漢江必做活動TOP9
覺得喺漢江淨係可以散步同野餐？其實仲有好多嘢可以做！
Hello，大家好，我哋係由韓國人每日提供最新韓國旅行資訊嘅Creatrip。
嚟首爾玩，其中一個一定要去嘅地方就係漢江啦！但係大家又知唔知道全個首爾就已經有12個漢江公園呢？到底要去邊個漢江公園，去漢江又有咩玩，今日就等小編一次過講你聽啦！
漢江必做TOP9
1. 漢江遊艇
- 地點：盤浦漢江公園
- 價錢：共乘遊艇 ₩20,500 - 27,500（1人）；包船 ₩160,000 - 750,000（1艘船，可容納11至31人）
平時去漢江，通常都只係去散步或者坐喺草地野餐，但其實大家仲可以選擇去搭遊艇，喺海上欣賞首爾嘅景色同盤浦大橋隔離嘅「三光島」夜景。而且4月至10月，大家仲可以睇到盤浦大橋彩虹噴泉show添！
平時大家都係喺漢江公園望出漢江，搭遊艇嘅話可以係另一個角度欣賞首爾景色，無論係同其他人一起搭，定係自己同friend一齊包船，價錢都幾合理。
有好多韓國綜藝節目都曾經介紹過漢江遊艇，亦都有好多韓國人會喺艇上搞生日party，相信一定會為大家留低一個美好回憶。
2. 水上浮船Tubester（튜브스터）
- 地點：盤浦漢江公園
- 時間：[4、5月] 平日 16:00 - 00:00、週末 14:00 - 00:00；[10、11月] 平日 15:00 - 23:00、週末 13:00 - 23:00
- 價錢：每艘船 ₩35,000（30分鐘）；₩55,000（60分鐘）
大家可能唔知道咩係Tubester，但係一定有喺韓國節目見過呢種船。大家可以喺盤浦漢江公園搭，一架最多坐6個人，中間仲有張檯可以擺嘢飲同嘢食，大家可以一邊食住嘢，一邊傾偈同欣賞漢江嘅景色，不過要注意船上係禁止飲酒同用火㗎！
平時去呢啲觀光景點，大家可能都會搭鴨仔船。Tubester嘅不同之處就係唔使自己用腳踩咁攰，可以真正咁享受悠閒時光。
3. 鴨仔船
파라다이스
除咗頭先介紹嘅Tubester，大家都可以喺漢江搭鴨仔船，一邊向前踩，一邊欣賞沿途風景。
其實好多個漢江公園都有提供鴨仔船俾遊客搭，但如果覺得太攰唔想踩，大家可以選擇去纛島漢江公園搭自動嘅鴨仔船。
4. 漢江獨木舟/SUP（直立板）
- 地點：蠶室漢江公園
- 營業時間：10:00 - 22:00（12月暫停）
- 價錢：₩30,000/人（2個鐘）
大家有冇諗過可以喺漢江划獨木舟呢？蠶室漢江公園就有提供呢種水上活動，俾大家可以用另一種方式享受漢江。除咗獨木舟，大家仲可以選擇體驗玩SUP（直立板）！
大家可以透過我哋預約「LUNARU」嘅獨木舟/SUP體驗，到時候將會有專業教練教大家玩，仲會幫大家影相留念。而且「LUNARU」至今都保持住零事故嘅水準，大家唔需要擔心有安全問題。
5. 漢江噴泉Show
纛島漢江公園音樂噴泉（한강사업본부）
平靜嘅漢江公園最熱鬧嘅時候就係搞噴泉Show！第一個要介紹俾大家嘅Show係纛島漢江公園嘅音樂噴泉，佢位於建大附近，每年5月至10月幾乎每日都會有噴泉、燈光、配上Kpop同歐美歌曲，氣氛真係好好㗎。
提提大家，纛島音樂噴泉每個禮拜一都會進行例行維護，亦都有可能會因為天氣狀況而暫停！大家去之前可以參考埋以下時間表。
月份 | 時間 |
5、6、9、10月 | 12:00、17:00、18:00、19:00、20:00 |
7、8月 | 12:00 - 21:00（每20分鐘一次） |
盤浦漢江公園月光彩虹噴泉
另一個要介紹俾大家嘅Show，就係最出名嘅盤浦大橋彩虹噴泉啦！呢個Show每逢4月至10月會上演，大家可以參考下面時間表，唔使怕搞烏龍睇唔到。
月份 | 時間 |
4、5、6、9、10月 | 12:00、19:30、20:00、20:30、21:00 |
7、8月 | 12:00、19:30、20:00、20:30、21:00、21:30 |
6. 漢江野餐
去漢江點可以唔野餐！特別係天氣好、唔太凍又唔太熱嘅時候就最啱同朋友一齊去，想叫外賣喺漢江食嘅話都得，只要去指定地點攞就可以啦！
如果大家冇野餐墊或者帳篷嘅話，漢江公園入口會有好多可以買或者租嘅地方，唔需要擔心。不過要提提大家，帳篷只可以喺指定地點用，用嘅時候亦都最少要維持有兩面係打開嘅，唔可以完全閂實，如果唔係會被罰款。
7. 租單車
一到春天同秋天，大家就會見到有好多人喺漢江公園踩單車。大家如果都想踩住單車，欣賞沿途風景嘅話，可以喺地鐵站附近嘅單車租借處租，或者平時首爾街邊都有公用單車可以租，就算係外國人都可以輕鬆租到！
8. 夜貓子夜市
每年4月至10月期間，每個週末首爾各地都會舉行夜貓子夜市，到時會有唔少小食攤檔、精品店、表演等。前幾年受疫情影響，夜貓子夜市一直都被逼暫停舉行，但終於喺今年8月重新開張，大家有興趣可以去行吓凑吓熱鬧。
9. 漢江即食麵機
INSTAGRAM：J_CHAENY
有關注開韓國文化嘅朋友，一定會見過呢種裝喺錫紙碗嘅即食麵。呢種即食麵通常都可以喺漢江公園附近嘅便利店搵到，大家買完之後，擺喺側邊嘅專用機器煮，就可以食到一碗熱辣辣即煮嘅即食麵啦！
雖然呢款即食麵會貴過平時買到嗰啲，不過係一種全新嘅體驗，亦都係一種專屬韓國嘅情懷，大家一場嚟到不妨試吓。
嚟到漢江除咗散步，其實仲有好多嘢可以做，大家plan行程嘅時候不妨參考吓呢篇文章，用唔同方式享受喺漢江嘅時光啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk