釜山海景Cafe總整理
去釜山點可以唔睇海？幫你整理好14間必去海景Cafe！
Hello，大家好，我哋係由韓國人每日提供最新韓國旅行資訊嘅Creatrip。
講到釜山又點可以唔去睇海？不過比起直接就咁直接睇，會唔會係想搵間Cafe坐低慢慢吹住海風，同朋友傾偈呢？今日小編整理咗13間海景Cafe，喺海雲台、南浦洞、影島甚至白險灘文化村都有！
釜山海景咖啡廳總整理
1. 機張Waveon Coffee（기장 웨이브온 커피）
- 地址：부산 기장군 장안읍 해맞이로 286
- 營業時間：10:00 - 00:00（Last Order 23:00）
- 優惠：下載優惠券，消費滿₩10,000免費送美式咖啡一杯
講到機張最出名嘅Cafe之一，一定係「Waveon Coffee」，因為佢鋪頭每一個角落都可以望到大海，甚至係出名建築師郭熙秀（곽희수）嘅作品，呢度亦獲得韓國建築文化大獎，去過嘅人都會好難忘。
除咗室內，仲有戶外、頂樓露台區等，每個位都坐得好舒服，而且仲可以望到大海！
2. 青沙浦H.US Coffee（에이치어스）
- 地址：부산 해운대 청사포로 135
- 營業時間：星期一至五 11:00 - 18:30（Last Order 18:00）、星期六至日 11:00 - 19:00（Last Order 18:30）
- 優惠：下載優惠券即享飲品9折優惠
喺海雲台再過少少就係青沙浦，呢到同樣出名睇海！而喺海岸邊防波堤前面，就有一間三層樓高嘅「H.US Coffee」，每一層都會有唔同配色，相當特別！
超推薦大家嚟到一定要坐窗口位，望住大海影返幅相！
3. 海雲台Edge 993（엣지993）
- 地址：부산 해운대구 달맞이길62번길 78
- 營業時間：星期日至四 11:00 - 21:00、星期五至六 10:00 - 22:00
由舊年海雲台觀光列車開通之後，由海雲台去青沙浦就簡單得多，而喺沿途鐵道隔離就有唔少可以望到大海Cafe，當中「Edge 993」最令小編印象深刻，雖然內部唔算好大，但望到嘅景就令人一世難忘。
望住五顏六色嘅小火車經過，在望住大海，真係超寫意，不過都要老實講句，呢度嘅飲品麻麻，係勝在裝修夠好。
4. 廣安里Byul Bed（별침대）
- 地址：부산 수영구 광안해변로 203
- 營業時間：星期一至五 10:00 - 22:00、星期六至日 10:00 - 00:00
除咗海雲台之外，另一個海灘最多人去嘅一定係廣安里！呢間「Byul Bed」除咗係一間Cafe，仲係一間酒店，大家喺一樓就可以坐低望住超靚海景。
就算唔住呢度嘅酒店，只係需要俾₩11,800買入場券，就可以享有自助吧，上到2樓仲可以望到廣安大橋！
5. 海雲台Cafe In Busan（카페 인 부산）
- 地址：부산 해운대구 달맞이길117번가길 175 4F
- 營業時間：11:00 - 22:00（Last Order 21:15）
「Cafe In Busan」係一間好似美術館咁嘅Cafe，點影都好靚！
2020年開幕嘅「Cafe In Busan」入面每一個擺設都好有特色，而且上到天台仲可以望到超靚海景。天氣好嘅時候超推薦大家上嚟坐，不過有一個缺點係位唔太多。
6. 青沙浦Cafe Roof Top（카페 루프탑）
- 地址：부산 해운대구 청사포로 139-4
- 營業時間：11:00 - 22:00
- 優惠：下載優惠券即享全單9折優惠
「Cafe Roof Top」喺青沙浦好出名，每一次去都要等一陣先會坐到靚位，所以小編建議，如果係同朋友一齊去嘅話，一定要識分散投資，一個去落單、一個去搶位。
「Cafe Roof Top」顧名思義，最吸引人嘅就係頂樓露台，呢到分咗唔同區域，每個位都有唔同風格，但靠近大海嘅嗰一邊會比較搶手。
7. 白淺灘手腕書店（손목서가）
- 地址：부산 영도구 흰여울길 307
- 營業時間：每日 11:00 - 19:00
可能好多人去到釜山都會去甘川洞文化村，不過小編反而想推薦大家去白淺灘文化村。呢度相對冇咁多遊客，反而多韓國人聚集，呢度有唔少隱藏Cafe同餐廳，當中小編想推薦「手腕書店」。
一入到Cafe，大家會見到呢度有超多書，好多人都會喺度慢慢睇同嘆咖啡。不過除咗睇書，呢到仲有一個望海打卡位，大家下次去一定要坐喺前面影返幅留念啊！
8. e.c.t（에쎄떼）
- 地址：부산 영도구 대평북로 29
- 營業時間：10:30 - 19:00（Last Order 18:30）
- 優惠：下載優惠券即享全單9折優惠
大家可能會對呢個地方有啲陌生，但其實佢係南浦洞每日14:00固定起降嘅影島大橋，所連接另一邊區域嘅「影島區」。e.c.t係由造船廠改建而成，裝修都隱有以前工廠痕跡，唔知係咪因為咁，增添咗一啲復古味。
上到二樓大家可以坐喺窗邊欣賞釜山港景色，邊望邊嘆咖啡，真係好寫意。
9. 白淺灘Beach（흰여울비치）
- 地址：부산 영도구 절영로 236
- 營業時間：星期一至五 11:00 - 20:00（Last Order 19:00）、星期六至日 11:00 - 21:00（Last Order 20:00）
「白淺灘Beach」嘅外牆係粉紅色，好容易就搵到佢！比起頭先介紹「手腕書店」係以文青風格取勝，咁呢間就係集結所有KOL打卡必備元素。鋪頭相對較大，而且仲有露台區域，天氣好嘅時候坐喺度，吹住海風，絕對係一大享受。
呢度每一個位都可以成為打卡位，飲品方面亦都唔錯，之後大家又會唔會想嚟呢？
10. Yeoulmarq（여울마크）
- 地址：부산 영도구 흰여울길97
- 營業時間：星期一至五 11:00 - 19:00、星期六 11:00 - 20:00（逢星期日休息）
- 優惠：下載優惠券，叫飲品即可免費獲得「See Sea with BOOK」2小時使用券
「Yeoulmarq」老闆話希望每位客人嚟到都可以透過咖啡香味去記住當下呢個瞬間，真係好浪漫~ 呢度室內同室外都有位可以坐，日頭去可以望到藍天白雲，黃昏去又可以見到日落，夜晚去更加可以睇到無敵夜景+海景，每個時段都各有各特色！
呢杯係「Yeoulmarq」嘅招牌咖啡，就好似將釜山嘅形象融入咗落去咁，顔色配搭好靚！呢款咖啡每日限量賣30杯，上面層cream可以揀要粉紅鹽焦糖味或者Valrhona可可粉味，小編就揀咗前者，鹹鹹甜甜超得意！
11. 甘川洞友人咖啡（우인 카페）
- 地址：부산 사하구 감내2로 172
- 營業時間：09:00 - 19:30
- 優惠：下載優惠券，叫飲品送餅乾
講完白淺灘文化村，又點可以唔提埋甘川洞文化呢？除咗可以望到五顏六色嘅小屋之外，仲可以望到釜山港。
「友人咖啡」曾經係三星手機廣告拍攝地，特別係黃昏嘅時候去，影到嘅相都特別靚！
11. 廣安里CUP&CUP（광안리카페 컵앤컵）
- 地址：부산 수영구 광안해변로 177 4&5/F
- 營業時間：10:30 - 22:00（ 天台同5/F只開放到20:30、Last Order 21:30）
「CUP & CUP」位於廣安大橋前面，搭Lift上到4樓就會睇到超靚海景。
坐喺天台可以吹住海風，同朋友喺度傾偈真係好正！而且仲可以望到廣安大橋，打卡一流！
12. Alice Donut 青沙浦店（앨리스도넛 청사포점）
- 地址：부산 해운대구 청사포로128번길 22
- 營業時間：星期日至四 09:30 - 22:00、星期五至六 09:30 - 23:00
大家冇睇錯！呢度係釜山唔係夏威夷！呢間冬甩鋪最近喺青沙浦超紅，可以直接睇到海景同雙胞胎紅白燈塔！
超多韓國人都喺呢度打過卡，可以望住藍色大海+白色雲朵+金色陽光嘆咖啡食冬甩，真係超Relax！
除咗景夠正，呢度嘅冬甩都好靚！冬甩大約係₩2,500~4,000一個，外賣嘅話仲會好似上面張相咁幫你用一個靚紙盒裝住~
13. ISLD De BLÉU（아일드블루）
- 地址：부산 수영구 광안해변로 125 우진빌딩 3F
- 營業時間：星期一至四&日 11:00 - 22:00、星期五至六 11:00 - 23:00（Break Time 15:00 - 17:00）
「ISLD De BLÉU」 係廣安里其中一間超出名嘅Brunch Cafe，呢度海景真係一流！
大家可以揀坐室內定室外，不過就算坐喺餐廳入面都可以清楚見到廣安大橋！
Instagram @islddebleu_official
一份Brunch平均係₩15,000，飲品同酒就大概係₩5,000~7,000，味道都相當唔錯，真係影得又食得！
14. Cha Sun Cheak（차선책）
- 地址：부산 수영구 광안해변로 237 3F
- 營業時間：11:00 - 22:00（Last Order 21:30）
「Cha Sun Cheak」係另一間最近超受韓仔韓妹歡迎嘅Cafe，可以欣賞到廣安大橋同釜山海景。
呢度裝修沿用傳統韓屋設計，俾人一種平靜療癒嘅感覺！
「Cha Sun Cheak」嘅蛋糕全部都係自家製同Gluten-free（唔含麩質），啱曬注重健康嘅朋友們！蛋糕大約係₩7,500左右，而飲品就大部分係₩5,500~7,500，呢個價錢可以享受到咁高質嘅餐飲同睇到咁靚嘅景，都真係幾超值！
以上係小編最新整理嘅2023最新釜山海景Cafe推薦List，大家會想去邊一間呢？歡迎留言同小編分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk