2023首爾8大聖誕打卡景點
喺韓國過聖誕節去邊好？邊度最有氣氛？
Hello，大家好，我哋係由韓國人每日提供最新韓國旅行資訊嘅Creatrip。
相信唔少朋友們都會趁年尾嚟旅行，適逢聖誕佳節，首爾有唔少地方都有設置超靚嘅聖誕擺設，一齊睇吓今年可以去邊度打卡啦！
首爾聖誕打卡景點
1. 首爾燈節
- 地點：光化門廣場、首爾廣場、世宗路公園、清溪廣場&清溪川
- 時間：2023.12.15 - 2024.01.21
以前首爾「清溪廣場」都會搞聖誕慶典，唔單止會有聖誕裝飾，仲會有一棵超大聖誕樹！而最近呢兩年呢個慶典就同「首爾燈會」合併，等大家可以睇到更多勁靚嘅燈飾，視覺效果一流！
2. 首爾廣場聖誕樹
- 地址：서울 중구 을지로 12
- 小Tips：市廳站（시청역）5號出口
뉴시스
뉴스1
喺市廳站（시청역）附近嘅首爾廣場都會有一棵巨型聖誕樹，而且每逢冬天呢度都會改建成溜冰場，今年預計會由12月22號開始營運到出年2月11號，想感受韓國冬日氣氛嘅朋友們千祈唔好錯過啦！
3. 汝矣島The Hyundai Seoul
- 地址：서울 영등포구 여의대로 108
- 營業時間：星期一至四 10:30 - 20:00、星期五至日 10:30 - 20:30（撳我睇本月休息日）
- 小Tips：汝矣渡口站（여의나루역）1號出口
INSTAGRAM @thehyundai_seoul
呢幾年首爾最hit嘅聖誕打卡景點相信係位於汝矣島嘅The Hyundai Seoul！2023年呢度搖身一變成為一條聖誕村落，呈現歐陸異國小巷氛圍，點影都咁靚！想入場仲需要事先喺網上預約，不過大家都可以去現場排隊等No-show位，如果要去記住要預多少少時間啦！
4. 明洞新世界百貨公司
- 地址：서울 중구 소공로 63
- 營業時間：星期一至四 10:30 - 20:00、星期五至日 10:30 - 20:30（撳我睇本月休息日）
INSTAGRAM @SE.0817
講到首爾聖誕節必去景點，一定唔少得明洞新世界百貨公司！呢度每年都會有聖誕燈光投影，而2023年嘅主題係「My Dear List Wish」~ 每到夜晚一著燈就會吸引所有行人嘅目光，超壯觀！
5. COEX星空圖書館
- 地址：서울 강남구 영동대로 513 B1
- 營業時間：10:30至22:00
- 小Tips：三成站（삼성역）5號/6號出口
뉴시스
如果怕室外太凍，大家都可以去COEX入面嘅星空圖書館打卡！呢度本身就係一個好受歡迎嘅打卡景點（巨型書牆超壯觀!），每逢聖誕節仲會擺設一棵勁靚嘅聖誕樹，大家記住唔好錯過啦！
6. 樂天世界聖誕慶典
- 地址：서울 송파구 올림픽로 240
- 舉辦日期：2023.11.25 - 2024.02.25
- 小Tips：蠶室站（잠실역）4號出口
樂天世界每逢節日都一定會搞活動，而聖誕節都唔例外！呢度會變身成為一個冰雪王國，出面座城堡更加會有精彩燈光表演，花車巡遊亦都會變成聖誕主題，雖然勁多人，但真係好熱鬧好壯觀！
7. 蠶室樂天世界塔廣場
- 地址：서울 송파구 올림픽로 300
- 小Tips：蠶室站（잠실역）1/2號出口
연합뉴스
如果打算會去樂天世界嘅話，可以順便去埋附近嘅樂天世界塔廣場同巨型聖誕樹+旋轉木馬影相！
8. 永登浦Time Square
- 地址：서울 영등포구 영중로 15
- 營業時間：10:30 - 22:00
- 小Tips：永登浦站（영등포역）6號出口
테넌트뉴스
永登浦Time Square聖誕節嘅時候會擺設一棵華麗嘅聖誕樹做裝飾，今年嘅聖誕擺設更加以美國復古加油站為主題，超特別！
同場加映 - 春川樂高樂園聖誕慶典
- 地址：강원 춘천시 하중도길 128
- 舉辦日期：2023.11.28 - 2023.12.25
- 小Tips：京義中央線春川站（춘천역）搭接駁車
레고랜드
韓國LEGOLAND今年用咗36萬塊Lego積木砌咗一座高達9米嘅巨星聖誕樹，而且每日都會有精彩歌舞表演，相信大人細路都一定會睇得開心！
以上係2023年首爾聖誕節必去打卡景點嘅總整理，plan住聖誕節嚟玩嘅朋友們記住要mark低啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
