河南一日遊行程推介
已經玩厭首爾？不如跟住小編去河南一日遊，親親大自然啦！
Hello，大家好，我哋係由韓國人每日提供最新韓國旅行資訊嘅Creatrip。
如果大家已經玩厭首爾，想去搵啲新地方玩？咁小編推薦大家可以去京畿道嘅「河南」，距離首爾唔算好遠，只要坐地鐵都可以去到！當中有咩好玩？有咩好食？今日小編一一為大家介紹！
河南一日遊行程推介
河南市位卡京畿道中東部，其實喺2000年前已經有呢個地方，不過係近呢幾年比較發達同多咗人去。同首爾距離唔算好遠，只要搭地鐵就可以去到，因為嗰度近自然環境，空氣夠清新，比起首爾冇一種更壓迫嘅感覺，所以好適合人居住。
由首爾點去河南？
最簡單嘅方法就係由首爾嘅任何一個站，搭到去5號線河南黔丹山站（하남검단산）。
行程一：Starfield Hanam (스타필드 하남)
地址 : 경기 하남시 미사대로 750 스타필드 하남
營業時間：每日 10:00 - 22:00
第一個要帶大家去嘅就係Starfield Hanam，佢係一個大型購物中心，只要喺河南黔丹山站1號出口出嚟之後，行到十字路口見到一間小學(창우초등학교)轉右直行大約5分鐘就會見到。
呢個大型購物中心係喺2016年9月先開幕，規模超大，足足有成70個足球場咁闊，入面主要分咗3個區域，包括係：購物、美食同娛樂，所以全日留喺度都有排行！而更特別嘅係，呢度係可以帶埋狗狗一齊入去
呢度有一個叫做Sports Monster嘅館，可以玩到好多VR、飛鏢、跳床等嘅遊戲，大人2小時係25,000won、小朋友係20,000won，每超過10分鐘就加1,000won，相當之抵玩，相信大人細路嚟度都一定可以玩得好開心。
商場內部真係好乾淨，而且好大同闊落，令人行得好舒服
小編當日係平日去唔算好多人，不過之前喺假日去就相當之多，唔少家庭仲會帶埋自己狗狗一齊嚟散步。
行程二：河南Union塔 (하남유니온타워)
地址 : 경기도 하남시 미사대로 710(신장동)
營業時間 : 目前因疫情影響，暫時停止服務
 |  |
河南Union塔 (하남유니온타워) 就係喺啱啱介紹嘅購物中心隔離，行過去大約只係5分鐘左右，喺呢度大家可以欣賞到整個河南嘅美景，超值得去！
不過.......小編好唔好彩地，目前因為疫情影響，所以暫時停止服務，如果大家之後想去，都一定要留意吓當日有冇開先去
行程三： 渼沙里醋雞湯麵 (미사리밀빛초계국수 본점)
地址：경기 하남시 미사대로 608
營業時間：10:00 - 21:30
小Tips： 由河南Unicon塔附近搭9302、9303、9303-1同87號巴士麵可以去到。
Shopping完之後當然要去食嘢啦！大家只要喺河南Union塔 (하남유니온타워) 行去巴士站（大約5分鐘），搭大約3分鐘車程，喺Dongwon Benest Apt. Entrance (동원베네스트아파트입구) 落車再行過去就可以。
 |  |
喺 Dongwon Benest Apt. Entrance (동원베네스트아파트입구) 落咗車之後，好似上圖咁往右直行。
 |  |
之後行大約5分鐘會見到馬路，過咗去之後轉左直行。
 |  |
之後沿住直路行就會見到一條小路，行1分鐘左右，就會見到渼沙里醋雞湯麵總店（ 미사리밀빛초계국수 본점）。
渼沙里醋雞湯麵介紹
渼沙里醋雞湯麵喺好多地方都有分店，而河南呢一間係總店，唔少名人都會成日去呢間鋪頭食，就好似東方神起號昌珉同EXO嘅伯賢都係佢哋嘅常客。
只睇外部已經可以知道佢有幾咁大間，一入到去有分一樓同二樓，已經坐滿咗唔少客人。
呢度Menu唔算多款，不過每款都超有人氣，不過有啲可惜嘅係食唔到呢度嘅指定季節menu（9月尾至3月尾先提供），如果大家之後去一定要睇清楚日期。
