木浦一日遊行程推介
木浦一日遊行程推介！想體驗80、90年代係咩感覺？嚟木浦一定唔會有錯！
Hello，大家好，我哋係由韓國人每日提供最新韓國旅行資訊嘅Creatrip。
之前一直有網民想小編介紹多啲一日遊嘅行程，今次小編就想帶大家去木浦，大家可能對呢個地方唔太熟悉，但其實呢度係一個超有魅力嘅景點，好多韓劇都係喺度拍，同時亦係Super Junior 東海嘅故鄉，如果想知佢有咩咁吸引，就要繼續睇落去啦！
木浦一日遊行程推介
由首爾去木浦搭KTX大約係2個半鐘，如果想玩盡小編建議可以早啲出發，當日小編係搭朝早7:42車，去到木浦大約係10:14。（提提大家買飛嘅時候，記住要check清楚係喺首爾站定係龍山站出發，千祈唔好去錯）
小編其實今次已經係第二次去木浦，不過心情同樣興奮，好期待今次會發掘到咩新事物！
行程一：近代歷史館1館
地址：전남 목포시 영산로29번길6
營業時間：星期二至星期日及公眾假期 9:00 - 18:00 （逢星期一及1月1號休館）
第一個想同大家介紹嘅景點係大家去木浦都一定會去嘅近代歷史館，因為呢度係出名拍《德魯納酒店》嘅拍攝地，當時節目一出，已經引嚟唔少人去打卡。
想成為IU社長，就一定要企喺呢個門口度打卡啦！（當日小編早到，好好彩可以不斷影，平時真係好難等，因為每個人嚟度都一定會企喺度打卡！）
入到去大家可以見到古代同現今嘅模型，每一個都做得好精緻。
同時呢度仲有一個打卡位，一邊係以1919年4月8號萬歲運動作為背景，大家可以借呢度嘅校服、鞋嚟影相，另一面就係《德魯納酒店》打卡位。
除此之外，入面仲有唔少可以互動嘅設施，就算只係得韓文都可以玩得好過癮。
睇完歷史館大家可以行出嚟往後行會見到一個防空洞，大家千祈唔可以唔睇就走啊！
行程二：詩畫村 (시화마을)
地址：전남 목포시 서산동12-89
嚟到呢度大家就好似瞬間返番去90年代咁，呢度唔單止多遊客鍾意去，就連好多韓國人都會去，因為呢度係好多韓劇取景拍攝地，就好似電影《1987:逆權公民》、電視劇《Do Do Sol Sol La La Sol》等。
由底開始一路行，大家會去到呢個十字路口，呢度總共有3條路俾大家揀，第一條（첫째）相對比較輕鬆啲，嗰度有一間好出名嘅cafe，第二條（둘째）係一條直路，行到最高可以望到詩畫村嘅每一個角落，第三條（셋째）係去電視劇嘅《Do Do Sol Sol La La Sol》拍攝地。
因為沿途都會有好多路牌，所以大家行嘅時候唔需要怕會行錯或蕩失路。
呢間就係好多人嚟度都會去嘅cafe（카페눈의꽃），只睇外牆已經可以見到佢裝飾得好有feel，如果大家之後嚟行到攰都可以入去休息下。
行程三：東部市場(동부시창)
營業時間：每一間鋪頭都唔一樣
地址：전남 목포시 산정로 174
行完詩畫村開始肚餓當然要去食返餐啦！小編之後嚟搭車嚟度呢個全木浦最大嘅東部市場，呢度無論係服飾、日常用品、熟食、生食等都可以喺度買到！
呢度所有食物小編覺得價格相當親民，大大粒嘅士多啤梨都有好多唔同價位，一盒4,000到8,000won左右，有啲仲平到10,000won有三盒！
小編一開始一心一意諗住嚟食呢間炸魚糕店，點知不幸地當日老闆有事突然要休息一日 如果大家之後去食到，一定要話俾小編知好唔好食（因為喺Naver個個留言都係有讚無彈）
不過之後好彩小編都搵到一條專食豬血同豬腳嘅街，味道同首爾有啲唔同，呢度嘅湯飯係內臟湯，同平時食開嘅豬肉湯飯好唔同，大家有興趣之後都可以嚟試下。
行程四：Yudal Milk (카페 유달유업)
營業時間：8:00 - 21:00 星期二至星期六 12:00 - 22:00、星期日 12:00 - 21:00、逢星期一休息
地址：전남 목포시 북항로 119
食飽之後當然要搵間cafe坐下，呢幾年喺韓國復古風真係好流行，小編同朋友就去咗呢間最近好紅嘅Yudal Milk，由門口到入到去都好似返番去80、90年代咁。
呢間cafe好貼心，為咗大家可以更加似返番去8、90年代，仲有提供唔同復古風格嘅衫。而同時呢部遊戲機，真係令到小編中哂毒 每一次玩係100won，猜贏最多可以有100-2000won，打和可以繼續玩，不過猜輸就等於game over。
樽裝牛奶係呢度嘅招牌飲品，如果大家想留返個樽，只要加500won就可以帶走。
行程五：木浦天空步道 （목포 스카이워크）
營業時間：每日16:00 - 03:00
地址：전남 목포시 해양대학로 77 1층
木浦天空步道係喺2020年7月正式開放，開咗冇幾耐已經成為好多人嘅打卡熱點，總長54米，離海平面15米，有三份二都係有透明玻璃面造成，行嘅時候相當刺激。
如果大家夠大膽，當然仲可以挑戰呢個吊床，由兩層網組成，為安全起見，每一次只可以限一人使用。（提提大家，雖然係好安全，不過千祈唔好喺上面跳啊！）
喺天空步道上會見到一間超有feel嘅cafe，大家亦可以去嗰度嘆杯咖啡，另外行完天空步道之後，小編再去咗附近沙灘行下，呢度有個彩虹樓梯，樓梯上每一句都係咁介紹木浦有啲咩，大家可以學小編一樣咁樣坐喺度打卡。
行到盡頭嘅時候，小編仲發現咗呢度嘅彩虹步道？坐喺前面仲可以同木浦大橋一齊打卡，小編喺IG見到唔少韓國人都鍾意企喺上面拍片，不過當日小編去嘅時候實在太大風，所以就唔敢挑戰
行程六：月夜餐廳 (달밤)
大家會唔會想邊望海景邊食海鮮餐呢？咁呢間月夜餐廳大家就一定唔可以錯過啦～
小編同朋友兩人叫咗一個달밤조개구이（中份），份量真係超多，覺得3個人食都可以好飽！
另外之前小編去嘅時候，仲有一個月亮俾大家可以坐喺前面打卡，不過唔知係咪因為太早去，所以當日就冇得影，大家如果之後去一定要影返張啊！
行程七： CLB Bakery （씨엘비 베이커리）
營業時間：每日8:00 - 21:00
地址：전남 목포시 영산로75번길 14 1층
嚟度最後一站小編都係忍唔住買多個包食 佢同木浦站唔會好遠，行過去只係5分鐘左右，返首爾前或者當買手信亦都得。
雖然呢度有賣好多唔同種類嘅麵包，不過最出名嘅係忌廉芝士麵包同埋蝦醬麵包，兩款價錢都一樣只係₩5000。
呢間麵包店上過唔少節目，喺今年仲拎咗消費者親善大獎添！如果大家都鍾意食麵包就要嚟買嚟試吓啦！
最後買完麵包，小編就要返首爾啦 木浦真係一個好有魅力嘅城市，可能當中小編有啲地方冇介紹到，如果大家之前有去過，或者之後有計劃去，不妨都可以留言話俾我哋知一齊討論下，希望大家都會滿意呢個木浦一日遊推介啦
如果有更多想知嘅內容，都可以隨時留言或者dm話俾我哋知：）
Instagram：creatrip.hk