韓國人抗拒嘅香港美食
估佢唔到！90%香港人會鍾意食，但有99.9%韓國人都唔鍾意嘅香港美食？
Hello，大家好，我哋係由韓國人話你知每日最新韓國資訊嘅Creatrip。
#香港 #香港美食
#韓國 #韓國人
#明明就好好食，點解會唔鍾意..
香港有美食「天堂之稱」係人都知。
大家又知唔知有啲食物，有90%香港人會鍾意，但有99%韓國人係唔鍾意嘅呢？
大家又會唔會好奇想知有啲咩？想知就要繼續睇落去啦！
✨馬上Follow我哋IG
instagram.com/creatrip.hk
韓國人會抗拒嘅香港美食
1. 麥精
相信只要係香港人都一定會飲過麥精，小編記得以前細細個，返學之前都一定要飲包迷你麥精 。
雖然唔太識形容佢隻味，但就覺得好特別。
以前有分享過畀韓國朋友飲，佢哋覺得味道有啲怪，唔太鍾意。
相反，檸檬茶或者維他奶佢哋又會覺得幾好飲，唔知大家又鍾唔鍾意飲麥精呢？
2. 莞茜
莞茜可能唔係人人都接受得到，但有時煲湯或者炒餸，唔加又會好似少咗啲味。
所以好多時就算加咗，可能都未必食。
小編曾經聽過，韓國人去香港必學嘅其中一句，一定係「不要香菜」。
因為佢哋覺得好臭，就好似好多人都唔鍾意食韓國嘅紫蘇葉咁。
3. 臭豆腐
有啲人會覺得臭豆腐好香，有啲人可能會覺得好臭。
大家又知唔知，基本上有98%韓國人都唔鍾意食臭豆腐嘅呢？
佢哋會覺得，豆腐咁香咁好食，點解要拎去炸同令佢變臭？
小編每次去親食街邊小食，都一定會點臭豆腐，外脆內軟加少少甜醬，加多串豬大腸，完全係超完美！(而家打到都流哂口水....)
4. 碗仔翅
碗仔翅加醋，呢個組合完全係冇得輸。
小編真係可以食好多碗，但唔知韓國人係唔係覺得因為太杰撻撻，（韓國好似冇呢類）所以有啲抗拒。
5. 皮蛋
相信好多香港人都鍾意食皮蛋瘦肉粥，小編由細到大都最鍾意食佢。
記得有一次同韓國朋友一齊食，佢哋會覺得蛋點解可以係黑色，而且味道好怪。
6. 田雞
唔單止係韓國人，其實好多外國人都唔太接受得到。
田雞雖然外觀不討好，但唔少人都鍾意食。
尤其係田雞煲仔飯真係好香，而且每舊雞都好滑。
7. 龜苓膏
香港人會鍾意食龜苓膏係因為覺得可以清熱氣。
第一次食可能會覺得有少少苦。（正所謂苦口良藥嘛～）
但韓國人覺得就算加咗糖水，都係好苦。
加上韓國唔多解熱氣食品或飲品，所以喺佢哋角度嚟睇，的確可能會覺得怪。
唔知以上7款香港特色美食，大家又鍾唔鍾意食呢？
相反，有冇啲係大家嚟韓國，明明韓國人極推，但大家又覺得唔好食嘅呢？
歡迎大家留言話畀我哋知。
✨馬上Follow我哋IG
instagram.com/creatrip.hk
其他延伸閱讀 | |
 香港正宗韓國菜 |  韓星香港拍攝地 |
