Hello，大家好，我哋係由韓國人每日提供最新韓國旅行資訊嘅Creatrip。
木浦市係韓國全羅南道嘅一個港口城市，位於黃海沿岸，既然咁近海，當然要食佢哋最道地同最出名嘅海鮮啦！今日小編要同大家介紹嘅呢間「月夜」人氣相當高，夜晚更加係超有feel～～想知喺邊就要繼續留意落去啦！
木浦「月夜」餐廳介紹
營業時間：每日16:00 - 03:00
地址：전남 목포시 해양대학로 77 1층
小Tips：喺木浦天空步道同彩虹橋附近。
交通：喺木浦站搭1號巴士，喺유달유원지 정류장落車，落車後經過天步空道落到沙灘，行頭右邊盡頭就會見到㗎啦。
呢間月夜餐廳位於天空步道附近，如果大家去完夜晚想搵間餐廳食飯，小編真心推薦大家可以嚟呢度。
其實之前小編已經去過一次，因為之前太晏去，所以大約等咗一個鐘左右，所以吸取教訓之後，小編呢次大約係五點左右去到，好好彩係唔需要等位。
入到去大家可以揀坐室內或者室外，小編去嘅時候天氣都幾唔錯，趁冇人嘅時候梗係揀室外啦！
坐低之後職員就會俾份Menu大家睇，基本上大家嚟到都係會叫달밤조개구이，小編兩個人去所以叫咗中份。
唔使等好耐，職員就會為大家送上小菜。
一開始燒嘅時候因為火好大，所以職員會先幫大家將蜆、帶子、飽魚等排好，大家只要等食就好。
等到差唔多到熟嘅時候，大家可以將佢哋返翻吓，或者再剪細粒啲食。（大家一定要小心，要戴好手套）
唔知係咪因為特別近海，所以呢度嘅食材好新鮮，食嘅時候雖然有啲鹹，不過只要點辣椒醬就可以中和返。
帶子同芝士一齊食，入口即溶嘅感覺真係好正！
食完第一輪之後，大家可以將剩低嘅材料慢慢擺上去繼續燒。
最後大家一定要食埋燒栗子做結尾（因為太好食，小編唔記得咗影相 ）
另外之前小編去嘅時候，仲有一個月亮俾大家可以坐喺前面打卡，不過唔知係咪因為太早去，所以當日就冇得影。
同時之前小編夜晚去嘅時候，仲見到有人會喺海邊前面放炮仗，完全係另一個feel。
小編分別喺唔同時間都去過，不過如果可以揀，會覺得夜晚去會更加有feel，可惜嘅係就可能要等位
如果大家都鍾意邊睇海邊景邊食海鮮，小編真心覺得呢個唔錯，價錢亦都唔算貴，之後有機會去木浦，不妨就去試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
