韓國N號房事件總整理
韓國Telegram N號房性犯罪事件爆發，每20個男人就有1個涉嫌犯罪？
- N號房犯罪經過及手法
- 博士房又係咩？
- 得呢兩個人係加害者？
- 主犯最終落網
Hello，大家好，我哋係由韓國人每日提供最新韓國旅行資訊嘅Creatrip。
韓國「N號房事件」引起全程熱議，因為涉及性犯罪，而且一部份受害人尚未成年，更加有消息指出韓國20-39歲男性當中每20個就有一個有份參與呢件事。究竟成件事嘅發生經過係點？最後主腦又有冇落網？
N號房事件
N號房犯罪經過及手法
저널리즘 토크쇼 J
2018年下半年，Telegram上開始出現一啲叫做「1號房」、「2號房」嘅群組，呢啲群組由一個叫「갓갓（godgod）」嘅人做主導者。
godgod會先喺twitter PM 一啲邊緣青少年，內容大概係：「你啲相好似出現咗喺鹹片入面」，然後再俾條link佢哋，呃佢哋撳入條去，盜取呢班人嘅個人資料。之後就會同佢哋講，如果唔想個人資料公諸於世，就要拍一啲不雅影片send俾佢，更加有女性被威脅做一啲唔合常理嘅事，例如進食排洩物等等。
呢啲性剝削影片會先以預告片嘅形式放喺「1號房」，吸引想睇更多、更完整影片嘅人俾錢進入「2號房」。根據金額同影片內容，由「1號房」一直擴張至「8號房」，所以呢件事就被稱為「N號房」。
一旦影片上傳，就會複製去其他聊天室入面，所以即使「1號房」被刪除，受害人嘅影片仍然會不斷流傳開去。不過喺2019年9月，godgod突然消失咗，據聞佢將「N號房」交咗俾一個叫「watchman」嘅人，繼續營運。
博士房又係咩？
博士房係一個模仿N號房犯罪模式嘅聊天室，由一個叫「博士」嘅人開設，佢以經濟能力比較低嘅女性做目標，標榜會提供工作機會俾佢哋，人工高達200~800萬韓幣（約2000000 ~ 8000000）。
之後博士就會威脅佢哋拍性剝削影片，如果想睇到呢啲片，就要用bitcoin嘅形式交易（因為唔會留低任何交易痕跡）。而博士房就以價錢為分類方法，分為「25萬韓幣」、「60萬韓幣」同「150萬韓幣」等等嘅聊天室，分別可以睇到唔同影片。
一旦有受害女性反抗，博士就會威脅佢哋話會將佢哋嘅影片send佢哋朋友同鄰居等等。最恐怖嘅係有時受害人並唔知自己係受害人，因為群組入面嘅人需要寫一啲悔辱留言，或者上傳類似嘅影片，先唔會被人踢出群組。所以佢哋會upload自己女朋友、前女友、屋企人等女性嘅相，換取繼續留喺群組嘅資格。
得呢兩個人係加害者？
저널리즘 토크쇼 J
雖然呢啲群組一開始係由「godgod」同「博士」開始，但問題涉及嘅唔單單係佢哋兩個。根據推測，有起碼26萬人有加入過呢啲群組，即係話至少有26萬人，有份參與呢件性罪案。不過亦都有人話係重覆計算，實際人數可能冇咁多，而且因為Telegram會加密，所以好難準確計算到相關涉案人數。
EXO伯賢Instagram
事件經報導後，引起全民共憤，更加發起多個青瓦臺聯署，要求懲罰所有有份參與嘅加害者同公開加害者嘅資料等，目前已經有幾百萬人聯署支持，連部份韓國明星都有參與。
主犯最終落網
2020年2月，警方首先公開咗「博士」嘅身份同相。「博士」叫조주빈（趙主彬），係一個25歲就讀資訊及通訊科技學系嘅大學生，最後被判處有期徒刑40年，同時需要強制配戴電子追蹤裝置30年、上繳1億600幾萬韓幣罰款、10年內禁止喺兒童、青少年、殘疾人等相關機構就業、沒收非法獲取嘅bitcoin同進行150小時性暴力治療等等。
而3個月之後，喺2020年5月，N號房主犯「godgod」亦都終於落網，佢真名叫문형욱（文亨旭），係一個1995年生，住喺京畿道安山嘅大學生。當時好多人都非常震驚，冇諗過原來係一個咁後生嘅人喺幕後操控住呢個事件。佢最後被判有期徒刑34年、喺兒童、青少年、殘疾人等相關機構就業，亦都需要佩戴30年電子定位裝置同進行160小時性暴力治療。
N號房事件令人震驚，不過當時有人竟然仲覺得自己只係俾錢睇色情影片，並唔係咩大事，更話係「女權」發作。但其實呢件事涉及強迫性犯罪，並唔係想像中咁簡單。雖然最後主犯同共犯全部都被判處一定刑罰，不過對受害者嚟講，相信會係成世人嘅陰影。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
