2026韓國天氣穿搭指南 | 每月氣溫、穿搭建議、旅行注意事項

Hello，大家好，我哋係由韓國人每日提供最新韓國旅行資訊嘅Creatrip。

準備去韓國旅行，最怕就係帶錯衫、凍親或者熱到頂唔順。韓國四季分明，春秋日夜溫差大，夏天濕熱又多雨，冬天就又乾又凍。對韓國人嚟講可能好平常，但對嚟韓國旅行嘅朋友嚟講可能會比較難適應。

為咗幫大家唔好帶錯衫，唔好浪費咗個喼嘅位，居韓超過10年以上嘅小編今日會根據個人經驗同實際天氣數據，幫你一次過整理2026年韓國每月氣溫、著衫建議、地區差異同實用行李清單，無論你幾月出發，都可以快啲執啱個喼。

韓國天氣穿搭指南

韓國天氣有咩特徵？旅行前有咩要注意？

韓國最明顯嘅天氣特徵，就係四季分明。對香港人嚟講，去韓國旅行最容易出錯嘅唔係「唔知凍」，而係低估咗日夜溫差、乾燥程度同風勢。有時明明日頭有太陽、睇落幾舒服，但一到夜晚就會突然凍好多，所以如果淨係用香港平時著衫習慣去估韓國天氣，好容易中伏。

整體嚟講，韓國春天同秋天最舒服，但溫差最大；夏天比較焗同熱，而且有梅雨季。會有一段時間都會落雨；冬天就係乾凍型，室外好凍、室內又開暖氣。所以去韓國旅行，唔係淨係諗「厚定薄」，而係要諗分層穿搭同埋可唔可以隨時加減衫。

去韓國旅行幾多度要著咩衫？

無論係去旅行抑或平時出門口，相信大家應該都習慣打開天氣APP，睇定出門口/旅行嗰幾日幾多度：今日8度應該點著？17度洗唔洗著外套？27°C以上會唔會好熱？呢幾個問題就算係住咗喺韓國超過10年嘅小編，每次轉季都會問XD

同一個溫度，喺韓國未必等於香港同樣體感。原因係韓國好多時風更大、空氣更乾，而且早晚溫差更明顯，所以你見到溫度好似「唔算太凍」，實際出到街都有機會覺得涼好多。每到轉季韓國IG就會出現好多好似上面張圖咁，教大家應該點著衫。小編幫大家整理咗做中文版本，大家可以參考下！

💡小編小貼士：如果今次行程當中會包括去河邊、海邊地區，通常體感溫度會再凍少少，建議隨身帶多件外套！

春天去韓國旅行要著咩衫？

韓國春天大概由3月去到5月，平均氣溫大約係0至20度，係好多遊客最鍾意嘅季節之一。因為唔會凍到一出門口就想返入室內，亦未熱到會出晒汗，加上仲有櫻花季、天氣清爽，好啱四周圍去玩！

不過春天最大特點唔係單純「舒服」，而係溫差大。3月通常仲係偏涼，尤其係首爾，朝早同夜晚有時仲會凍過你預期。4月雖然係櫻花季，日頭有太陽時會幾舒服，但如果你夜晚仲會行街、去賞櫻或者睇夜景，唔帶外套好容易會冷親。5月氣溫就穩定好多，通常日頭偏暖，但如果你行程會由朝玩到夜，帶件輕便外套仍然最穩陣。

同香港每到春天就潮濕到牆會滲水嘅氣候唔同，韓國春天反而係一年當中最乾燥嘅季節之一，所以對皮膚敏感、嘴唇容易乾或者平時本身就唔太捱得乾冷天氣嘅人嚟講，可能需要另外準備更多保濕產品同護唇膏！

