蠶室美食總整理
蠶室唔係只得樂天世界！附近其實有好多隱藏美食等住你嚟發掘！
Hello，大家好，我哋係由韓國人每日提供最新韓國旅行資訊嘅Creatrip。
講到蠶室除咗樂天塔同樂天世界之外，其實呢度都有隱藏唔少美食，有西餐、日式、東南亞菜、墨西哥菜等，好多餐廳氣氛都好好，評價都相當之唔錯，如果之後去開蠶室景點，不妨都抽少少時間喺度食返餐啦！
蠶室美食總整理
松理團路（송리단길）
- 地址： 서울 송파구 송파동 백제고분로45길
如果梨泰院有一個叫「經理團路」，咁蠶室松坡區就有「松理團路」，呢度聚集咗唔少網上超有人氣嘅餐廳同Cafe，係好多年青人嚟打卡嘅地方。而且好近樂天世界同樂天塔，交通非常方便。以下呢幾間餐廳就係位於呢個area㗎啦！
1. 松雞屋（송계옥）
- 地址：서울 송파구 올림픽로32길 38
- 營業時間：星期一至五 16:00 - 22:00、星期六及日 15:00 - 22:00（Last Order 21:00）
講起最近突然爆紅嘅韓國餐廳，一定唔少得位於狎鷗亭嘅炭火燒雞專門店「松雞屋」！最受歡迎嘅「松雞屋什錦拼盤」，入面除咗有雞柳同鹽燒雞脾肉之外，仲有雞心、雞腎、雞軟骨同雞頸4款特別部位。叫一個拼盤就可以食到6個部位嘅肉，CP值夠曬高！
相信有睇開韓劇嘅朋友們應該都知道佢係邊個！以《Sweet Home》、《無法抗拒的他》、《氣象廳的人們》等劇集吸引超多Fans嘅宋江亦都係「松雞屋」狎鷗亭分店嘅熟客，大家記住要飲埋佢推薦嘅伯爵茶High Ball！（買埋「Creatrip特快通行證&優惠券」仲可以即時入座+享有獨家優惠！）
2. 夢村炒辣雞（몽촌닭갈비）
- 地址：서울 송파구 석촌호수로 298
- 營業時間：11:30 - 21:00（Break Time 15:00 - 17:30）
「夢村炒辣雞」係一間新開張冇耐嘅炒辣雞專門店！入面裝修勁復古，連餐牌都整到好似以前嘅報紙咁，好有特色！呢度嘅招牌Menu係「韓方炒辣雞」同「懷舊冷烏冬」，一熱一凍配住食，真係一流！而家只要出示「Creatrip特快通行證&優惠券」，可以快速入座之餘，消費滿指定金額仲會有限定優惠！
3. 芳荑豚家（방이돈가）
- 地址：서울 송파구 오금로15길 4
- 營業時間：15:00 - 24:00
「芳荑豚家」係蠶室最受歡迎嘅燒肉鋪之一，呢度嘅五花肉超厚身又juicy，燒到金黃色之後食真係啖啖肉！大家記住一定要食埋呢度嘅芝士炒飯啊！而且只要有「Creatrip特快通行證&優惠券」，叫滿₩40,000就可以享有獨家9折優惠！
4. 肉醬鄭（육장정）
- 地址：서울 송파구 오금로16길 9-1
- 營業時間： 11:00 - 20:00（Break Time 15:00 - 17:00）、逢星期二休息
唔好睇佢細細間，其實內部好精緻，佢哋主要係賣辣牛肉湯，用咗長時間牛肉去熬煮湯底，加入各種調味料同蔬菜而成。
雖然位唔算好多，但就好有氣氛，好多客人都會安靜咁食完就走，唔會俾任何人打擾到。
用濃郁嘅牛肉湯底整成嘅新牛肉湯拉麵（육라면）₩9,000，配上牛肉同蔬菜做裝飾，相當之豐富！只要一到寒冷冬天或者想宿醉就會令人諗起佢！而且食完之後大家仲可以食埋佢哋提供嘅生果，令人好滿足！
5. Onsuban（온수반）
- 地址：서울 송파구 백제고분로 469
- 營業時間： 11:00 - 22:00（Break Time 15:00 - 17:00、Last Order 21:00）
Onsuban係一間專門賣湯飯嘅韓式料理餐廳，只係睇外觀，已經可以見到佢比其他地方脫穎而出。
因為呢度係開放式廚房，有時廚師仲會問客人需唔需要添飯或者加小菜，相當親切，係令人一試難忘嘅地方。
呢度主打嘅Menu係肥牛牛胸肉湯飯（차돌 양지 온반）₩9,000，佢哋用咗優質嘅肉類同藥材長時間去熬製，味道好濃郁，而且肉好嫩，小菜都好好味！
6. GOD EAT（갓잇）
- 地址：서울 송파구 백제고분로45길 4-14
- 營業時間：11:00 - 21:30（平日Break Time 15:00 -16:30）
喺松理團路有一間超出名要排隊嘅餐廳，叫做GOD EAT，舖頭上面有插住一支墨西哥國旗，好容易就會搵到。
小編係喺佢Break Time一完咗就即刻去，點知已經開始要等位，只要喺機器入面輸入手機號碼，就會收到等待號碼，機器唔單止有韓文，仲有提供中文、英文同日文語言，就算係遊客嚟到都可以輕鬆咁用。
餐廳內部只係得9張枱，小編一入到去就即刻落單，等緊嘅期間仲會見到出面嘅越嚟越多人排隊，可以知道佢有幾咁高人氣！
小編叫嘅係2人Set（Absolute Set），一上枱份量相當之驚人，除咗可以自製墨西哥卷，仲有炸薯條同炸雞翼，另外仲有一個God bowl（類似拌飯）。喺韓國可以食到咁多菜真係好難得，而且食嘅時候會覺得好健康，佢哋用嘅材料好新鮮，真係食到人會舔舔脷！
7. Qua（꾸아）
- 地址：서울 송파구 백제고분로45길 22-1 2F
- 營業時間：11:30 - 21:00（Break Time 15:00 - 16:30、Last Order 20:00）
喺松理團路有唔少異國料理，當中小編仲想同大家介紹呢一間越南餐廳。
餐廳內部用咗薄荷色去裝修，感覺好時尚，另外仲會見到唔少越南嘅招牌，令人好似短暫去咗越南咁。
小編叫咗佢哋嘅巨無霸排骨河粉（왕갈비쌀국수），一上枱真係忍唔住令人「嘩」一聲！啲肉超嫩，配上濃郁湯底，真係好難令人唔鍾意！加埋佢哋嘅大蔥一齊食，更加香更加好味！
樂天世界/樂天世界購物中心（롯데월드/롯데월드몰）
樂天世界可以話係韓國旅行必去景點之一，好多朋友們都會喺度留全日！以下呢幾間餐廳位於樂天世界附近，大家玩完之後可以去食返餐好西！
1. 同花古屋（동화고옥）
- 地址：서울 송파구 올림픽로 300 롯데월드몰 6F
- 營業時間：11:30 - 22:00（Break Time 15:00 - 17:00、Last Order 21:00）
「同花古屋」係一間韓國傳統宮廷料理專門店，位於蠶室樂天世界商場，蠶室站直接有一條隧道可以穿到過嚟，而且大家仲可以行街前/後嚟食嘢，夠曬方便！餐廳裝修高級，亦都有保留韓國傳統元素，而且仲有幾間可以望到石村湖水嘅房！
呢度通常都係叫set menu，每道菜都係用新鮮食材炮製而成，而且非常有韓國傳統特色，如果想喺景色超靚嘅餐廳食返餐傳統韓國菜，或者想食高質韓牛，推薦大家嚟「同花古屋」！
2. NATURAL SOUL KITCHEN（내추럴소울키친）
- 地址：서울 송파구 올림픽로 300 롯데월드몰 6F
- 營業時間：10:30 - 22:00
如果你會成日時間喺樂天世界或者購物中心入面，當肚餓嘅時候，可以去樂天世界購物中心嘅6樓Natural Soul Kitchen food court食飯。
因為呢度係food court，會有唔同嘅美食，大家只要喺櫃檯落完單，之後再去拎位坐低慢慢食就可以。
咁多間餐廳入面，小編喺濟州涯月炸豬扒（제주애월카츠）度叫咗紅豬里脊肉&迷你烏冬套餐，同柴魚烏冬套餐。如果坐喺窗邊位仲可以望到石村湖嘅景色，真係好寫意。
芳荑洞美食街（방이동 먹자골목）
- 地址： 서울 송파구 방이동 95-4
芳荑洞美食街係一個比松理團路更旺嘅街，呢度有好多燒肉店同酒吧，如果想體驗韓國獨有嘅聚餐文化，嚟呢度一定超有氣氛！
1. 肉花食堂（육화식당）
- 地址：서울 송파구 올림픽로32길 29
- 營業時間：平日 16:00 - 00:30、週末 12:00 - 22:30
喺芳荑洞美食街咁多間燒肉入面，小編最推薦大家去肉花食堂，佢哋提供嘅食物都好高質，而且職員服務態度都好好！
比起一般嘅燒肉餐廳，呢度好乾淨，喺2樓大約可以坐到60人，係一間好適合團體去聚餐。
呢度嘅職員會幫大家燒肉，大家只要坐低慢慢等食就可以，豬肉價錢一人份（180g）價錢係₩13,000 ~ ₩15,000，而且小菜好豐富，令人食完會好滿足！
蠶室其他推薦餐廳
1. ISAAC TOAST（이삭토스트）
- 地址：서울특별시 송파구 올림픽로 130
- 營業時間：星期一至五 08:00 - 22:00、星期六及日 09:00 - 21:00
相信唔需要小編介紹，大家都知道ISAAC TOAST有幾出名！除咗口味夠多，最令人回味無窮嘅係佢哋獨家研發嘅醬汁，淨係得呢度先食到！
「ISAAC TOAST蠶室新川店」距離蠶室新川站只需要一分鐘路程，鋪頭雖然唔大，不過好乾淨。呢度附近亦都有好多觀光景點，大家可以食完之後即刻去玩~
呢幾款就係小編叫嘅吐司同飲品，包括有「Pizza多士三文治」、「邪惡芝士煙肉薯餅多士三文治」「愛文芒果果汁」同「士多啤梨果汁」，全部都係老闆推薦嘅Menu，聽講全部都係遊客鍾意食嘅口味！
蠶室可以食到嘅嘢真係好多，之後有時間，不妨都去搵一間試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
