Hello，大家好，我哋係由韓國人每日提供最新韓國旅行資訊嘅Creatrip。
木浦天空步道係喺2020年7月正式開放，開咗冇幾耐已經成為好多人嘅打卡熱點，總長54米，離海平面15米，有三份二都係有透明玻璃面造成，行嘅時候相當刺激，如果你有興趣就要繼續睇落去啦。
木浦「天空步道」介紹
開放時間：夏季9:00 - 21:00（3月至10月）、冬季9:00 - 20:00 （如果遇到強風、暴雨等天氣問題，可能會冇得入）
入場費：免費
地址：전남 목포시 해양대학로 59
交通：喺木浦站搭1號巴士，喺유달유원지 정류장落車，落車後行前少少就會見到㗎啦。
如果大家都鍾意去啲新景點，咁今日同大家介紹嘅呢個木浦天空步道大家就唔可以錯過啦！佢係喺2020年7月先正式開放，小編喺搵資料嘅時候，發現原來上年韓劇《Do Do Sol Sol La La Sol》有唔少景點都喺木浦度拍過。
大家喺上天空步道前，記得一定要先著上嗰度提供嘅鞋套，如果唔係會有可能唔俾上去㗎！
天空步道總長54米，離海平面15米，有三份二係透明玻璃面，另一面係鐵網造成，行嘅時候只要望住下面就會見到海，相當刺激。
腳下全部都係海，大家又敢唔敢望住地下再打卡呢？
如果大家驚嘅話都可以捉住欄杆，不過就唔好倚靠住。
當日小編去嘅時候，突然有陣強風吹過，所以行嘅時候真係要相當小心，只要望住地面，真係會好驚跌落去。
同其他天空步道唔同嘅地方，呢度有兩個吊床？由兩層網組成，如果大家夠大膽嘅話，真係好推薦大家可以挑戰吓！不過為安全起見，每一次只可以限一人使用。（提提大家，雖然係好安全，不過千祈唔好喺上面跳啊！）
喺天空步道上，大家仲可以望到一間超有feel嘅Cafe，大家行完之後都不妨可以喺嗰度嘆杯咖啡。
行完天空步道之後，小編再去咗附近沙灘行吓，呢度有個彩虹樓梯，樓梯上每一句都係咁介紹木浦有啲咩，大家可以學小編一樣咁樣坐喺度打卡。
而呢間big reaction 201就係小編啱啱介紹嘅Cafe啦，因為小編去天空步道之前去咗另一間Cafe，所以就冇去到呢間
落到沙灘，呢度仲有幾張櫈俾大家可以坐喺度欣賞纜車，同天空步道。
行到盡頭嘅時候，小編仲發現咗呢度嘅彩虹步道？坐喺前面仲可以同木浦大橋一齊打卡，小編喺IG見到唔少韓國人都鍾意企喺上面拍片，不過當日小編去嘅時候實在太大風，所以就唔敢挑戰
雖然木浦天空步道唔算好長，好快就行完，但大家記得一定要行埋附近嘅景點，小編特別推薦大家之後可以黃昏嘅時候去，影出嚟嘅相會特別靚～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
