汝矣島The Hyundai Seoul懶人包 | 樓層、美食、交通、退稅全攻略（2026最新版）

Hello，大家好，我哋係由韓國人每日提供最新韓國旅行資訊嘅Creatrip。

講起2026首爾必去商場同百貨公司，一定唔少得位於汝矣島嘅「The Hyundai Seoul」！

小編自己自從商場2021年開幕開始，已經去過超過10次，而且每次香港朋友嚟韓國玩小編都會帶佢哋去行街。呢度唔係嗰種一入去已經令人覺得眼花撩亂嘅大型韓國百貨。整個空間好現代、開揚，行落去感覺舒服，就算唔買嘢都好值得行一轉。

到底「The Hyundai Seoul」有咩咁特別、每層有咩行、有咩店鋪/餐廳推薦去、應該預幾多時間等等，今日就等居韓小編一次過話你知啦！

The Hyundai Seoul最新攻略

The Hyundai Seoul基本資訊

• 名稱：The Hyundai Seoul（더현대 서울）
• 地址：서울 영등포구 여의대로 108
• 營業時間：
  • 星期一至五 10:30 ~ 20:00
  • 星期六及日 10:30 ~ 20:30
  • 每月休息日可以撳我參考
• 前往方法：
  • 汝矣渡口站（여의나루역）1號出口
  • 汝矣島站（여의도역）3號出口

The Hyundai Seoul位於首爾汝矣島漢江公園附近，係呢幾年嚟韓國年輕人同外國遊客都會專程去嘅大型商場兼百貨公司之一。呢度唔但單止有各種高級品牌同韓國街頭服飾，好多人氣韓國美食都會進駐The Hyundai Seoul美食廣場，可以直接一次過試曬韓國最流行嘅美食。

除此之外，小編個人覺得呢度比其他百貨公司樓底高，而且空間更加闊落、鋪頭分區明顯易搵，仲裝修到好似一個室內花園咁，無論係想去shopping，或者只係想參觀都可以行得開心。最重要係呢度仲不定期會進行Pop-up活動，韓國偶像、人氣卡通角色等都會選址The Hyundai Seoul搞活動，每次去感覺都唔一樣！

💡小編小貼士：以步行時間嚟講喺汝矣渡口站（여의나루역）行過去會比較快，不過如果遇上酷熱/寒冷天氣、落雨或者落雪，就推薦大家喺汝矣島站（여의도역）落車，然後向3號出口方向行，直接喺地下通道行去商場！

喺The Hyundai Seoul要預幾多時間行？

The Hyundai Seoul規模大，所以好多人都會問到底應該預留幾多時間行會比較好。根據小編個人經驗，呢層好視乎你想做啲咩，如果齋影相、去Cafe chill下同簡單參觀，其實2-3個鐘頭就夠；如果想shopping同時食盡呢度出名嘅美食，預半日就差唔多啦！大家可以參考以下推薦路線：

快閃行程(2-3小時)

• 適合想影相、飲咖啡、簡單行下嘅朋友們
• 路線：
  1. 由汝矣渡口站1號出口行過去，去1樓Waterfall Garden影相
  2. 搭扶手電梯上5樓Sounds Forest影相
  3. 喺5樓Blue Bottle飲杯咖啡、欣賞室內花園景色
  4. 如果鍾意韓牌潮流服飾，可以去B2/F快速行一圈

半日行程(4-5小時)

• 適合想Shopping 、食嘢、影相嘅朋友們
• 路線：
  1. 由汝矣渡口站1號出口行過去，去1樓Waterfall Garden同5樓Sounds Forest影相
  2. 去B1/F美食廣場食午餐
  3. 按自己喜好行街買嘢
     • B2/F：韓國潮牌
     • 1/F：名牌
     • 3/F：韓系時裝品牌
  4. 鍾意甜品嘅話可以去B/F Cafe Layered食Scone
  5. 如果買滿₩30,000以上，走之前可以上6/F辦理退稅

