釜山「民樂水邊公園+生魚片店」介紹
邊望廣安大橋邊食生魚片！點樣食先係最地道？跟住小編去一轉民樂水邊公園啦！
Hello，大家好，我哋係由韓國人每日提供最新韓國旅行資訊嘅Creatrip。
去得釜山又點可以唔食生魚片？如果想食得最地道，小編推薦大家可以去民樂水邊公園！大家可能會覺得喺公園食會唔會好怪？絕對唔會！因為韓國人都係咁食！而且試過一次之後會令人難忘，睇完之後快啲約埋三五好友之後嚟韓國去食啦！
「民樂水邊公園+生魚片」介紹
- 地址：부산 수영구 민락수변로 129 수변공원
喺正式入去民樂水邊公園之前，如果大家有諗住坐喺嗰度食生魚片，門口會有地席俾大家買（或者去便利店買都得）。
當日小編大約係夜晚6點左右去到，已經見到有唔少人坐喺度食緊，或者同朋友飲返杯傾緊偈。
喺附近大家會見到有好多生魚片店，大家可以喺餐廳食亦都得。不過如果想好似韓國人咁地道嘅話，就一定要去海旁邊望海邊食。
而喺海旁正對面，大家就會見到呢一間바다 산책 활어 마트，佢超大，有做賣生魚片、有做熟食，同時亦有做小型超市。因為小編見到都多人買，所以就跟風去口咗啦
入到去賣生魚片區，呢度有好多間鋪頭，但一入去已經俾第一間（세부산 상회）老闆說服 小編見到都好新鮮就喺度買咗啦。
呢度係20,000won起，總共會有2款生魚片（ 鮻、比目魚），而30,000won就會有3款（ 鮻、比目魚、石斑魚），但如果想食其他生魚片就要另外問老闆。因為呢度係即買即切，所以俾完錢之後，老闆會叫大家去附近行吓，20分鐘之後再返去。（提提大家：呢度冇另外俾牌話叫大家返去拎，因為基本上老闆會認得大家，如果怕可以拎定收據，到時再去同老闆確認。）
喺等緊期間，小編就去咗隔離睇吓有冇咩熟食，見到好多人都買呢個半半煎餅（반반전），佢係泡菜＋韭菜，真係唔係講笑，超大份！價錢只係5,000won，相當之抵。（如果只係食指定一款，價錢都係一樣5,000won）
買完食又點可以唔買飲品呢？小編覺得如果只係買少少可以去便利店，如果多嘅可能去超市買會抵啲。
買完好好彩地即刻搵到一個好位，望住佢哋真係覺得好幸福....而家諗返去口水都流啦
半半煎餅 (반반전) - 5,000won（約HKD35）
雖然平時喺首爾都可以食到煎餅，但係要食到半半嘅地方真係唔算多，呢度嘅煎餅即叫即煎，所以食嘅時候仲係會熱辣辣，大家可以點鼓油嚟食，小編覺得兩款都好好味，但如果要揀其中一款，韭菜會更加吸引。
生魚片 (회 - 밀치+광어) - 20,000won（約HKD140）
食生魚片邊度都可以食，但望住廣安大橋食真係第一次，唔知係唔係因為個景，覺得食嘅時候特別有feel同好味。買嘅時候老闆會提供兩款醬俾大家，大家只要跟據個人口味去點就可以。
食完之後，大家唔好唔記得要清理好，將垃圾拎去揼啊！
小編之前都去過幾次，晏就同夜晚去，完全係兩個feel，如果大家鍾意食生魚片，之後去釜山一定要試吓去民樂水邊公園啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk