韓國改名文化
一堆藝人都同名？究竟點分？「年」、「寧」又係禁忌？等小編話你聽韓國人點改名啦！
Hello，大家好，我哋係由韓國人每日提供最新旅行資訊嘅Creatrip。
大家有留意嘅話，會發現韓國人嘅名其實聽起嚟都好似，因為韓文字拼起嚟嘅字有限，常用嘅字亦都差唔多，但點解韓國人唔會混淆呢？今日小編就同大家介紹吓韓國嘅改名文化，包括改名嘅方法、名嘅意義、有咩忌諱等等，一齊睇吓啦！
韓國改名文化
韓國人有兩個名？
絕大多數（99.9%以上）韓國人名都會有「韓文」同「漢字」，兩個都會登記喺身分證（韓國叫住民身分證-주민등록증）上，得好少韓國人改名嘅時候係冇漢字對應。
所以好多藝人啱啱出道嗰陣，翻譯佢哋嘅名會先用音譯，之後經紀公司就會幫佢哋正名，通常會用返藝人本身登記嘅漢字名，又或者幫佢哋改個更加響亮啲嘅漢字藝名。
好似ITZY啱啱出道時淨係公開咗韓文同羅馬拼音，中文初時將Yeji（예지）翻譯成藝智，後嚟正名為「禮志」，Ryujin（류진）初時譯成柳真，之後正名為「留真」、Chaeryeong（채령）譯做彩鈴再正名為「彩領」、Yuna（유나）譯為俞娜，正名之後叫「有娜」等等。
韓文同字但漢字唔同？
有追開星嘅朋友應該都會知道，明明IG hashtag打同一個名，但出嚟嘅標籤有唔同嘅藝人！呢個係因為韓文同字但漢字唔同嘅情況。
最經典嘅例子就係진영（Jin-Yeong），男團GOT7珍榮、前B1A4成員振永，甚至係JYP娛樂公司嘅代表JYP本人朴軫永，三個人嘅名雖然中譯不同，但韓文係一模一樣叫진영（Jin-Yeong），連韓國人聽到呢個名字，都會有唔同反應。
 |  |  |
事實上，唔係所有韓國人都會記得自己嘅漢字名，頂多知道嗰個字喺漢字入面係咩意思，所以漢字名喺韓國只係輔佐嘅作用，例如自我介紹嘅時候會講自己韓文名所含嘅漢字意思；又或者係比較正式文件上需要寫上漢字姓名。
韓國人改名時唔會用嘅字？
年（년）呢個字，睇漢字還好，但喺韓文入面，년（Nyeon）仲有另一個意思，係一個專門鬧女人用嘅詞，而韓國人都會避開發音近似嘅寧（녕 / Nyeong），或是唔會放喺個名第三個字度，因為咁改嘅話會好似講粗口咁（讀得快嘅話更似）。
同樣，韓文中嘅놈（Nom）係鬧男人嘅詞，所以改字嘅時候絕對唔會出現呢個字，其他關於粗口用字、諧音（사 / 殺、蛇、死、四）等等，基本上都會避開。
外國人點樣改韓文名？
有中文名嘅大家，通常同韓國名一樣普遍係有三個字，只要按住意思，照譯就得！
另一種改韓文名嘅方式係用音譯，例如子瑜意譯嘅韓文名應該係子（자 / Ja）瑜（유 / Yoo），但자유嘅韓文意思係「自由」，公司怕個名會造成混淆，所以改用韓文音譯，叫做쯔위（Tzu-Yu）。
如果係日本人就會直接用羅馬拼音查返對應嘅韓文，好似IZ*ONE出身嘅宮脇咲良，呢個係佢日本漢字名，平假名係寫為みやわき さくら（Miyawaki Sakura），翻成韓文就是미야와키 사쿠라（Mi-Ya-Wa-Ki Sa-Koo-Ra）。其他語言嘅名一般都會跟返羅馬拼音去譯返做韓文名，只有中文名先會考慮音譯定意譯。
特別嘅韓文名？
韓文名通常都係三個字，但其實都有兩個字或是四個字嘅名。
根據韓國法律規定，1993年開始除咗姓氏之外，最多可以改五個字嘅名。如果係複姓，例如東方（동방）、南宮（남궁）、西門（서문）、鮮于（선우）等等，加上五個字嘅名，最多就可以有七個字；但規定上，禁止混合使用漢字同韓文字、口唔可以改同父母名字一樣嘅名、漢字只能用特定八千多字以內嘅字……等等。
 |  |
韓國人都好鍾意改一啲好特別嘅名，或直接用單字嚟做名：例如姜河那（강하늘）嘅하늘，韓文單字嘅意思係天空；權娜拉（권나라）同吳娜拉（오나라）嘅나라係國家咁解。
韓國公廁名？
| 男 | 女 |
| 서준 敘俊、書俊 | 지안 智安、知安 |
| 하준 河俊 | 하윤 河允 |
| 도윤 道允、道尹 | 서아 敘兒、序雅 |
| 시우 時宇、始友 | 하은 河銀、河恩 |
| 은우 銀優、恩友 | 서윤 序允、書允 |
| 지호 智浩、知浩 | 하린 河琳 |
| 이준 里俊、利俊 | 지우 知宇、知友 |
| 예준 禮俊 | 아린 雅琳 |
呢兩年嘅韓國公廁名，男仔前五名都有준（Jun/俊)、우（Woo/優、宇、友），可能係因為藝人名（朴敘俊、車銀優）等大熱，帶起咗改呢個名嘅風潮。女仔嘅公廁名除咗린（Lin / 琳）、아（A / 雅、亞）之外，都係相當中性，而呢啲名字要點定義為女仔名，主要睇返漢字，韓國父母係選字上，會搵返偏向溫柔啲嘅漢字同囡囡改名。
以上係韓國人嘅改名文化，唔知解開大家對偶像嘅名會變呢個疑惑呢？另外，大家都可以試吓用自己嘅中文名改返個韓文名！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
