Hello，大家好，我哋係由韓國人每日提供最新韓國旅行資訊嘅Creatrip。
呢幾年喺韓國復古風真係好流行，今次小編去木浦計劃行程嘅時候，就無意發現到呢間（유달유업）嘅cafe，只係睇相已經好似返番去80、90年代咁，如果你都係鍾意懷舊嘅話，小編真心好推薦大家之後去！
木浦「Yudal milk」介紹
韓文店名：유달유업
Instagram：yudal_milk
營業時間：8:00 - 21:00 星期二至星期六 12:00 - 22:00、星期日 12:00 - 21:00、逢星期一休息
地址：전남 목포시 북항로 119
小Tips：由木浦站搭3號、13、15號巴士，喺西部小學（서부초등학교）落車，cafe就係喺對面。
只係睇門口，大家感唔感受到好似真係返咗80、90年代嘅時候呢？外牆雖然有啲殘夠，但就咁樣顯得佢好有歲月痕跡。
呢度嘅Menu好特別，好似係用咗雜誌形式？咁樣去介紹。
每一頁都有唔同飲品嘅介紹，就好似有咖啡、果汁、牛奶、梳打等。
而咁多款飲品之中，呢度嘅樽裝牛奶同係最受歡迎，如果大家想買呢啲樽返去留念，亦只係需要再加多500won。
呢度無論係飲品、小食，定係裝修擺設都係好復古同懷舊，令到唔少人嚟到，都會好似返返去童年回憶咁。
呢啲就係小編講嘅最受歡迎樽裝牛奶，係唔係有啲似以前細個大家都會飲嘅維記樽裝牛奶咁呢？
為咗更有氣氛，呢度仲有提供好多復古服飾俾大家著嚟打卡。
另外小編完全係俾呢一部遊戲機吸引，佢主要係有三個制（剪、包、揼）（由左至右），大家要同電腦對賽，每一次玩係100won，猜贏最多可以有100-2000won，打和可以繼續玩，不過猜輸就等於game over，相當之有中毒性！
小編當日一開始手氣都算好，用100won就中咗400won，不過之後就……..
最後小編就叫咗呢度兩個招牌飲品，分別係士多啤梨鮮奶同伯爵奶茶，喺飲之前大家記得要先搖吓，老闆話咁樣會更加好飲。
叫飲品老闆仲會送兩粒糖，只睇包裝已經好有懷舊感覺，佢其實係薄荷糖嚟，食嘅時候唔會好甜，而且仲有種涼爽嘅感覺。
呢間cafe相當受歡迎，都有唔少名人嚟過，大家只睇相又認唔認得出係邊個呢？同時呢度仲榮獲咗「有善咖啡廳」獎項添！
呢度每一個位都好適合打卡，想坐得舒服啲可以揀坐梳化位。
就連一啲小擺設老闆都唔會放過，喺cafe入面大家好似不斷會尋到寶咁。
之後行入少少，呢度有好幾間唔同主題嘅房，而上圖呢一間就有啲似返咗去《請回答1988》嗰陣時咁。
呢個係一個走廊位，雖然都好有feel，不過坐嘅時候就唔係太方便 但都建議可以喺度打返張卡先。
而呢一間房最多只可以坐四個人，隔離仲有一個浴缸俾大家打卡，想要啲私人空間可以坐呢一間房！
而呢間房有3張檯，如果多人嘅可以揀喺呢間度坐，同樣都係好有feel。
最後一間比較特別，因為最靠近女廁，所以只限女仔可以坐。
如果大家本身都對懷舊餐廳或Cafe有興趣嘅話，真係相當推薦大家嚟呢度感受一吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