💡小編小貼士：如果行李比較多，或者掃貨戰利品太多，都可以將隨身行李放落B1/F或者B3/F嘅儲物櫃，咁就唔使成日拎住周圍走（大型行李都可以放得落）！

The Hyundai Seoul有咩好玩？完整樓層攻略！

汝矣島The Hyundai Seoul由B2/F去到6/F，總共有8層屬於商場範圍，而停車場就係由B3/F去到B6/F。根據小編經驗，如果你係由汝矣渡口站1號出口行過去，通常都會喺1樓4號入口入商場，啱啱好就係Waterfall Garden前面，幾適合作為第一站影相。

如果你係由汝矣島站行地下通道過去，你就會喺B2/F（Creative Ground）入口入商場，如果你本身想行韓國潮牌，就可以由呢度開始！

B2/F Creative Ground |  韓國街頭潮流&流行品牌

因為韓國潮牌同人氣品牌好多都喺呢層，所以呢度基本上係全商場最旺嘅其中一層，尤其係星期六日。小編如果帶朋友嚟The Hyundai Seoul行，通常都會喺呢層停留最多時間。

進駐店鋪

• 韓國人氣品牌：MATIN KIM、OIC (OIOI COLLECTION)、LOEUVRE、emis、PEER
• 國際人氣品牌：MLB、THE NORTH FACE WHITE LABEL、Rockfish Weatherwear、
• 配飾/手袋：CASETiFY, AFRICA EYEWEAR、DEPOUND、STAND OIL、NICE WEATHER
• Cafe：ARKET CAFE、Starbucks Reserve

不過要注意嘅係，好似 NICEWEATHER同MATIN KIM等人氣品牌成日都要排隊入，門口會有部平板電腦要你輸入電話號碼登記排隊。不過問題係佢淨係接受韓國電話號碼，呢個時候如果你冇韓國電話號碼，可以scan平板電腦上面嘅 QR Code下載「Hyundai Food Museum」App，就可以唔洗韓國電話號碼都可以登記排隊。

另外自助退稅機都係喺呢層，小編推薦大家行完成個商場，買齊嘢之後再落返B2/F做自助退稅，然後直接由B2/F出口行去汝矣島站搭地鐵走。

💡小編小貼士：如果你本身鍾意韓國時裝同潮流，或者想買啲返香港冇嘅牌子，真係要預多啲時間行呢層，小編有朋友淨係喺呢層都行咗兩個鐘以上！

B1/F Tasty Seoul | 美食廣場

呢度有啲似升級版嘅香港商場food court，無論係韓國料理、中菜、西餐、日式料理、小食、Cafe，通通都可以喺度搵到，而且仲有好多最近流行嘅美食都會進駐美食廣場！有啲餐廳仲係food truck攤位營業，氣氛比一般商場food court輕鬆有趣。

另外呢度其中一個優點係餐點費用會平過其他樓層嘅餐廳，小編通常都會直接喺呢度食！

人氣美食推薦

※上述價錢為2026年4月價格，實際價錢需以現場為主

除咗餐廳本身有自己嘅座位，如果唔係就同香港商場food court一樣，要自己搵位坐，之後再叫嘢食。美食廣場入口附近有自助點餐機，每個餐廳攤位都有人工櫃檯可以叫嘢食，叫完會俾個號碼牌或者自動叫號器你，叫到你之後就可以去拎餐。食完之後記住要自己放返餐盤同清潔好座位！

💡小編小貼士：美食廣場有免費飲用水同廁所，小編每次食完飯準備去行街之前都會先去定廁所同飲水，再整裝待發去shopping！

1/F Exclusive Label | 精品時裝 & 美妝

呢層係高級名牌樓層，Gucci、Loewe、Louis Vuitton、Dior、Chanel Beauty等等，應有盡有，同其他高級百貨公司冇咩大分別。

The Hyundai

一樓總共有5個入口，大家可以參考上面呢張平面圖。如果你係由汝矣渡口站行過去，最近嘅入口係4號入口，而The Hyundai Seoul其中一個地標「Waterfall Garden」就會喺你眼前。可以聽到流水聲之餘，仲會聞到植物嘅香味，真係有種好似入咗室內美術館或者植物園，而唔係商場嘅感覺，好多人都會喺度影相打卡！

