木浦「東部市場」介紹
木浦最大傳統「東部市場」介紹，當地有咩好食？有咩好買呢？
Hello，大家好，我哋係由韓國人每日提供最新韓國旅行資訊嘅Creatrip。
去旅行，除咗要瘋狂Shopping同食，去唔同打卡景點之外，小編個人覺得，每個地區嘅傳統市場都好值得大家行番轉！因為喺嗰度可以食到最地道嘅小食之外，好多時仲會尋到寶，同時仲會發現好多小驚喜！
今次小編去咗木浦嘅東部市場，如果大家都鍾意行呢類嘅傳統市場，就要繼續睇落去啦！
木浦「東部市場」介紹
營業時間：每一間鋪頭都唔一樣
地址：전남 목포시 산정로 174
小Tips：由木浦站搭6或10號巴士，喺東部市場站（동부시장）落車。
東部市場位於木浦市中心，由木浦站搭去都只係需要10分鐘，相當之快同方便，呢度有大約375間店鋪，係木浦最大嘅市場，基本上大家諗到嘅呢度都有得買！
小編相信呢度有分好多個入口，而小編一落車行過去就係「南門」（남문）。
由南門一入去，最先會見到呢度有賣唔少服飾，由小朋友到成人都一樣有，價錢一啲都唔貴。
成人上衣、背心外套5,000won就有交易！
小朋友嘅衫更加可以平到一件3,000won、兩件5,000won！真係等住大家嚟尋寶！
之後再行前少少會見到呢度都有賣棉被，可能好多人都會去首爾嘅廣藏市場買，不過而家因為疫情影響又買唔到，都可以搵我哋代購㗎！
除咗服飾之外，呢度仲有唔少生活用品買，成日喺韓劇見到嘅金煲呢度都有唔同款式，用佢嚟煮拉麵真係最正同埋冇得頂！
嚟韓國係唔係覺得成日只係食肉，好少食菜，但又煮唔到嘅情況底下，食生果就一定冇錯！呢間聲稱係全木浦入面最平嘅生果店，全部睇落都真係好新鮮，大大粒嘅士多啤梨都有好多唔同價位，一盒4,000到8,000won左右，有啲仲平到10,000won有三盒！ 價錢平到咁真係好難令人唔買！
小編最欣賞呢度嘅係，每一間鋪頭擺放出嚟嘅無講係食物，定係服飾都擺放得好整齊，令人忍唔住會想一直望。
一路行仲會發現好多唔同食店，麵包店、餃子店、年糕店、小菜店等等，每一款都好吸引，令人睇到完全唔想走....
喺去東門市場小編都有做足功課，話去到一定要食炸魚糕！每日新鮮即整即炸，小編一心都好期待，想試吓佢到底有幾好味！
點知當日去到，隔離鋪頭姨姨同小編講，佢都話：「本身佢（年糕店）係年終無休，每日都好多人嚟食，不過因為今日老闆有急事，所以先冇開門。」
雖然好失望，但都想喺門口前打返張卡，希望大家之後嚟都可以去食到！（如果之後有開，可唔可以食埋小編嗰份 ）
之後再行咗一陣，小編就發現到呢度有條食血腸同豬腳街，未入去之前已經聞到好香豬腳味，小編又點可以錯過呢？
不過入到去先發現唔係好多間，小編即刻喺Naver度搵，最後發現最多人推介呢一間元祖米血腸（원조찹쌀순대），喺門口已經可以見到有唔少肥美豬腳，睇落全部都好正！
人到去果然係超多客人，幾乎係坐滿曬，最後小編就叫咗一碗湯飯（국밥）同迷你豬腳（미니족）。
落完單老闆好快就會上曬小菜，唔係講笑真係超多～～之後等咗陣就湯飯同細豬腳就上檯啦！
首先同大家介紹呢個豬腳先，小編一開始以為迷你豬腳應該會有半隻....點知原來미니족嘅意思係只有骨同少肉（所以如果大家只係想食豬腳，一定要叫왕족발） ，一開始小編都好驚訝，點知食食吓又覺得幾好味。
另外呢一個湯飯，小編見到好多檯都有叫所以跟風食，佢同平時嘅湯飯唔同，呢度係內臟湯飯，材料非常多，辣辣地幾惹味。
整體嚟講，小編覺得呢個市場都幾好行，只係因為食唔到魚糕覺得有啲可惜 （小編下次一定要食到！！）
如果大家之後有計劃要去木浦嘅話，不妨就嚟東部市場，相信會搵到唔少驚喜！
如果有更多想知嘅內容，都可以隨時留言或者dm話俾我哋知：）
Instagram：creatrip.hk