7件喺韓國生活方便嘅事
7件韓國生活方便嘅事，用電話就可以增值T-Money? 朝早上網買嘅嘢下晝就收到？
#韓國生活 #科技
#便利 #韓國評論
唔知大家有無諗過要嚟韓國住？無論係working holiday定係來升學就業，都可以體驗到喺韓國生活。
小編都已經喺韓國住咗好幾年，唔多唔少都感受到一啲韓國生活嘅優點同缺點，優點好明顯就係佢哋嘅方便同速度！
今日就想同大家詳細分享下七樣喺韓國生活嘅優點。
✨馬上Follow我哋IG
instagram.com/creatrip.hk
7件韓國生活方便嘅事
1. 只需要一張交通卡就可以搭曬所有韓國嘅公共交通工具
相信大家都有聽過T-money，其實即係韓國嘅八達通。
只要嚟過韓國旅行肯定都有買T-money，因為只需要呢一張卡就可以搭曬所有巴士或者地鐵，就算唔係去首爾，喺韓國其它城市都可以用到，完全唔需要擔心要買好多張唔同嘅交通卡！
增值T-money嘅方法都好簡單，去任何地鐵站都會見到增值機；又或者可以選擇喺便利店增值，只要將卡同錢交比員工再同佢哋講想增值幾錢就得㗎啦。
而家仲可以透過手機就睇到自己張T-money有幾多餘額，而且仲可以增值，真係超級方便！
2. 朝早落單，下晝到貨
據小編嘅了解，韓國係世界上其中一個快遞配送速度最快嘅國家。
尤其係喺「Coupang」上面買嘢，Coupang提供嘅快速送貨服務叫做「Rocket Wow」。
只需要每個月比₩2,900就可以享受呢個簡直係好似火箭咁快嘅配送速度。
例如你喺朝早9點前落單買嘢，就可以喺即日收到！非常適合緊急需要某啲必需品嘅人。
雖然其它網頁嘅配送速度未至於會「WOW」，但係同EMS嘅速度都唔會差太遠。
再加上好多網站只要你買夠某一個金額就會免費送貨，就算你張單唔夠免費送貨嘅要求，都只係需要畀大約₩2,500 - ₩3,500，當然如果你住得遠，例如住喺濟州島，配送費就會貴少少。
小編住咗喺韓國咁耐，都仲係會感嘆佢哋嘅送貨速度！
3. 廁所乾淨，廁紙充足
有無人同小編一樣都係唔鍾意用出面嘅公廁？
不過自從喺韓國生活之後，小編都唔介意用韓國嘅公廁啦。
無論喺地鐵站定餐廳、咖啡廳甚至公園，韓國嘅公廁相對上都係好乾淨。
雖然間唔中都有遇過污糟嘅廁所，不過喺首爾同埋大城市就比較少。
小編驚去公廁嘅最大原因就係陣臭味，韓國嘅公廁好多都唔會有嗰種惡頂嘅味道，可能因為商鋪都好重視廁所嘅通風。
再加上就算係公廁，廁紙同洗手液嘅供應都相當充足，仲會有乾手機。
所以大家喺韓國人有三急趕唔切返酒店或者民宿嘅時候，唔需要擔心公廁污糟可以放心去解放～
4. 周圍都有便利店
韓國有好多唔同品牌嘅便利店，例如CU、GS25、7-Eleven、E-Mart同Ministop，未包括韓國本地嘅小型超市。
所以喺韓國有個講法就係，如果你唔小心跌低，抬起頭多數都係見到便利店。
呢啲便利店同香港一樣多數係開24小時，大家喺韓國夜晚肚餓或者有咩唔記得帶嘅時候，可以落街去附近嘅便利店醫肚順便買番啲日用品。
5. 四通八達嘅交通工具
Seoul Metropolitan Government小編真係忍唔住為韓國嘅公共交通工具鼓掌，因為實在係太方便！
唔單止班次又多又密集，仲可以喺手機程式上面檢查下一班次嘅到達時間，最緊要就係佢嘅到達時間係好準確。
尤其是喺首爾！ 喺其它城市就可能會少啲班次無咁密集，不過小編就覺得可接受，所以整體來講都係好方便～
講到巴士同地鐵，呢啲交通工具仲會有殘疾人士專用區域。
首爾地鐵入面嘅殘疾人士專用區域範圍充足仲會有扶手，使用輪椅嘅人士都唔洗擔心無位置。
因為輪椅人士可以停靠喺專用嘅角落，如果輪椅上面有繩嘅話更加可以扣上扶手，避免因為地鐵突然運行或者停駛嘅時候輪椅滑行造成危險。
除咗地鐵有方便輪椅人士嘅設施，巴士都有殘疾人士專用嘅扶手同埋輪椅座位。
因為老人家或者殘疾人士嘅輪椅通常都可以折起，所以佢哋搭巴士嘅時候就可以坐喺專用嘅座位，將輪椅擺埋一邊。
當有殘疾人士需要上落車，巴士司機都會去車門打開輪椅人士用嘅折板，幫佢哋推架輪椅上或者落車。
亦可以將輪椅嘅安全帶固定喺扶手上面，避免巴士行駛嘅時候發生意外。
唔止方便殘疾人士嘅設施，呢啲公共交通工具都有畀單車使用嘅位置。
例如地鐵嘅車頭同車尾都有單車可以停靠嘅位置，尤其是係來往兩個城市嘅地鐵。
有一次小編去平昌嘅時候發現車尾有好多單獨嘅座位，側邊仲有單車鎖，嗰陣小編先知原來韓國有唔少單車愛好者，而且仲有呢啲設施方便踩單車嘅大眾。
Seoul Metropolitan Government喺香港，等巴士真係一件相當痛苦嘅事，夏天就等到出曬汗、冬天又凍到震、落雨又遮唔到幾多。
不過喺韓國有一種新嘅巴士站就令等巴士成為一種享受。
呢款巴士站除咗有一般巴士站嘅設施，即係車站標誌、排隊線同到站時間之外，仲會有螢幕提醒呢架巴士嘅密度會唔會好多人定好空？
坐喺呢個巴士站入面都好舒服，除咗有冷氣仲有得充電，真係分分鐘會等到唔捨得走...
7. 公共空間
Visit Seoul喺韓國，就算係城市，你都可以輕易搵到地方畀你散下步、放鬆甚至可以做運動。
小編好鍾意喺漢江附近嘅公園食炸雞飲啤酒，唔少韓國本地人都會喺到野餐，真係好有氣氛！
而且就算係首爾都有唔少綠化嘅區域，唔需要去到好遠就可以喺市區內行山，小編識啲朋友朝早起身行山下晝仲可以去上堂。
唔單止有好多綠化區域，呢啲公共空間都係十分之安全。
沿住漢江嘅單車徑全程都有照明燈，好多人都鍾意清晨或者深夜喺漢江踩單車甚至跑步，唔洗驚會孤單或者比人打劫，因為好多市民會陪住你！
以上就介紹左七樣喺韓國生活覺得方便嘅地方，大家睇完想唔想舉起個大拇指畀韓國？
係咪想香港都可以喺生活上變得更便利呢？
今日嘅分享就到呢到，我地下次見啦～
✨馬上Follow我哋IG
instagram.com/creatrip.hk
| 其他延伸閱讀 | |
 韓國生活煩惱 |  韓國self-service |