進駐店鋪

• 時裝：Gucci、Loewe、Louis Vuitton、Saint Laurent、Prada、Fendi、MIUMIU、Moncler、DIOR
• 珠寶：Van Cleef & Arpels、Bulgari
• 美容：Chanel Beauty、Diptyque、L'Occitane、Gentle Monster
• 行李箱：RIMOWA

💡小編小貼士：就算你唔打算行街買嘢，都值得去呢層睇「Waterfall Garden」！

2/F - Modern Mood | 輕奢/當代時裝品牌

呢層嘅時裝品牌唔係每間百貨公司都可以見到，例如有GOLDEN GOOSE、MAX MARA、ACNE STUDIOS、ALO、COACH、MONTBLANC、OMEGA & 等等。如果你想搵啲比較有特色嘅中高檔品牌，不妨可以嚟行個圈望望！

💡小編小貼士：老實講小編個人唔係成日會留喺呢層，不過如果有鍾意嘅牌子進駐呢度，記住唔好錯過！

3/F About Fashion | 經典&韓國品牌

3樓有經典國際品牌同韓國本地時裝牌子，其中主要包括Lacoste、Tommy Hilfiger、Bean Pole、DKNY、lululemon、GANNI、the CASHMERE、J.ESTINA、KREAM等等，如果你想買最近喺韓國流行，但又唔係好潮街頭風嗰種時裝，推薦大家可以重點行呢層。

4/F Life & Balance | 運動服裝&戶外裝備

4樓有賣運動、高爾夫球同戶外生活風格嘅品牌。如果你搵緊運動服，嚟呢度就可以一次過睇曬所有選擇！NIKESWIM、THE NORTH FACE、SALOMON、SNOW PEAK、MALBON GOLF同其他著名運動休閒品牌都有進駐，想買返幾件衫送俾身邊鍾意運動嘅家人朋友都好啱嚟呢層行。

5/F Sounds Forest | 打卡聖地室內空中花園

每次見到人post有關The Hyundai Seoul嘅相，幾乎都係同一個角度、同一個地方，而嗰度就係位於5樓嘅Sounds Forest啦！

呢度就好似一個超大型室內公園咁，有各種綠色植物同樹木、天窗灑落自然光、木長櫈，喺商場正中央形成一個寧靜自然氛圍。呢個花園橫跨商場中庭，所以你由其他樓層都可以望到，但如果想行入去就要去到5樓。

場內四周圍都有好多長櫈，隨時可以坐低喺植物之間chill下。附近仲有Blue Bottle等等嘅幾間Cafe，大家可以一邊飲咖啡、一邊欣賞景色！

另外5樓仲有LEGO、NEW BALANCE KIDS、DYSON、LOGITECH、PANASONIC、MICROSOFT等商鋪，以童裝同電子產品居多，如果會帶小朋友去都好啱。

每年十一月尾到十二月，Sounds Forest就會搖身一變成為一個聖誕仙境，呢度會裝飾到好似歐洲聖誕市集咁，加上聖誕燈飾超夢幻，重點係影相會好上鏡！

💡小編小貼士：相信大家應該都見過好多人搶The Hyundai Seoul聖誕市集嘅入場券，連韓國人自己都好難搶到。其實前幾年聖誕市集都接受walk-in，可以現場排隊，不過條龍真係會好長。建議大家就算真係想去排，都唔好揀星期五、六、日嘅下晝先去，建議朝早10、11點就好去啦。

6/F Dining & Art | 高級餐廳、展覽

6 樓主要係高級餐廳、展覽空間同文化設施。另外亦有幾個位可以由高處望返落去 Sounds Forest，影相效果都唔錯。RISTORANTE EO、GODIVA、EATALY、Sichuan HwaGa同其他餐廳都係喺呢層，如果你想食得正式少少，或者想搵個景觀靚啲嘅地方坐低，推薦大家可以上到嚟6樓。

The Hyundai Seoul有咩好食？

汝矣島The Hyundai Seoul入面有超過100間餐廳，而且每間價位都唔太一樣，第一次去到真係會睇到眼花繚亂。小編根據自身經驗同韓國網上評價，幫大家根據餐廳價位整理咗一份必食餐廳list，去之前可以參考！

平價之選（₩15,000以下）

B1/F 美食廣場

如果想平平地食返餐，小編推薦大家可以去B1/F個food court度揀，嗰度大部分餐點都唔貴，平均₩15,000（15000）就可以食到好西。如果想食韓國料理，小編自己最鍾意係呢度嘅全州石鍋拌飯（₩9,500、9500）同韓式燒肉套餐（₩13,000、13000），有飯、有湯、有小菜，夠飽之餘味道有保證。

Cafe/甜品

如果想食甜品，推薦大家可以去同樣位於B1/F嘅Cafe Layered。呢間Cafe喺韓國好出名，好多人都會專程到訪位於延南洞同益善洞嘅分店，不過而家喺The Hyundai Seoul都可以食到！佢哋最出名係各種口味嘅Scone（₩4,500-5,500、4500-5500），再加杯美式咖啡（₩5,000、5000），10,000韓幣左右就可以有個幾舒服嘅coffee break。

中價位餐廳（₩25,000-40,000）

SMT Lounge

呢間餐廳係SM Entertainment相關概念餐廳，行K-pop+潮流 fusion 路線，混合中式唐人街同墨西哥城嘅概念。餐點方面就係混合中菜/港式元素同墨西哥美食精華，提供麻辣燙、小籠包、Tacos等。每個菜式大約₩13,000（13000）左右。

SMT Lounge另一個吸引人嘅地方係大窗可以望到汝矣島同漢江景，仲有K-pop風打卡位，幾適合想食飯順便打卡嘅朋友去！

Ristorante EO / Eataly

Ristorante EO同Eataly同樣都係位於6樓高級餐廳樓層嘅意大利高級餐廳，Ristorante EO價位預計每人₩65,000-₩125,000（65000-125000），Eataly就平少少（意粉大約20000-25000、主菜26000以上）。雖然價錢比較貴，但食物質素好，推薦特別日子想食豪啲，想去氣氛比較好嘅餐廳嘅朋友們去！

The Hyundai Seoul有冇Cafe可以坐低休息？

小編自己本身係一個好鍾意去Cafe嘅人，每次出去行街或者同朋友見面都一定會搵定Cafe去坐。如果叫小編喺The Hyundai Seoul揀兩間Cafe推薦，小編應該會揀Blue Bottle同Laurus Blanc！

Blue Bottle Coffee（5/F）

相信唔需要小編介紹，大家都一定聽過Blue Bottle Coffee呢間Cafe。而The Hyundai Seoul入面嘅分店正正位於室內花園Sounds Forest隔離，四周係樹同自然光，係成個商場入面最有氣氛嘅cafe！大家可以一邊飲咖啡，一邊望住室內花園，同一般商場咖啡店感覺好唔同。如果你係想打卡、輕鬆休息一下，呢間會好啱你去。

💡小編小貼士：星期六日通常比較多人，想坐得舒服啲最好平日去！

Laurus Blanc（3/F）

如果你想搵一間可以坐耐少少、順便食甜品或者brunch嘅Cafe，咁就推薦你去3樓嘅Laurus Blanc。呢度可以由上至下望到 Waterfall Garden，影相靚，環境都舒服，幾適合慢慢坐低休息。而且餐點方面有多士、三文治、湯等等，大家可以朝早去食個靚Brunch再開始行街！

The Hyundai Seoul購物小貼士

外國人購物退稅

喺The Hyundai Seoul買完嘢之後，只要單一店鋪消費超過₩15,000就可以申請退稅。大家可以上6樓櫃檯或者去B2自助退稅機辦理相關手續。你亦都可以keep起收據之後去機場搞，兩個方法都可以成功搞到退稅！

1. 現場退稅（最方便）

1. 買完嘢之後，去6樓顧客服務櫃位或者B2自助退稅機
2. 向職員出示護照同收據
3. 即場辦理退稅（可以揀退現金或者退返入信用卡）

2. 機場退稅

1. 如果你當日冇喺商場處理，臨走前都可以去仁川機場/金浦機場辦理
2. 做完check-in之後搵退稅櫃枱或者自助退稅機
3. 同樣準備好護照、收據同你買嘅物品，辦理相關手續就得

💡小編小貼士：小編建議大家行完街之後直接喺The Hyundai Seoul辦理退稅手續會比較方便！小編朋友之前就曾經因為想一次過儲齊其他收據去機場搞退稅，點知因為最後時間太趕搞唔切，白白蝕咗一筆錢......

[博客] 點樣喺韓國退稅 | 2026 韓國退稅指南 

[Blog] 韓國美妝退稅會喺2026年取消？用 Creatrip 美妝現金回贈點樣拎返10%

外國人排隊入場店鋪方法

The Hyundai Seoul部分人氣店鋪喺繁忙時間會同一時間入場嘅人數，呢個時候會有一部平板電腦俾你登記，需要輸入電話號碼同同行人數，輪到你嘅時候系統就會send message通知。

不過上面都有提及到，呢個排隊方法只接受使用韓國電話號碼，所以大家記住要scan平板電腦上QR Code，下載「Hyundai Food Museum」app，再用電子排隊功能登記，咁就唔需要用到任何電話號碼！

通常B2/F嘅NICEWEATHER、MATIN KIM、CASETiFY週末都需要排隊，1/F Gentle Monster就間中需要，5/F同6/F快閃店就要視乎活動現場人流。

💡小編小貼士：如果唔想排隊，就建議星期一至五嘅上午去（10:00–12:00），小編之前星期二11:00去NICEWEATHER完全唔需要排隊就可以入場，而且人比較少，行起上嚟都舒服啲！

行李儲物櫃

The Hyundai Seoul儲物櫃分別位於B1/F客戶服務中心隔離、B3/F停車場中央扶手電梯附近同B4/F停車場，以自助形式使用，而且有韓文、中文、英文、日文介面，大家唔需要擔心語言問題。不過要注意儲物櫃僅限商場營業時間內使用，臨走之前一定要記得攞走！

而呢幾個儲物櫃就好似上面張圖咁係一般大細，主要可以用嚟放個人貴重物品同購物戰利品，如果需要寄放大型行李箱，就可以去1樓旅客中心寄存。

💡小編小貼士：B1/F客戶服務中心隔離個儲物櫃可以放需要冷藏嘅物品，如果你有買食物手信記住要善用呢個服務！

充電器租借服務

如果手機突然冇電，想租返個尿袋充電，可以去B1/F客戶服務中心，自助租借機會位於儲物櫃附近。不過比較可惜嘅係呢度付款方式只接受KakaoPay或者韓國信用卡，如果大家冇嘅話都係租唔到。所以建議大家嚟旅行嘅時候自備尿袋，或者可以去便利店買一次性行動電源。

嬰兒車租借服務

The Hyundai Seoul 1樓同5樓可以租到BB車，5樓仲有嬰兒休息室，如果今次會帶小朋友嚟，需要地方短暫休息都可以善用以上服務。

The Hyundai Seoul點去？

好似上面所講，想去The Hyundai Seoul可以由汝矣渡口站（5號線）或者汝矣島站（5、9號線）行過去，小編就推薦大家喺汝矣渡口站出，所需時間比較短之餘仲比較簡單。

汝矣渡口站出發

汝矣渡口站(여의나루역)1號出口出

向出口反方向行，然後轉右

直行

行大約5分鐘就會見到The Hyundai Seoul

汝矣島站出發

向汝矣島站(여의도역)3號出口方向行

你會見到寫住IFC Mall嘅指示牌，唔好行出出口，
喺扶手電梯右手邊入地下通道繼續行

沿住自動行人道直行

途中左手邊會有個通往IFC Mall嘅入口，繼續直行

一直直行就會見到The Hyundai Seoul入口（B2/F）

The Hyundai Seoul附近仲有咩好玩？

1. 汝矣島漢江公園_{(여의도한강공원)}

• 地址：서울 영등포구 여의동로 330
• 營業時間：N/A
• 前往方法：
  • 汝矣渡口站（여의나루역）2號出口
  • The Hyundai Seoul 4號出入口

