回港檢疫後記

＃居家抗疫 ＃香港

＃程序

成日都聽日講喺外地返香港要隔離， 大家又知唔知到底有啲咩程序呢？

小編就啱啱喺韓國返咗香港，依家居家隔離緊。

一於小編同大家分享一下返到香港有咩檢疫程序啦！

🤞🏻 Creatrip Youtube上線囉

✨馬上Follow我哋IG
instagram.com/creatrip.hk

🎈韓國代購服務

回港檢疫後記

首先講下韓國部份。

因為疫情關係，好多機場巴士都停駛，所以喺韓國要去機場嘅朋友記得睇清楚啊！

小編坐早機，想提早去到機場。

冇晒機場巴士直到，小編唯有坐的士去弘大搭第一班機場鐵路去機場。

搞好check in 手續，就要過海關。

過海關之前工作人員會幫你探熱，都冇咩其他特別措施。

上到飛機，空姐都戴好口罩、著好防護衣同戴安全眼鏡。

反觀乘客都淨係戴口罩，冇人著防護衣。

飛機餐都係密封式咁上，同平時嘅飛機餐差唔多，都有餐包、主食同甜品。

空姐仲派咗兩張Form畀我哋填，主要都係填返個人資料、會喺邊度隔離等等。

（不過，之後落機，機場保安話全部用電子form，所以呢兩張其實可以唔洗填⋯⋯）

返到香港之後，第一件事就係要探熱，係人手用探熱針探嘅。

小編沿路見到好多部紅外線探熱機，不過唔知有冇運作緊⋯⋯

之後一直沿住路標行，原本可以一直路行到，但大為要檢疫所以好多都封住，要兜大圈先到。

去到一個位，就見到好多人聚集，版上面有兩個QR Code。

一個係頭先提及要填form嘅QR Code（https://www.chp.gov.hk/hdf/），一個係用嚟down居家抗疫嘅APP。

填好form之後，會有一個QR Code出嚟，大家記得唔好閂咗個版面，因為之後要show畀工作人員睇。

填好form、down埋app就可以向前行。

之後有幾個步驟：

1. 戴手帶：大家可以叫工作人員幫你戴鬆少少，戴足14日，太貼會唔太舒服。

2. Check電話號碼：工作人員會打去你填form嘅QR Code度。如果大家冇香港號碼，都可以用屋企人電話，但要確保打得通。

3. 啟用APP：開咗個APP之後，要scan一次你條手帶，輸入返電話號碼同埋佢哋提供嘅Code，返到屋企仲有另一個步驟。

4. 隔離令：佢哋會scan你填form嘅QR Code，將你填嘅資料，print成一份隔離令。上面有你隔離嘅地址、名、身份證號碼等等。另外，仲有幾份資料，放喺公文袋畀你。

跟住就可以入境同拎行李。

拎好行李之後就跟住指示上旅遊巴，去亞博。

第一站係要放底啲大件行李。

佢哋會畀張卡你，大家一定要keep好，之後要拎返行李，就係靠張卡。

之後，就要上返旅遊巴去第二站。

第二站係檢疫。

向工作人員出示隔離令同身份證，對好資料，就會畀一包「吐口水」用嘅工具你。

前面會有一埋凳，前面會播教你留口水樣本嘅短片，睇完就可以自己去「吐口水」。

交咗樣本之後，一直沿路行返去放行李嘅大堂，會有人帶你去你個位，叫你坐底等。

成個場就好似公開考試場地咁，一人一張枱、一張凳。

小編覺得呢個過程最煎熬⋯⋯因為小編足足等咗接近10個鐘。

個場嘅Wi-Fi好弱，拎咗電腦諗住睇YouTube，都好lag⋯⋯

所以，小編建議大家down定戲睇，或者拎書去睇（或者直接訓教）。

至於食物方面，佢哋會提供水同三文治⋯⋯

小編等到7點真係好肚餓，諗住去拎三文治，點知佢哋話派晒，唔會再添。

好彩，小編個袋入面有乾糧，唔係真係餓死⋯⋯大家都記得拎定少少嘢食，以防萬一。

等到9點三左右，突然有工作人員過嚟派張紙，證明你可以去你填嘅地址到隔離。（檢疫結果係陰性的話。）

出到外面，大多數人都係call車或者坐的士走。

大家記得要記底車牌同司機名，公文袋有張紙要你記錄。

同埋，去到第十日，大家要再交一次口水樣本，佢會畀定樣本樽你，嗰日一早就要搵屋企人或者指定送件嘅公司（畀HKD100）幫你交。

以上就係小編今次喺香港檢疫嘅過程，真係好漫長⋯⋯

希望有朋友要返嚟嘅，呢篇blog可以幫到大家啦！

🤞🏻 Creatrip Youtube上線囉

✨馬上Follow我哋IG
instagram.com/creatrip.hk

🎈韓國代購服務

其他延伸閱讀
韓國居家隔離加價	疫情下誕生嘅字