喺韓國生活令人覺得煩嘅6件事
喺韓國生活令人覺得麻煩嘅事，真係不禁嘆一口氣韓國幾時先會唔咁固執？
Hello，大家好，我哋係由韓國人每日提供最新韓國旅行資訊嘅Creatrip。
喺第一次嚟韓國嘅時候，小編真係遇過唔少驚訝嘅地方，不過大部分小編都好鍾意嘅，係有少部分時候會忍唔住想大叫「咩事啊？」，因為韓國有啲地方真係相當之「阻住地球轉」！所以決定要記錄低呢啲親身經歷，大家嚟韓國之前就可以有心理準備，唔會好似小編當年咁被嚇親。
喺韓國生活令人覺得煩嘅6件事
1. 喺韓國用唔到Google Maps！要用KaKao Map或者Naver Map。
無論喺香港定其他國家，Google Maps係一個非常準確嘅導航應用程式，不過喺韓國就完全相反。當小編第一次嚟韓國嘅時候，嗰陣都仲唔知原來Google Map係無用，可以同大家講成個旅程簡真係超級混亂，如果想用呢啲手機導航軟件，大家記得要預先Down KaKao Map或者Naver Map，不過首要條件就係最好要識少少韓文，雖然Naver Map有英文同簡體中文，不過用韓文先會最準確。
2. 唔用MS Word，用Hancom。
小編真係完全理解唔到，可能因為自細已經習慣咗用MS Word，嚟咗韓國讀書同做嘢之後先發現，韓國人係好少會用MS Word，反而常用Hancom（都係類似Word嘅文件）。第一次用H嘅時候，因為同MS嘅程式唔同而且仲要得韓文，真係好手忙腳亂，再加上呢款程式實在係太罕有，尤其喺MacBook，如果大家想買呢款軟件，仲要畀50,000won，即係差唔多350港幣，好心痛啊！
3. 比起Chrome、Firefox、Safari，更加鍾意用IE。
小編都完全想像唔到，乜原來而家呢個年代仲有人用IE？喺香港大家最常用嘅瀏覽器一定係Chrome、Firefox或者Safari，不過喺韓國佢哋反而仲用緊IE！所以小編喺韓國讀大學嘅時候真係覺得佢哋呢樣嘢好麻煩，韓國嘅學校有自己嘅內部軟件管理學生嘅資料，例如睇成績等等，不過淨係可以透過IE睇。如果大家好似小編咁係MacBook用家嘅話，分分鐘要向其他人借電腦先可以上到學校嘅內部網站。
唔單止係大學，連政府機構（保險、出糧、税款），包括網上銀行，都淨係可以用IE瀏覽，可能係因為韓國嘅保安系統淨係適用於IE。
4. Mac OS都需要依賴Windows。
喺韓國用MacBook嘅最大問題係down唔到IE，所以Mac OS系統就好似俾人遺棄咗咁，加上網上銀行或者信用卡嘅身份驗證程序上都被限制，導致韓國嘅MacBook用家要Down Windows先可以順利處理，喺韓國，MacBook嘅其中一項賣點就係「可以免費Down Windows」...真係幾荒謬。
5. 網上購物嘅時候需要實名認證
喺韓國生活嘅時候，緊係要申請返啲網購網頁嘅會員先啦！不過喺韓國要開帳號，就一定要用你個名登記嘅韓國電話號碼做認證，不過喺香港大家都比較常用email進行驗證。
6. 韓國嘅網購網頁只可以用韓國信用卡俾錢。
呢一點對於鍾意網購嘅小編嚟講都係超級唔方便！因為有部分網站正係接受喺韓國發行嘅信用卡做付款方式，如果張卡係喺香港或者其它地方發行，就算係Visa、Master都會用唔到，真係無諗過連俾錢都咁難啊！
呢啲就係小編覺得韓國非常之麻煩、又阻住地球轉嘅原因，不過其實小編都理解佢哋係為咗網路安全理由，所以先會有呢啲措施嘅。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
