出行係居家風格。
呢度所有食材用新鮮材料製作，即叫即整，保證大家食嘅時候仲係熱辣辣，左邊French toast一份₩13,500，以新鮮水果、榖物同多士組成，相當豐富，右邊嘅Bacon Galette（₩14,000）係佢哋嘅主打，幾乎嚟到嘅客人都會叫，入面有煙肉、蛋黃同菇類，用餅皮包住佢哋一齊食超好味！
2. 溫飯（온밥）
- 地址：부산 수영구 수영로540번길 49
- 營業時間：11:30 - 20:30（Break Time 15:00 - 17:00、Last Order 14:30及20:00）、逢星期一休息
- 小Tips：廣安站（광안역）5號出口行8分鐘
釜山係一個港口城市，除咗食生魚片之外，當然佢哋嘅海鮮亦都唔可以錯過，呢一間藏身喺廣安里小巷入面嘅「溫飯」，就有提供家庭式烤魚餐，超warm。
鋪頭內部座位唔算多，小編大概12點左右到，唔使好耐已經坐滿晒人。
青花魚套餐（고등어구이 한상）₩11,000
紅鱸魚套餐（금태구이 한상）₩17,000
一上到枱，小編覺得真係超豐富！除咗有魚之外，仲會配合唔同小菜，超有家嘅感覺！味道更加係唔話得，雖然價錢貴咗啲，不過食完會覺得好暖同窩心。
3. 海雲台31cm海鮮刀削麵 廣安店（해운대31cm해물칼국수 광안점）
- 地址：부산 수영구 광남로 144
- 營業時間：11:00 - 22:00
- 小Tips：廣安站（광안역）5號出口行10分鐘
之前小編同朋友去廣安里海水浴場嘅時候，意外地喺Naver發現「海雲台31cm刀削麵」相當出名！只要一到食飯時間，就會大排長龍，小編當日拎完飛都等咗20分鐘先入到去。
呢度幾乎每一枱都會叫刀削麵（1人份₩10,000），同埋帶有辣味嘅海鮮蔥餅（₩13,000），份量相當多！
刀削麵小編叫咗兩人份，份量多到好似食緊打邊爐咁 ，用料相當十足，配埋海鮮蔥餅一齊食超好味！
4. Mad Dogs（매드독스）
- 地址：부산 수영구 광안해변로 235
- 營業時間：星期一至五 13:00 - 23:30、星期六至日 11:30 - 24:00
- 小Tips：廣安站（광안역）3號出口行11分鐘
INSTAGRAM @MADDOGSPIZZAPASTA_OFFICIAL
蕃薯芝加哥Pizza（고구마 시카고 피자）₩29,000
唔想食韓式，咁不如試吓轉口味，食Pizza啦！小編叫咗佢哋嘅番薯芝加哥pizza，超大份，一上到枱佢嗰陣香味真係聞到都令人流晒口水。
除咗Pizza呢度仲有意粉同埋梳打，意粉方面佢哋落咗好多蒜，令人食嘅時候超開胃，加埋一杯梳打，真係食到飽住走。
呢度有一塊大玻璃窗，望出去就係廣安里海水浴場，特別推薦大家可以喺日落時候嚟，更加有feel！
5. 海邊散步活魚超市（바다 산책 활어 마트）
- 地址：부산 수영구 민락수변로 105
- 小Tips：廣安站（광안역）1號出口附近搭大約20分鐘巴士
頭幾間雖然喺網上相當之出名，不過如果話想好似當地韓國人咁食好嘢，咁就一定係去「民樂水邊公園」！天氣好嘅時候，就會有唔少年青人喺附近買生魚片配埋燒酒，邊同朋友吹水邊食嘢。
呢度嘅生魚片係即買即切，價錢都好合理，最少₩20,000起，總共會有2款生魚片（ 鮻、比目魚），而₩30,000就會有3款（ 鮻、比目魚、石斑魚），但如果想食其他生魚片就要另外問老闆。如果大家覺得仲係唔夠飽，可以去隔離舖頭買埋煎餅，半半煎餅（泡菜加韭菜），一大份都只係₩5,000。
同朋友坐喺民樂水邊公園，邊食生魚片邊飲番杯，完全就係地道韓國人，之後一定要嚟體驗一吓！
6. 花豬湯飯（꽃돼지국밥）
- 地址：부산 수영구 민락로 35
- 營業時間：09:00 - 21:00（Break Time 15:00 - 16:00、20:30 Last Order）、逢星期日休息
- 小Tips：廣安站（광안역）1號出口行12分鐘
INSTAGRAM：FLOWERPORKSOUP
當然講到釜山，要食嘅又點可以唔提豬肉湯飯？而喺廣安里附近，小編推薦大家可以去「花豬湯飯」。
佢哋出名價錢平，一碗₩8,500，份量相當多，食嘅時候一啲豬腥味都冇，食嘅時候可以配埋佢哋嘅小菜：醃蘿蔔、辣韭菜同蝦醬一齊食。
身為食肉獸嘅小編，另外仲叫多咗白切肉（₩20,000），點少少醬再用生菜包住嚟食，超滿足！
7. Ro Ong（로옹）
- 地址：부산 수영구 광안해변로 145
- 營業時間：星期一 08:30 - 15:00、星期三至日 08:30 - 16:00（逢星期二休息）
- 小Tips：金蓮山站（금련산역）3號出口行7分鐘
INSTAGRAM @RO_ONG_BRUNCH
「Ro Ong」嘅木調裝修營造出一種溫馨風格，所有餐點用嘅都係新鮮食材，老闆娘仲會喺IG定期UP相。
Egg Benedict（에그 베네딕트）₩14,000
呢度每一款菜式唔單止好食，仲要係超好影，呢度仲有燉飯、多士等。之後有機會，不妨到你食一餐豐富嘅Brunch啦！
8. ISLD DE BLEU（아일드 블루）
- 地址：부산 수영구 광안해변로 125 우진빌딩 3F
- 營業時間：星期一至四&日 11:00 - 22:00、星期五至六 11:00 - 23:00（Break Time 15:00 - 17:00）
- 小Tips：金蓮山站（금련산역）5號出口行9分鐘
INSTAGRAM @ISLDDEBLEU_OFFICIAL
「ISLD DE BLEU」喺韓國SNS相當熱門，因為佢係一間景觀餐廳，邊食嘅同時仲可以望到大海，好有度假風情。
比起朝早去，小編更加推薦大家夜晚去，景色會更加迷人，再飲番杯啤酒，享受一個屬於自己嘅感性一晚。
因為呢度以風景取勝，所以喺食物方面價錢都會偏高，大約係₩15,000至₩25,000不等。
9. 豚笑（톤쇼우）
- 地址：부산 수영구 광안해변로279번길 13
- 營業時間：11:30 - 21:00（Last Order 20:00）
- 小Tips：廣安站（광안역）3號出口行18分鐘或者搭13分鐘巴士
如果想食日式風格餐廳，可以去民樂水邊公園附近嘅「豚笑」，呢度主打炸豬排料理，喺廣安里一帶算小有名氣。
什錦炸豬排（모듬카츠）₩15,500
巴克夏豬K炸豬排（버그셔K로스카츠）₩15,500
「豚笑」採用嘅係高質豬肉，一咬落去就食得出同平時食嘅唔一樣，鮮嫩多汁，採用帶有粉紅色澤肌理嘅巴克夏豬品種，就算唔點任何醬料都已經好好味！
10. 李夏亭醬蟹（이하정 간장게장）
- 地址：부산 수영구 광서로10번길 46
- 營業時間：11:00 - 21:00
- 小Tips：水營站（수영역）8號出口行3分鐘
「李夏亭醬蟹」獲獎無數，而且呢度嘅醬油蟹冇添加任何味精、糖同糖漿，可以食到蟹本身嘅鮮甜！
醬油蝦、醬油蟹、辣醬蟹全部都係呢度嘅招牌Menu，大家一定要用啲汁撈飯食！呢度仲有醬油鮑魚同醬醃大蝦，亦都有其他韓國美食任君選擇，相信大家一定可以食到超滿足！
11. 紅蟹Day（홍게데이）
- 地址：부산 수영구 광안해변로344번길 17-9 마린리치2 빌딩 6F
- 營業時間：11:45 - 21:30（Last Order 21:00）
嚟到無限任食餐廳「紅蟹Day」，大家可以用相對比較平嘅價錢食到一樣咁新鮮高質嘅紅蟹同大蝦，如果好彩坐到窗邊位，仲可以睇到一覽無遺嘅廣安大橋同東海海景！
呢間餐廳喺2022年上過韓國著名飲食節目，大家完全唔需要擔心食物安全問題！大家可以揀食紅蟹放題或者大蝦放題，仲有各種新鮮海鮮料理可以叫~
以上係小編整理好嘅廣安里美食餐廳總整理，間間風格都唔同，唔知大家最鍾意邊一間呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk