蠶室美食 | 同花古屋（蠶室店）
韓國傳統宮廷美食到底係點嘅？一次過食到高質韓牛+傳統韓式美食！
- 「同花古屋（蠶室店）」資訊
- 「同花古屋（蠶室店）」推薦原因
- 「同花古屋（蠶室店）」價錢
- 「同花古屋（蠶室店）」退款政策
- 「同花古屋（蠶室店）」注意事項
- 「同花古屋（蠶室店）」預約流程
- 「同花古屋（蠶室店）」介紹
- 「同花古屋（蠶室店）」前往方法
Hello，大家好，我哋係由韓國人每日提供最新韓國旅行資訊嘅Creatrip。
成日睇韓劇見到以前啲皇帝食嘅嘢都好好奇係咩味，小編最近搵到一間用現代方式傳承韓國傳統宮廷美食嘅餐廳「同花古屋」，跟住小編一齊去睇吓啦！
「同花古屋（蠶室店）」資訊
- 地址：서울 송파구 올림픽로 300 롯데월드몰 6F
- 營業時間：10:30 - 22:00（Break Time 15:00 - 17:00、Last Order 21:00）
- 可預約時間：10:30 / 11:00 / 11:30 / 12:00 / 12:30 / 13:00 / 17:00 / 17:30 / 18:00 / 18:30 / 19:00 / 19:30 / 20:00
- 語言：韓文、簡單英文
「同花古屋（蠶室店）」推薦原因
- 以現代方式詮釋韓國宮廷飲食，傳承韓國傳統飲食文化！
- 餐廳位於建築高層，推薦大家黃昏時段去，可以睇到超靚夕陽！
- 可以按照個人喜好揀鍾意嘅套餐！
- 位於蠶室站附近，交通方便！
「同花古屋（蠶室店）」價錢
| 選項 | 價錢 | 包括 | |
| Lunch | Course A | ₩66,500/人 | 葫蘆南瓜粥、木石草花（4款一口料理）、宮廷刺身、彦陽式韓牛烤肉、當造湯品、同花骨董麵、飯後茶點 |
| Course B | ₩76,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、彦陽式韓牛烤肉、當造湯品、同花骨董麵、飯後茶點 | |
| Course C | ₩96,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、饗宴調味排骨、當造湯品、同花骨董麵、飯後茶點 | |
| Dinner | Course A | ₩96,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、饗宴調味排骨、當造湯品、同花骨董麵、玉雪花、飯後茶點 |
| Course B | ₩126,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、陶甕海鮮嫩豆腐、饗宴調味排骨、當造湯品、同花骨董麵、玉雪花、飯後茶點 | |
| Course C | ₩136,500/人 | 葫蘆南瓜粥、木石草花（4款一口料理）、宮廷刺身、牛𦟌煎餅、飯焦雞脾燉湯、陶甕海鮮嫩豆腐、饗宴調味排骨、當造定食、同花骨董麵、玉雪花、飯後茶點 |
※部份餐點會隨季節而有所變動。
※全部Menu最少要叫2人份。
※食飯時間最少需要2小時。
「同花古屋（蠶室店）」退款政策
| 預約後至到訪4日前取消 | 全額退款 |
| 到訪3日前取消 | 不設退款 |
「同花古屋（蠶室店）」注意事項
- 請最少喺3日前完成預約。
- 請務必準時到達。
- 遲到超過10分鐘預約會自動取消。
- 如希望加購其他餐點，請喺現場支付所需金額。
- Last Order時間係用餐時段結束前1小時。
- 預約時請確保已選擇正確日期及時間。
- 如果想更改預約，或者有任何問題，請send email到help@creatrip.com查詢。
「同花古屋（蠶室店）」預約流程
| STEP 1. | |
| STEP 2. | 請填寫所有相關資訊，我哋會喺1-2個工作天內確認預約。 |
| STEP 3. | 體驗當日請準時到達，向職員出示預約記錄。 |
| STEP 4. | Enjoy！ |
「同花古屋（蠶室店）」介紹
「同花古屋」係一間韓國傳統宮廷料理專門店，今日小編帶大家嚟到位於蠶室樂天世界商場嘅蠶室店！蠶室站直接有一條隧道可以穿到過嚟，而且大家仲可以行街前/後嚟食嘢，夠曬方便！
餐廳裝修高級，亦都有保留韓國傳統元素，而且仲有幾間可以望到石村湖水嘅房！如果想喺特別日子去氣氛好嘅餐廳慶祝，「同花古屋」蠶室店係一個唔錯嘅選擇！
小編當日雖然係午餐時間去，不過職員話除咗Lunch Set仲可以叫埋Dinner Course B！所以小編同朋友就叫咗Dinner Course B同兩杯梳打，另外再加多咗份生牛肉。一齊睇吓成個Set有咩食啦！
第一個前菜係凍嘅松子粥，入面居然有覆盆子，食落有少少酸味，幾開胃。
之後就係4款一口前菜「木石草花」，一上菜小編都忍唔住感嘆咗一聲，因為擺盤真係好靚！職員推薦大家跟住蕎麥煎餅、魟魚（魔鬼魚）三合、黑松露排骨三文治同鱈魚撻呢個順序食。
小編個人認為黑松露排骨三文治同鱈魚撻最好食！
跟住下一道菜係「宮廷刺身」同「牛𦟌煎餅」。「宮廷刺身」係真鯛刺身配醬油同各種配菜，刺身夠新鮮，醬汁甜甜地好開胃！而「牛𦟌煎餅」亦都完全唔韌，配埋新鮮泡菜食真係一流！職員亦都會推薦大家可以將煎餅點頭先食完刺身之後淨低嘅醬油，會更加惹味！
呢個「陶甕海鮮嫩豆腐」係其中一個令小編印象幾深刻嘅菜式，一開頭以為只係放落甕入面嘅海鮮嫩豆腐湯，點知原來係好似酥皮湯咁上面有一層用薯仔整嘅脆皮！食嘅時候好似飲酥皮湯咁用匙羹將脆皮整爛，連埋湯一齊食就得~ 嫩豆腐湯入面有帶子、蝦、青口、豆腐等超多食材，加埋辣椒香味真係好香好正！（如果有白飯就好啦...XD）
主菜終於登場啦！主菜包括有饗宴調味排骨、同花骨董麵、當造湯品同白飯，同時仲會上埋各種小菜。
排骨肉會先燒到三成熟，然後用熱石板上，等大家可以燒到自己鍾意嘅生熟程度再食！同平時食開嘅調味排骨肉唔同，呢款肉就好似牛扒咁juicy同啖啖肉！怕漏嘅話推薦大家可以配埋泡菜或者沙律食~
呢碗同花骨董麵同排骨肉都好夾！
小編去嘅時候嘅是日當造湯品係雞肉湯，湯底夠清，肉都好滑，撈飯食一流！
另外呢份單點嘅生牛肉本身有調味，加埋清脆嘅梨絲食夠曬清新！
食完正餐點少得甜品呢！「玉雪花」其實係雪葩 + 橙，可以幫大家清一清個口；而飯後茶點就有糖漬合桃同五味子茶，非常有韓國傳統特色，為今餐畫上一個完美句號！
如果想喺景色超靚嘅餐廳食返餐傳統韓國菜，或者想食高質韓牛，推薦大家嚟「同花古屋」！
「同花古屋（蠶室店）」前往方法
喺蠶室站（잠실역）落車。
向10號出口方向行。
搭扶手電梯上去。
行入樂天世界商場。
直行，然後搭扶手電梯上6樓。
見到上圖呢間餐廳之後向左邊行。
行一陣之後轉右，見到右邊嗰箭嘴之後再轉右。
一直行就會去到「同花古屋（蠶室店）」！
以上係蠶室「同花古屋（蠶室店）」嘅介紹，有任何問題請先詳讀呢篇文章。
如果睇完之後有任何問題，或者我哋語意、標示唔清嘅話，麻煩請send email告知，以方便我哋改進 。
如果有更多想知嘅內容，都可以隨時留言或者dm話俾我哋知：）
Instagram：creatrip.hk