韓國天氣著衫指南
韓國天氣點睇？溫度低唔代表凍，最緊要識著衫！必備韓國天氣知識、著衫指南
Hello，大家好，我哋係由韓國人每日提供最新韓國旅行資訊嘅Creatrip。
韓國位於溫帶地區，四季分明、年溫差同日夜溫差都幾大。夏天好熱，但到咗冬天就去到零下幾度，甚至落大雪，如果韓國冇地暖或者防結冰嘅設計，根本冇辦法生活。
咁嘅氣候變異同溫差，雖然對韓國人嚟講已經見怪不怪，凍就返屋企著多件衫，熱就除咗佢，但係對嚟韓國旅行嘅朋友嚟講，帶咩衫嚟真係好重要，帶錯衫會浪費咗個喼嘅位，所以小編就整理咗韓國喺唔同嘅天氣之下，適合著嘅衣物穿著指南，俾大家參考。
韓國各月份天氣&穿搭小貼士💡
1月 | 2月 | |
10月 | 11月 | 12月 |
韓國天氣溫度
春天🌸
- 時間：3月、4月、5月
- 平均氣溫：0至20度
韓國大概會喺2月落埋最後一場大雪，就差唔多入春啦（都有可能去到3月先落最後一場雪），首爾會凍得比較耐，4月中之後先可以完全拋棄長版大褸，到5月底為止，先可以將外套完全收起。呢段時間其實好尷尬，要凍又唔係好凍，熱又唔係好似夏天咁熱，但整體嚟講係個好舒服嘅天氣。
韓國初春天氣/服裝
- 時間：3月至4月中
- 服裝：長袖、長褲、外套
- 其他：注重肌膚保濕，偶然會落春雨
首爾3月溫度日頭係12度左右，但一到夜晚就會跌返個位數，呢個時候著羽絨可能會有啲多，建議可以著長袖、長褲再加件外套，好睇得嚟又夠保暖。
講到春天飛韓國嘅重頭戲，又點少得去賞櫻呢？首爾櫻花大概喺4月頭開，釜山喺3月底就有機會開，不過櫻花快謝嗰陣，就差唔多可以唔使著大褸啦！
韓國春天天氣/服裝
- 時間：4月中至5月
- 服裝：薄長袖、可以短褲、薄外套
- 其他：會落春雨
櫻花凋謝之後，差唔多就係正式春天，不過日夜溫差大，溫度十分舒服、涼爽，但同時最容易感冒，建議大家最好都係著件長袖衫，以免凍親，或帶短袖衫，加件薄外套，可以早晚較凍嗰陣著。
整體嚟講，呢個時候天氣係最舒服，不過缺點就係成日落雨，而且近幾年極端氣候影響，韓國春天短暫降雨逐漸被拉長直到夏天。
夏天☀
- 時間：6月、7月、8月、9月
- 平均氣溫：20度至38度
韓國氣溫5月後逐漸升高，溫度都算舒服，但由6月中至尾開始，就會踏入雨季直到7月。落完雨後，夏天就正式嚟啦！呢個時候成日會落大雨或連續幾日都落驟雨，會喺呢段時間嚟韓國旅行嘅朋友，一定要記得帶遮同著涼鞋，以免對鞋濕咗難乾，就要成程著住對濕鞋...
由7月中起，會係韓國傳統節氣中「伏日」，總共有三伏，為一年當中最熱嘅時候。2023年初伏日在係7月21號，中伏係7月31號，最後末伏會係8月10號。（TMI：韓國人喺三伏日當日都會食蔘雞湯補身，以熱制熱。）
韓國初夏天氣/服裝
- 時間：6月至7月中
- 服裝：短袖、短褲、薄外套
- 其他：注重防曬、降雨
韓國天氣同氣溫喺6月都算舒適，但雨季過後，就可以連薄外套都唔使著啦！韓國夏天分成兩種，一種係舒服，另一種就係酷熱。7月中前都仲係屬於舒適（有啲似香港春天），唔太會流汗，短袖短褲出門到夜晚都冇問題，係個可以接受嘅溫差範圍。
但由韓國雨季結束後，伏日開始，高溫同唔太落雨嘅影響，隨便一郁就會出汗，大家都會留喺室內或喺商場避暑。
韓國盛夏天氣/服裝
- 時間：7月至9月頭
- 服裝：短袖、短褲
- 其他：注重防曬、降雨
喺韓國夏天，首爾連著無袖、短褲出門口，都仲係會流汗，呢種熱嘅程度其實連韓國人自己都唔係好頂得順。大家記得注意防曬，韓國天空喺夏天唔太會有雲，大多數時候都係陽光普照。
秋天🍁
- 時間：9月、10月、11月
- 平均氣溫：3度至25度
韓國秋天同春天好似，9月日夜溫差非常大，日頭接近30度，但夜晚就可能得番15度左右，建議同春天著得差唔多就可以，薄外套同長袖、長褲，唔怕凍嘅人可以一件長袖就得。由10月開始，溫度就會開始跌，大約到11月中為止，最高溫大約10度左右，最低溫去到0度。
韓國初秋天氣/服裝
- 時間：09月中至10月底
- 服裝：短袖、短褲、薄外套
- 其他：注意保濕
因為全球暖化，韓國入秋速度開始有減慢趨勢，但通常9月之後都會有啲啲涼，可以慢慢換薄長袖、帶薄外套出街以免日夜溫差大（首爾朝早近30度，但夜晚會係15度）。
呢種天氣其實好舒服，加上唔會好似春天咁成日落雨，所以好多人都會揀喺呢個時候嚟旅行。
韓國深秋天氣/服裝
- 時間：10月底至11月
- 服裝：長袖、外套、大褸
- 其他：注意保濕
到10月中，長袖長褲（天氣好，都可以著短褲），再著件外套就可以出門口，唔會太出汗，又唔會凍到震，去邊都好舒服，只係早晚稍涼。不過都要提醒大家，韓國天氣喺9月、10月換季期最容易感冒，亦係流感爆發嘅高峰期，大家都要小心。
而南部城市，好似釜山咁，入秋時間大約係10月後，會比首爾遲少少，至於首爾初雪，有機會喺11月時落，代表其實已經係冬天，最高溫係個位數，最低溫係會去到零下，因為天氣乾燥，所以要注意皮膚保濕啊！
冬天❄
- 時間：12月、1月、2月
- 平均氣溫：-15度至7度
韓國冬天真正開始係喺11月底、12月初，由首爾、江原道地區落初雪開始，不過因為暖化、極端氣候影響，每年預估初雪嘅時間都唔太準，要真正要睇到韓國落大雪，大概就係1月到2月呢段時間。
韓國初冬天氣/服裝
- 時間：11月尾至12月
- 服裝：長袖、長褲、厚外套、羽絨
- 其他：注意保濕、避免凍傷
韓國12月底前都會去到零度以下，如果太乾，就唔太會有機會落大雪，但唔做好保濕，臉同手都好容易受傷、甩皮，建議大家12月嚟到韓國玩嘅時候，一定要注意保濕，亦要小心好易流鼻血。
韓國嚴冬天氣/服裝
- 時間：1月、2月
- 服裝：長袖、長褲、厚外套、羽絨
- 其他：注意保濕、避免凍傷
1月、2月係韓國最凍嘅時候，好大機會喺首爾睇到雪，而呢個時候亦係滑雪旺季。韓國南部嘅城市就要碰下運氣，可能冇首爾咁凍，但都凍過香港！一樣建議大家儘可能著保暖嘅衣物，可以用洋蔥式穿搭，入到室內都唔怕焗親啦！
各月份對應天氣/溫度
| 12月 | 1月 | 2月 |
| 冬天 （初雪） | 冬天 （好凍） | 冬末 （好凍） |
| 3月 | 4月 | 5月 |
| 入春 （涼涼地） | 春天 （舒適） | 春天 （舒適） |
| 6月 | 7月 | 8月 |
| 春末 （少少熱） | 夏天 （雨季/好熱） | 夏天 （好熱） |
| 9月 | 10月 | 11月 |
| 夏末 （舒適） | 秋天 （涼爽） | 初冬 （少少凍） |
27℃以上（7月、8月）
- 背心、短袖、短褲、防曬、迷你風扇
17至27℃（5月、6月、9月）
- 短袖、薄外套
9至17℃（4月、10月）
- 薄長袖、長褲、薄外套
5至9℃（3月、11月）
- 長袖、長褲、外套、大褸
5℃以下（11月、12月、1月、12月）
- 只要係保暖號衫都著上身就啱啦！
各天氣注意事項
夏天注意防曬、中暑、暴雨
韓國氣溫喺7月同8月都係30度以上，濕度都好高，呢個時候嚟韓國旅行要注意補充水分，以免身體產生不適，記得要適當嘅休息同準備一啲室內行程，仲有要搽防曬啊！
冬天注意保濕、凍傷
基本上韓國氣溫由12月之後嘅冬天，一係落暴雪，一係乾凍，最好係洋蔥式穿搭，多搽保濕產品，帶暖包同頸巾、帽等。
提提大家：韓國準備入春前（融雪時）2月氣溫會更低，大家要更小心！
春秋注意換季型感冒
春天同秋天其實都幾似，溫度偏涼爽，但日夜溫差大，換季型好易感冒，大家要小心。
以上係小編整理出嚟最新嘅韓國天氣、韓國氣溫穿著指南，之後嚟韓國旅行，大家只要記得，秋天可以著靚啲，但冬天真係要以保暖為前提先可以生存，入春到夏天，就著到好似其他Oppa、韓妹款嘅衫度過啦！
準備飛韓國嘅你可能需要...
去旅行之前相信大家都要準備好多嘢，除咗買機票同book酒店，換錢、買Sim卡同交通卡都係必做動作之一！而家呢三樣嘢可以一次過喺機場搞掂曬，價錢仲平過坊間其他服務，想慳時間慳錢不妨可以參考吓！
平時大家都要走到首爾市區先可以用比較好嘅匯率換到錢，其實都真係幾嘥時間。透過我哋預約換錢可以直接喺機場以最平、最快、最方便方式攞到錢，即刻開始韓國之旅！大家仲可以事先用我哋嘅匯率計算機計可以換到幾多錢，仲會話你知可以慳到幾多！
去旅行冇data上網真係好唔方便！呢個時候大家應該都會事先買定韓國本地SIM卡或者租定WIFI蛋，我哋網站有一系列價錢實惠得嚟網速夠快嘅產品，仲可以一到埗就直接喺機場攞！
通常大家喺首爾玩都會選擇搭公共交通工具，手上有返張交通卡會方便好多！唔想出到首爾市區先臨急臨忙買？大家可以考慮透過我哋預訂交通卡，一到埗30秒內就可以即時拎到！
今次我哋爭取到同韓國超紅卡通人物BELLYGOM合作推出限量又獨一無二嘅交通卡，搭車同喺便利店+指定店鋪消費都可以用到！仲會先幫你入定₩5,000，等你可以攞到即用！大家可以透過Creatrip App隨時確認餘額&交易記錄，夠曬方便！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