另外韓國去到3月尾、4月左右間中會突然落雨，所以建議大家可以帶定縮骨遮，放喺隨身行李以便不時之需。

💡小編小貼士：根據小編經驗，4月係最容易着少咗衫嘅月份之一。建議用薄長袖+輕便外套做基本配搭，日頭熱就除、夜晚凍就着返，會比淨係着一件厚衫方便好多！

你可能會有興趣👇🏻

[블로그] 2026韓國預計櫻花開花日期

[블로그] 2026首爾賞櫻懶人包

[블로그] 2026釜山賞櫻景點推薦

夏天去韓國會唔會好熱？

韓國夏天大約會係6月至9月，平均氣溫介乎於20度至38度。通常都係由6月開始慢慢變熱，之後就會踏入雨季，進入又熱又濕嘅時段。對香港人嚟講，韓國夏天未必日日都會好似香港咁焗，但如果撞正溫度高、暴雨同猛烈太陽一齊出現，都真係幾辛苦下。

而韓國最熱嘅日子應該就係所謂嘅「三伏天」，通常出現在7月至8月之間。而2026年初伏、中伏、末伏分別係7月15號、7月25號同8月14號。韓國人傳統上有「以熱制熱」嘅講法，會喺呢段時間食參雞湯等補身料理，所以如果你夏天去韓國，除咗會感受到明顯高溫，亦有機會見到唔少人專登去食補氣食物消暑補身。

韓國雨季會由6月中至尾開始，一直去到7月。呢個時候成日都會落大雨，或者連續幾日都落驟雨，會喺呢段時間嚟韓國旅行嘅朋友，一定要記得帶遮出門口！

落完雨後去到8月，就會進入真正盛夏模式，氣溫高、紫外線強，長時間喺室外活動體力會消耗得特別快。所以如果你夏天去韓國，建議行程唔好排得太密，尤其係中午至下午呢段時間，最好留返啲商場、咖啡店、展覽館之類室內行程，會舒服好多。

著衫方面，短袖、短褲、透氣衣物係基本。外套某程度上唔太需要，不過如果會經常出入冷氣地方，帶一件薄恤衫旁身都夠。

而且韓國夏天氣溫都係30度以上，濕度高，天空通常都冇咩雲，所以嚟韓國旅行要注意補充水分，以免身體產生不適，記得要適當休息同準備一啲室內行程，建議隨身帶定帽、太陽眼鏡、防曬、迷你風扇仔、濕紙巾同礦泉水！

💡小編小貼士：7月至8月去韓國最怕突然落大雨之後對鞋濕咗、成日行程都唔舒服。如果行程會行好多路，建議預備後備襪或者比較快乾嘅鞋/涼鞋！

你可能會有興趣👇🏻

[블로그] 韓國避寒/雨季室內活動推薦

秋天去韓國點著最舒服？

如果你問幾時去韓國旅行最舒服，小編會答你一定係秋天！韓國秋天由9月開始一直去到11月，天氣一般比較乾爽、空氣污染指數就會比較低，影相又靚，行街、賞楓、去近郊都幾舒服。不過秋天同春天一樣，重點唔係「唔凍」，而係早晚溫差依然大。

雖然因為全球暖化，韓國入秋速度開始有減慢趨勢，但通常9月之後就算日頭偏暖，夜晚都會開始轉涼。但因為溫差大，可能日頭接近30度，但夜晚就可能得返15度左右，大家要小心唔好攝親，建議帶定薄外套出門口。

而10月通常係氣溫最穩定、最舒服嘅月份之一，長袖配薄外套已經好夠。去到11月，韓國會明顯開始變凍，尤其首爾，朝早同夜晚會有初冬感，呢個時候就唔好再輕裝出門，準備定外套、大褸就差唔多。

💡小編小貼士：因為溫差大，韓國喺9月、10月換季期最容易感冒，亦係流感爆發嘅高峰期！另外因為空氣開始乾，皮膚同嘴唇都可能開始會甩皮或者乾裂，建議要帶夠保濕產品。

你可能會有興趣👇🏻

[블로그] 2025韓國紅葉盛開時期預測

[블로그] 2025韓國賞紅葉攻略

冬天去韓國點先夠保暖？

• 時間：12月、1月、2月
• 平均氣溫：-15度至7度

韓國冬天真正開始係喺11月尾、12月初，由首爾、江原道地區落初雪開始，一直去到下一年2月。韓國冬天平均氣溫介乎於-15度至7度，而1月同2月通常最凍，首爾冬天平均最低溫會跌到零下，特別係朝早同夜晚會更加凍。而且因為韓國冬天唔止係「低溫」，而係乾凍、風大，而且室內外溫差好明顯，所以體感通常會比你見到嘅溫度更凍，甚至會有寒風刺骨嘅感覺。

如果你係第一次冬天去韓國，建議一定要帶羽絨同Heattech等保暖內衣。尤其係通常冬天旅行行程都會包括去滑雪或者四周圍睇聖誕新年燈飾，一直留喺室外嘅話更加要注意保暖。而且就算係韓國比較暖嘅南部城市都一定會凍過香港，記住要準備好厚衫！

另外因為韓國冬天室內地方，包括商場、百貨公司、地鐵、巴士等暖氣都會開到好大，所以最穩陣嘅方法通常係洋蔥式穿搭：保暖內衣、冷衫、中層、羽絨，再加頸巾、帽、手套、厚襪同暖包。入到室內覺得熱就可以一層層除低，比較方便。

💡小編小貼士：根據小編喺韓國過咗咁多個冬天嘅經驗，建議大家喺1、2月等氣溫會跌到落零下嘅日子儘量要遮曬皮膚露出嘅部位，特別係耳仔、頸、腳踝、手呢啲比較容易忽視嘅地方，如果唔係好容易會吹風吹到又紅又痛！

你可能會有興趣👇🏻

[블로그] 唔洗淋雨/雪就去到嘅首爾商場&百貨公司

[블로그] 2025韓國滑雪場總整理

韓國每月氣溫點睇？1月至12月去要著咩？

如果你已經大概知道自己出發季節，但仲想再確認埋你去嗰個月份天氣同氣溫係點、應該點執衫，可以直接睇以下小編幫大家整理嘅資訊。以下主要以首爾平均氣溫做參考，方便你一眼睇清楚每個月份大概會遇到咩天氣。

💡小編小貼士：如果想知道更加詳細嘅韓國每月天氣同穿搭小貼士，以及每個月韓國有咩好玩，推薦大家睇埋每月相關文章！

韓國1月天氣&穿搭

[블로그] 韓國1月天氣&穿搭小貼士

韓國2月天氣&穿搭

[블로그] 韓國2月天氣&穿搭小貼士

韓國3月天氣&穿搭

[블로그] 韓國3月天氣&穿搭小貼士

韓國4月天氣&穿搭

[블로그] 韓國4月天氣&穿搭小貼士

韓國5月天氣&穿搭

[블로그] 韓國4月天氣&穿搭小貼士

韓國6月天氣&穿搭

[블로그] 韓國6月天氣&穿搭小貼士

韓國7月天氣&穿搭

[블로그] 韓國7月天氣&穿搭小貼士

韓國8月天氣&穿搭

[블로그] 韓國8月天氣&穿搭小貼士

韓國9月天氣&穿搭

[블로그] 韓國9月天氣&穿搭小貼士

韓國10月天氣&穿搭

[블로그] 韓國10月天氣&穿搭小貼士

韓國11月天氣&穿搭

[블로그] 韓國11月天氣&穿搭小貼士

韓國12月天氣&穿搭

[블로그] 韓國12月天氣&穿搭小貼士

首爾、釜山、濟州天氣差好遠？

同樣都係去韓國，首爾、釜山、濟州其實唔可以完全用同一套穿搭標準。首爾位於韓國偏北部、釜山位於韓國南部、濟州就係一個四面環海嘅小島，所以氣候都唔太一樣。

春天同秋天嘅時候，首爾同釜山大致都係日頭舒服、夜晚轉涼；但濟州如果撞正大風或者落雨，就要著多幾件衫，特別係去海邊嘅話就更加需要注意保暖。

而夏天嘅時候首爾、釜山、濟州都熱，不過釜山同濟州等沿海地區容易受天氣變化影響，所以記住要睇定天氣預報，以免影響行程。

而冬天去釜山雖然會冇首爾咁凍，但都唔代表可以當香港冬天咁著；濟州齋睇氣溫雖然會高過首爾，但因為海風大，所以體感溫度其實可能同首爾差唔多。

首爾、釜山、濟州旅行穿搭懶人包

💡小編小貼士：如果你今次行程會同時去首爾同釜山，建議按照首爾天氣執衫；如果係去濟州自由行，記得帶防風外套同雨具。

韓國天氣穿搭常見問題FAQ

Q1. 韓國冬天天氣比香港凍幾多？

A：一般嚟講，韓國冬天會比香港凍明顯好多。即使同樣係10°C左右，韓國因為風大、空氣乾同日夜溫差大，體感通常都會比香港更凍。

Q2. 冬天去韓國一定要著羽絨嗎？

A：如果你係12月至2月去首爾，通常都建議著羽絨。尤其夜晚行程多、怕凍，或者會去滑雪場、江原道等較凍地區，羽絨會更加穩陣。

Q3. 釜山會唔會冇首爾咁凍？

A：通常釜山冬天會暖過首爾幾度，但朝早、夜晚同大風日子一樣會凍，所以都建議帶外套同洋葱式穿搭。

Q4. 韓國雨季通常係幾時？

A：韓國雨季一般集中喺6月底至7月，實際時間每年都可能有少少差異。夏天去韓國建議帶縮骨遮，同時盡量安排定室內行程做Plan B。大家以可以睇定幾間可以直接喺地鐵站室內行到去嘅商場，就算突然落大雨都唔洗怕冇嘢做：

[블로그] 韓國避寒/雨季室內活動推薦

[블로그] 唔洗淋雨/雪就去到嘅首爾商場&百貨公司

Q5. 韓國夏天會唔會好似香港咁熱？

A：7月同8月有機會會。韓國夏天唔止高溫，仲可能有濕度高、太陽猛同突然大雨，所以一樣要做好防曬同補水。

Q6. 去韓國前幾日開始睇天氣最準？

A：建議出發前7日開始留意，出發前3日再重點確認。因為韓國天氣變化可以幾快，尤其如果落大雨，或者突然發出寒冷天氣警告同酷熱天氣警告，就要另外準備。

Q7. 韓國天氣用咩App或網站睇會準啲？

A：出發前可以先參考 iPhone天氣、Google天氣或AccuWeather，或者亦都可以直接喺Creatrip網站上睇到最新天氣預報。最重要係臨出發前再確認一次，因為即時天氣變化都會幾明顯。

準備飛韓國嘅你可能需要...

去旅行之前相信大家都要準備好多嘢，除咗買機票同book酒店，換錢、買Sim卡同交通卡都係必做動作之一！而家呢三樣嘢可以一次過喺機場搞掂曬，價錢仲平過坊間其他服務，想慳時間慳錢不妨可以參考吓！

韓國機場換錢預約服務

平時大家都要走到首爾市區先可以用比較好嘅匯率換到錢，其實都真係幾嘥時間。透過我哋預約換錢可以直接喺機場以最平、最快、最方便方式攞到錢，即刻開始韓國之旅！大家仲可以事先用我哋嘅匯率計算機計可以換到幾多錢，仲會話你知可以慳到幾多！

SIM卡&WIFI蛋

去旅行冇data上網真係好唔方便！呢個時候大家應該都會事先買定韓國本地SIM卡或者租定WIFI蛋，我哋網站有一系列價錢實惠得嚟網速夠快嘅產品，仲可以一到埗就直接喺機場攞！

韓國SIM卡&WIFI蛋 | 撳我即買

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！