聖水洞/建大體驗活動總整理
想整返一支獨一無二嘅唇膏？想喺首爾林可以野餐？跟住小編腳步去聖水洞/建大一帶啦！
Hello，大家好，我哋係由韓國人每日提供最新韓國旅行資訊嘅Creatrip。
位於首爾東部嘅聖水洞、建大一帶深受韓國年青人歡迎，唔單止多美食同Cafe，就連體驗活動都相當多，今日就等小編同大家介紹有咩好玩啦！
聖水洞/建大體驗活動總整理
1. 首爾林（서울숲）
- 地址：서울 성동구 성수동1가 678-1
- 小Tips：首爾林站（서울숲역）4號出口行2分鐘
「首爾林」附近有好多出租野餐用具嘅鋪頭，大家可以喺cafe買飲品、蛋糕之後拎走，帶上可愛野餐墊，喺首爾林享受一次特別野餐。亦都可以租單車吹吹風，感受都市中心難得一見嘅綠林景觀，相當寫意。
入面仲有個梅花鹿公園，可以同佢哋互動，相當療癒。
2. Amore聖水（아모레 성수）
- 地址：서울 성동구 아차산로11길 7
- 營業時間：10:30 - 20:30（逢星期一休息）
- 小Tips：聖水站（성수역）2號出口行4分鐘
「Amore聖水」係愛茉莉太平洋公司旗艦店，可以喺呢度整出屬於自己嘅粉底，同時製作出獨一無二嘅唇膏，非常新穎，去到現場可以先睇吓有咩色再測試，之後再諗要唔要加香味，職員會一直喺隔離幫手。製作唇膏成個過程大約係半個鐘，大家之後會唔會都想整返支獨一無二嘅唇膏呢？
3. 建國大學（건국대학교）
- 地址：서울 광진구 능동로 120
- 小Tips：建大入口站（건대입구역）4號出口
建國大學入面有一個名叫一鑑湖（일감호）嘅湖泊，只要一到夜晚，就會有唔少人嚟散步，行到攰仲可以坐喺湖邊。另外建大內最出名嘅建築，就係呢棟用紅磚砌成嘅建國大學博物館，裡面可以參觀各種文物，上午10點至下午4點免費入場。
tvN
如果係眼利嘅朋友，都可能會發現tvN韓劇《鬼怪》都有嚟過取景添！
4. 兒童大公園（어린이대공원）
- 地址：서울 광진구 능동로 216
- 營業時間：平日10:00 - 18:30、週末10:00 - 19:30
- 費用：成人₩28,000、小童₩25,000
- 小Tips：兒童大公園站（어린이대공원역）1號出口行1分鐘
「兒童大公園」好近建國大學，行過去或者搭地鐵都得，只要一到春天，好多人都會嚟賞櫻，現場仲有野餐區、遊樂設施，係首爾市民最鍾意嘅親子園區之一。
雖然「兒童大公園」比起樂天世界、愛寶樂園規模細啲，但遊樂設施同動物園仍然吸引唔少家庭嚟。
5. KiLab Board Game Cafe（키랩 보드게임 카페）
- 地址：서울 광진구 아차산로33길 49
- 營業時間：星期一至四 13:00 - 24:00、星期五 13:00 - 01:00、星期六 12:00 - 01:00、星期日 12:00 - 24:00
- 費用：平日1小時 ₩2,400、週末1小時 ₩3,000
- 小Tips：建大入口站（건대입구역）3號出口行5分鐘
建國大學有一間評價極高嘅Board Game Cafe，呢度入場每人要叫一杯飲品，有咖啡到果汁，價錢大約₩3,800至₩5,500不等（需另加使用時間費）。呢度嘅Game多不勝數，仲有好多間房，好有私人空間，同朋友嚟玩完全唔知時間過。
呢度係睇你玩幾耐再去計返錢，唔會好貴，如果帶小朋友去，一定都會玩得好開心！
6. 人生四格（인생네컷）
聖水洞同建大一帶都會見到好多間「人間四格」，好多時經過都忍唔住入去睇吓有咩頭飾。
通常影一次費用係₩4,000/ 1＋1，之後可以同朋友影返輯留底一個美好回憶！
7. odt.mode（오디티모드）
專業自助照相館「odt.mode」喺韓國總共有17間分店，喺聖水同建大就有分別各有一間！大家有20分鐘可以自由影，因為可以自己控制影相時間，所以無論係表情定pose都會比較自然。如果怕太單調，鋪頭仲有準備一啲道具俾大家！
8. 纛島漢江公園（똑섬한강공원）
- 地址：서울 광진구 강변북로 139
- 小Tips：纛島遊園地站（뚝섬유원지역）2號出口出
講起首爾當然唔少得漢江公園，而當中「纛島漢江公園」都好近聖水洞同建大！
由地鐵站出嚟就係廣場，無論幾時嚟都有好多人喺呢度休息。
纛島漢江公園有鴨仔船、水上單車、橡皮艇、遊艇等各式各樣水上活動，好似咁鴨仔船搭30分鐘，價錢就係￦25,000左右，大家同家人、朋友、另一半嚟都可以玩得開心。
9. Juno Hair聖水店（준오헤어 성수역점）
- 地址：서울 성동구 아차산로 103
- 營業時間：10:00 - 21:00
- 小Tips：聖水站（성수역）1號出口行1分鐘
唔知大家之前有冇諗過要喺韓國剪過最新同流行髮型呢？如果有，不如可以試吓去連鎖髮型屋「Juno Hair」，聖水都有分店㗎！有需要嘅朋友，都可以透過我哋預約㗎！
之後計劃去聖水洞同建大嘅朋友，不如加埋以上地點落行程啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
