木浦「CLB BAKERY」介紹
木浦人氣麵包店「CLB BAKERY」介紹，令一人試難忘嘅忌廉芝士麵包，真係食過番尋味！
Hello，大家好，我哋係由韓國人每日提供最新韓國旅行資訊嘅Creatrip。
如果講到木浦麵包店，大家可能都會最先諗起COLOMBANG製菓店，雖然佢係好出名，但喺韓國人心目中CLB BAKERY先係更出名，唔少電視節目都介紹過，同時佢喺Naver搜尋係排第一，5分入面拎4.63分！到底佢冇咩咁特別同吸引就等小編繼續帶大家睇落去啦！
木浦「CLB BAKERY」介紹
營業時間：每日8:00 - 21:00
地址：전남 목포시 영산로75번길 14 1층
小Tips：由木浦站行大概5分鐘左右。
呢間CLB BAKERY位於木浦站附近嘅光之街區域，行過去大約只係需要5分鐘左右，當日小編係夜晚去，不過都仲有唔少客人會大量咁購買。
呢度嘅麵包標榜住係冇落防腐劑，所以上面都有寫到如果可以最好盡量快啲食，如果未食住就最好放入雪櫃保管。
呢度嘅麵包種類有好多款，每一款都相當之吸引，而且價錢都唔貴，另外因為而家受疫情嘅影響，舖頭亦好貼心咁用袋去包住，相當之衛生。
呢度仲有蛋撻同埋糯米糍賣，雖然香港都有得買，不過大家之後嚟又會唔會想買試吓食完再比較呢？
除咗麵包之外，呢度仲有賣好多曲奇同餅乾，好啱返工有時口痕嘅時候拎嚟食。
有時返學或者返工前好趕住出門口，又冇時間食豐富嘅早餐，不妨都可以買呢度嘅果醬搽麵包食，分別有士多啤梨醬同埋無花果醬，當中小編會比較推薦大家可以買無花果醬，因為係由木浦地區自己整，喺其他地方係買唔到㗎！
同時呢度仲有幾款造型蛋糕（小編當日遲去，如果早到應該會有好多款揀），相信如果買一個Elsa蛋糕俾小朋友嘅話，佢哋一定會好開心。
雖然呢度有好多款麵包，不過佢哋最出名嘅都係忌廉芝士麵包同埋蝦醬麵包，兩款價錢都係一樣只係₩5000，小編糾結咗一段時間最後決定買忌廉芝士麵包。
買完之後大家仲可以坐喺度慢慢食麵包。
食之前梗係要打返張卡啦！麵包係用錫紙包住，最貼心嘅係呢度已經將麵包切成一嚿嚿，大家食嘅時候都可以好方便。
雖然買嘅時候唔係新鮮出爐，不過大家可以見到真係有好多忌廉芝士，每一舊都好濃郁，原本一開始都會怕食得多會好膩，但佢完全冇呢種感覺。
如果大家都係想食熱辣辣嘅麵包，呢度仲有微波爐大家可以自己叮。喺等緊嘅期間仲可以見到呢間麵包店上過幾多次電視，喺今年仲拎咗消費者親善大獎添！
如果大家之後去木浦，不妨都試吓呢一間麵包店，好多人食完都一試難忘，或者可以買啲小餅乾返去做手信送俾朋友或屋企人。
如果有更多想知嘅內容，都可以隨時留言或者dm話俾我哋知：）
Instagram：creatrip.hk