小編自己每次去The Hyundai Seoul都一定會去汝矣島漢江公園散步！呢度係首爾最出名、最多人去嘅漢江公園之一，大家可以去租單車、野餐、望住漢江景食炸雞等等，勁chill！

💡小編小貼士：建議大家黃昏時間或者夜晚時間去，景色會更加靚！

2. IFC Mall

• 地址：서울 영등포구 국제금융로 10
• 營業時間：10:00-22:00（各店舖營業時間可能不同）
• 前往方法：
  • 汝矣島站（여의도역）3號出口
  • The Hyundai Seoul B2/F出口，沿地下通道直行

The Hyundai Seoul附近仲有IFC Mall商場，呢度有各種時裝品牌、SPA品牌、教保文庫書店、CGV戲院同餐廳。小編個人覺得IFC Mall比The Hyundai Seoul更 casual、價位更親民，如果你想順便去睇戲、買書都可以去埋！

The Hyundai Seoul常見問題 FAQ

Q1. 如果我已經會去 COEX，仲值唔值得去The Hyundai Seoul？

A：如果你喺首爾只會留3至4日，其實未必一定要專程去，因為COEX有埋Starfield圖書館可以去打卡。不過如果你行程比較鬆動、會留 5 日以上，或者本身住汝矣島附近，又想行一個冇咁逼、空間感更舒服嘅商場，The Hyundai Seoul都值得去，特別係有特別活動或者聖誕市集嘅時候！

Q2. 要幾耐先可以行完The Hyundai Seoul？

A：如果你只係想影相、飲咖啡同簡單行下，預2-3個鐘已經夠；如果打算食飯加shopping，就建議留4-5個鐘。想再加埋附近嘅汝矣島漢江公園，可以預留半日時間！

Q3. The Hyundai Seoul物價相比其他首爾商場係咪貴啲？

A：整體嚟講，The Hyundai Seoul消費會偏高少少，因為商場入面有唔少名牌同人氣潮牌。不過如果你唔打算買嘢，只係想行下、影相同飲杯咖啡，其實預 ₩20,000-30,000（20000-30000）左右都已經足夠。

Q4. 幾時去The Hyundai Seoul人最少？

A：如果想避開人潮，最好平日朝早或者下午早段去，通常會舒服好多。星期六日中午後、午飯時間，同埋聖誕節前後都會特別多人，如果想行得輕鬆啲，建議盡量避開呢啲時段。

Q5. 點樣由仁川機場去The Hyundai Seoul？

A：由仁川機場過去，最方便通常係搭6007號機場巴士去汝矣島，然後喺Conrad Hotel/IFC Mall附近落車，大約65-75分鐘；如果想慳錢，可以搭AREX去首爾站再轉5號線地鐵去汝矣渡口站；如果同行人多或者想快啲，搭的士會最快，大約40-50分鐘就到，只係車費會高好多。

Q6. The Hyundai Seoul鋪頭收唔收海外信用卡，定係要現金？

A：Visa、Mastercard等海外信用卡喺The Hyundai Seoul入面所有品牌店、餐廳同Cafe都用得。不過，因為B2/F有部分Pop-up攤位或者鋪頭可能會只收現金，所以身上帶少少現金會比較穩陣（大約₩20,000-50,000就夠）。

今次會去汝矣島玩？

[景點] Dami Clinic 汝矣島分店 | 小型皮膚療程

[스팟] ocollor個人色彩診斷（汝矣島店）

[스팟] 與賱館（汝矣島）

[景點] idHAIR Brighten 汝矣島 Place

[景點] Han River Cruise | 汝矣島 E-land Cruise

[景點] Seoul Cruise 汝矣島 Hangang | 放鬆同欣賞 & 煙花時段遊船

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！