返香港會唔習慣嘅事
喺韓國生活耐咗返香港會唔習慣嘅8件事，有時會不知覺地講咗韓文自己都唔知？
Hello，大家好，我哋係由韓國人話你知每日最新韓國資訊嘅Creatrip。
喺韓國生活耐咗，可能都會不知不覺跟住韓國人做咗同一個習慣。小編喺韓國生活咗6年，發覺每次返香港有時都會唔慣以下8件事。唔知有喺韓國生活過嘅大家，又有冇同感呢？
1. 上車啪卡、落車都以為仲要啪卡
小編喺韓國生活咗6年，喺韓國搭巴士，上車啪卡落車都要啪卡已經成為一個習慣。有幾次小編返香港搭巴士，明明已經係拎住八達通上車嘟完。點知就落車嘅時候，再拎卡出嚟先發覺唔洗再嘟卡，有時諗返起都覺得好笑。
2. 搭𨋢嗰陣冇得撳取消
韓國嘅1樓即係等於香港嘅G樓。小編有次同朋友一齊搭𨋢，明明講好去地下。點知小編手快一下就撳咗1樓，朋友即刻話：「唔係去地下咩？做咩撳咗1樓？」當下小編諗住取消再撳G嘅時候，先記得冇得改。
有時小編同朋友一齊食飯，因為朋友唔鍾意食芫荽，想拎走佢。小編就話：「可以啊，빼（音讀：啤）走佢都得啊！」朋友即刻問： 「빼（啤）咩啊？」 小編當下先醒覺 빼係韓文，難怪朋友會聽唔明。
4. 宵夜肚餓嗰陣，嗌外賣有時會覺得唔太方便
喺韓國嗌外賣選擇多，用個apps撳兩撳，唔洗等好耐外賣就會好快送到。雖然而家香港都有foodpanda好方便，不過有時會覺得選擇太少。
5. 有時會用唔慣現金
喺韓國，一張卡就可以走天下，冇現金完全係冇問題。不過喺香港，有好多時都係用現金會比較方便啲，所以返到香港有時會唔太習慣。
6. 網購要等好耐
韓國人好多事都會要求快！上網速度要快、網購速度要快、做嘢都要快。好似上網買嘢，如果今日晏就落單，有時快到喺聽朝凌晨7點前就會收到。送貨速度完全係唔講得笑，所以有時喺香港落單買嘢，都會諗...到底幾時先會收到件貨呢？
7. 會習慣咗韓國嘅天氣
相信大家都知，韓國四季分明，每一季都會有唔用活動可以體驗，就好似春天賞櫻花、秋天賞紅葉咁。如果係冬天返到香港，見到街上好多人都會著羽絨嘅時候，小編可能會覺得只著一件衛衣就夠暖，感覺會有啲唔同。
8. 喺韓國成日會想食香港嘢，番到香港會掛住韓國食物
如果只係短暫番香港，小編絕對唔會掛住韓國食物。不過以前仲係大學生返香港過暑假，只要留超過兩個月，有時就會諗起韓國嘅味道。
以上8件事係小編有時番到香港會唔習慣嘅事，唔知有冇喺韓國生活過嘅大家都有同類事件呢？歡迎留言話畀小編聽！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
