韓國「Seoul Bike」使用指南
韓國越嚟越多人踩單車，「Seoul Bike」到底外國人可唔可以租？冇韓國手機號碼又得唔得？
Hello，大家好，我哋係由韓國人每日提供最新韓國旅行資訊嘅Creatrip。
如果有嚟過韓國旅行嘅朋友，應該都知首爾交通好發達，除咗多人搭嘅地鐵、巴士之外，踩單車都越嚟越受歡迎，首爾有一個無人租借系統叫做「Seoul Bike（따릉이)」，幾乎周圍都可以搵到佢，如果之後大家都想踩住單車遊覽首爾，咁你就繼續睇埋落去啦！
「Seoul Bike」 租車教學
如果大家喺首爾周圍行，應該都會見過好多Seoul Bike嘅單車停靠處。就算係外國人，冇韓國手機號碼，都一樣可以用app輕鬆借到，而家就等小編教大家點做啦！
1. 用App買使用券
STEP 1：下載「Seoul Public Bike」 App（有韓文/英文版），開埋藍牙同位置功能。
STEP 2：打開之後會見到以下呢個畫面，大家可以按照需要揀其中一個選項。
회원（會員） | 持有韓國卡，而且會喺韓國長住嘅人 （加入會員可以留低使用記錄同付款方式，每次俾錢可以方便啲） |
비회원（非會員） | 持有韓國卡人士 |
Foreigner | 只持有海外信用卡人士 |
STEP 3：撳「Purchase Pass」
STEP 4：揀想踩幾耐
STEP 5: 揀信用卡之後輸入Email，再同意哂所有選項，撳「Pay amount」俾錢就可以啦！
2. 拎車方法
STEP 1：買完使完券之後，撳「Rent」。（如果係韓文版就要撳「대여하기（租車）」）
STEP 2：出現呢個畫面之後，用手機掃你想租嗰架單車上面嘅QR Code。
STEP 3：大約等幾秒至1分鐘之後，就會聽到解鎖嘅聲，之後就可以踩啦！
※ 如果超時嘅話需要罰錢（1-5分鐘：₩200、6分鐘或更耐：₩400）。如果唔想被罰款，最好夠鐘之前搵最近嘅車站停車，重新再買使用券同拎車。
3. 還車
STEP 1：去最近嘅Seoul Bike停車處
STEP 2：單車後面會有一個掣可以向下拉，記住要Lock實架車
STEP 3：你會收到message話你知還咗車（記住要收到之後先好走啊！）
※如果試咗幾次都還唔到車，請聯絡客戶服務中心。
「Seoul Bike 」更多資訊
Q. 如果買咗1小時使用券，係唔係一定要踩足1個鐘頭？
A：唔係！如果還車之後仲有剩時間，你可以喺24小時內用埋佢。
Q. 韓國邊度有單車徑/可以踩單車嘅地方？
A：通常馬路地下有紅色框都係單車位，但想提前知有冇，都有2個方法。
- 用單車地圖app
서울시 자전거정책과 자전거시설팀
紅色實線係可以踩單車嘅馬路，紅色虛線係單車徑，綠色係用單車&行人專用區，黃色係單車優先路段。（撳我睇埋邊到可以放單車同修理單車）
- Naver地圖 / Google Map
如果有用開Naver Map，仲可以打起點同終點，app會幫你計劃好點行最好。
希望今次呢篇Seoul Bike嘅介紹可以幫到大家！趁天氣唔太熱又唔太凍，快啲去踩返轉單車啦~
如果有更多想知嘅內容，都可以隨時留言或者dm話俾我哋知：）
Instagram：creatrip.hk