雞湯麵 (닭칼국수) 9,000won
醋雞拌麵 (초계비빔국수）9,000won
呢度嘅雞湯麵 (닭칼국수)湯底超好飲，超濃郁雞湯，令人忍唔住飲完一啖又一啖。而醋雞拌麵 (초계비빔국수)就甜甜地同辣辣地，相當惹味！
行程四：渼沙里競艇公園 (미사경정공원)
地址：경기도 하남시 신장동 망월동 미사대로 505
食飽之後，小編就去咗附近嘅渼沙里競艇公園 (미사경정공원)行下，由餐廳行過去大約10分鐘左右。
由餐廳出嚟之後轉左直行會見到一條天橋，大家要上到天橋過對面，之後一路直行就可以。
嚟度呢到同漢江都有啲似，大家可以喺度租單車。
呢度有好多款唔同單車，大家可以租個人或者家庭或單車，小編最後同朋友係租咗一人單車，一個鐘只係4,000won。（提提大家嚟度要帶埋身份證，如果冇都可以用護照登記）
 |  |
原本小編去嘅時候係諗住會影到好多櫻花，點知今年比以往更早開，所以影唔到好多 如果大家之後去，一定要計好開花期，到時一定可以影到好多靚相！
邊踩單車會見到有一條河，呢度會成日舉辦一啲賽艇比賽，不過而家因為疫情，好多賽事已經停咗，不過仲會見到有人嚟練習。
踩踩下小編見到呢啲花，雖然冇好似櫻花咁粉，不過一樣都係咁靚！
行程五：樹木孤兒院(하남 나무고아원)
地址： 경기도 하남시 미사동 607
踩單車過去大約只係10分鐘，一條直路就可以去到。
 |  |
河南樹木孤兒院 (하남 나무고아원)係一個種滿好多樹木同鮮花嘅地方，行入少少會見到好多韓國人都會將石頭越搭越高，因為佢哋相信，擺到上去就會願望成真。
除咗嚟欣賞啲花木樹木之外，唔少人都會嚟度散下步同做運動。
 |  |
河南真係一個大自然嘅城市，嚟呢度會覺得好舒服，想搵一個地方放鬆，呢度一定啱大家！
小編邊踩單車都欣賞咗兩個公園，實際上小編踩超過一個鐘，不過職員好好，話多咗嘅時間係免費
行程六：河南歷史博物館 (하남역사박물관)
地址： 경기도 하남시 덕풍3동 덕풍동로 30
營業時間 : 每日 9:00 - 18:00 ，逢星期一同1月1號休館（如果公眾假期撞正係星期一就會喺第二日休館）
入場費 : 免費
聯絡電話 : 031-790-7990
 |  |
踩完單車，小編就同朋友去河南歷史博物館吸收下文學氣息，大家只要去返一開始餐廳嗰度一直行，會見到一個巴士站，坐10號巴士搭5分鐘就可以去到。
入到去呢度主要分咗3層，小編最先上到3樓，主要係講史前時期 (선사실)、古代時期(고대실)，同埋高麗時期 (고려실) 。雖然去度全部都係用韓文講解，但大家只要睇動圖，或者相都可以慢慢了解。
去到2樓會見到呢度有一個令人好熟悉號感覺，就好似電視劇《請回答吧1988》咁。
行程七：House Plant (하우스플랜트)
地址：경기도 하남시 덕풍북로6번길 14
營業時間：10:00-22:00（假期或周末記得去ig check佢哋開唔開！）
Instagram: houseplant.official
去完咁多地方，最後當然唔少得飲返杯咖啡啦！一開始就咁經過門口一個唔小心未必會發現到，不過仔細咁行入去，你就會發現呢度相當之有驚喜！天氣好嘅時候一定要坐出面吹吹風，超舒服。
除咗戶外，入面cafe都有超多位，想坐得舒服啲仲可以揀坐梳化位。
呢一個紅磚牆嘅巷絕對係唔可以錯過嘅打卡位！
呢度有好多款唔同飲品同甜品，每款都好吸引，不過價錢就比出面貴少少，但嚟度咁遠食都一樣係值得！最後小編點咗招牌飲品bomb bee，士多啤梨鮮奶同蕃薯蛋糕！每一樣款都好好味同好飲，好推薦大家之後嚟試！
如果大家已經玩厭首爾，唔知可以去邊度玩好嘅話？不妨近近地去一轉河南親親大自然，俾自己休息下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk