韓國「光復節」背景及歷史8月15號對韓國人嚟講有幾重要？ 8月15號係韓國嘅重大日子之一，除咗係紅日會放假，每年都會舉辦各種盛事慶祝，大家又知唔知點解呢？其實係因為喺1945年8月15號，日本昭和天皇發表《終戰詔書》，宣布投降，所以當日亦都係朝鮮半島結束日本殖民時代，脫離日本統治嘅大日子。唔單止係咁，喺3年之後，即係1948年8月15號，由前韓國總統李承晚率領嘅大韓民國政府正式成立，韓國唔再係一個殖民地，重獲自由。 光復節背後歷史 光復節按字面意思，就係「光重新返嚟嘅日子」。而光復前嗰段黑暗歷史，其實就係韓國成為殖民地，被日本統治35年（1910-1945）嘅嗰段日子。 韓國嘅日本殖民時代，喺韓國被稱為「일제강점기（日帝強占期）」。一切都要由1905年韓日簽訂第二次日韓協約，韓國成為日本保護國開始。日本由嗰陣開始就開始計劃要吞併韓國，而喺1907年，首任日本內閣總理大臣伊藤博文被朝鮮獨立運動人士安重根暗殺，引嚟兩國轟動。最後韓國同日本喺1910年8月22號簽訂日韓合併條約，將朝鮮半島主權拱手讓俾日本。 之後喺日本喺韓國成立朝鮮總督府，進行武力統治。由憲兵接手警察行政管理，韓國人嘅言論、集會、出版自由等受到限制，各種韓國人組織亦被強制解散，甚至只對韓國人實施曾經被廢除嘅笞刑同搶奪韓國人土地。 1919年，一眾韓國市民發起3.1運動，以和平非暴力形式宣讀《獨立宣言書》同進行大規模反日遊行示威。不過因為日本用武力鎮壓，其他國家對呢個舉動持負面態度，所以日本最後決定喺1920年代推行懷柔政策，轉為文化統治。韓國人嘅組織活動同言論變得比以前自由，不過韓國人仍然受到差別待遇。 之後發生嘅滿洲事變同中日戰爭，日本都有強制徵用韓國人力物力同土地等物資，而慰安婦問題亦都係喺呢個時候發生。除此之外，日本亦都對韓國進行民族文化滅絕，為咗將韓國人“變成”日本人，韓國人嘅日常生活受到管制，亦都要佢哋強制改名，禁止進行韓文同韓國歷史教育等。大家睇近代韓劇，例如《陽光先生》，都大概可以知道當時嘅情況。 而家嘅韓日關係又係點？ 韓國獨立至今已經過咗70幾年，不過講起韓國同日本嘅關係，通常都會覺得係「敵對」。不過準確嚟講，其實韓國人普遍係唔鍾意日本「政府」，認為日本政府成日都喺度講大話，喺慰安婦議題上唔講出真相、唔願承認錯誤。而好多韓國人到而家都仍然有反日情意結，雖然成日都話要對事不對人，不過都會影響到在韓嘅日本品牌同日本人等等。 《朴烈：逆權年代》 而通常「反日電影」都會激起到韓國人的民族意識，所以喺票房同口碑上都會有唔錯嘅迴響。呢種韓國電影不單止係一味拍日本殖民時期嘅韓國反抗歷史，而係會挖掘出真實嘅故事，刻劃出韓國人喺殖民時代中嘅身不由己，希望韓國年輕人唔好唔記得呢段歷史，絕對唔可以走上同一條路。 北韓又會唔會慶祝光復節？ 朝鮮半島喺1945年8月15號光復後，同時分成南韓同北韓兩邊，進入為期3年既盟軍託管時期，南韓行自由民主主義、由美國管理，而北韓就行共產主義，由當時既蘇聯管理。而北韓，8月15號叫做「祖國解放日（조국해방의 날）」，不過就同南韓嘅光復節意義就有少少唔同啦。 如果有更多想知嘅內容，都可以隨時留言或者dm話俾我哋知：） Instagram： ...
8 months ago
110895 
