港韓選舉比較
韓國國會選舉在即！港韓選舉有咩唔同？唔喺韓國都可以投票？
哈囉，大家好，我哋喺由韓國人話你知每日最新韓國資訊嘅Creatrip。
＃韓國選舉＃韓國文化
＃港韓比較
2020年4月15日係韓國國會選舉嘅日子。
韓國嘅投票日都會係法定假日，方便市民可以唔洗番工、番學去投票。
韓國國會選舉同香港立法會選舉又有冇咩似或者唔同嘅地方呢？
就等小編同大家講一講啦！
✨馬上Follow我哋IG
instagram.com/creatrip.hk
選舉方法
韓國嘅國會選舉同香港嘅立法會選舉一樣都係4年一次。
2020年嘅國會議員選舉會揀出韓國第21屆國會議員。
只要喺係2002年4月16日或之前出世，滿18歲嘅韓國國民就可以喺呢一日投票。
韓國國會一共有300席，行單一選區兩票制。當中253席係區域議席（投議員），47席係比例代表（投政黨）。
根據2019年通過嘅選舉制度改革法案，47席比例代表席位入面，30席會通過聯立制投出、17席會通過並立制投出。
聯立制同並立制嘅概念相對複雜。並立制係按政黨實則得票比例分席位。
聯立制就要睇埋地方選區拎到幾多席位：如果一個政黨地方選區嘅席位比例大過政黨票數比例，呢個政黨就唔會再有比例代表席位。
韓國目前嘅執政黨，係文在寅總統所在嘅共同民主黨。評論認為，今次國會議會選舉嘅結果會反映市民對文在寅政府表現嘅滿意程度。
維基百科用戶-Wpcpey
香港立法會選舉嘅方法大家應該比較熟悉，小編喺呢度就唔再詳述。
香港同韓國一樣嘅係，每人兩票。
不過，香港唔係投政黨，而係投功能界別。
本身功能界別只係畀某一部份符合資格嘅人投票。
直到2012年改革，新設區議會（第二）功能界別（俗稱「超級區議會」），以香港單一選區嘅方式，投出5個立法會議員，先至令每個選民都有兩票。
不過，功能界別仍然備受爭議。
選舉宣傳
咁喺韓國國會議員選舉前，各大政黨同候選人又係點樣宣傳㗎呢？
喺香港，候選人通常都會有街站，派宣傳單張，同市民傾下計、拉下票。
韓國候選人都一樣會出嚟見市民。
不過，規模會比較大。佢哋會有宣傳車，上面有電視播佢哋嘅宣傳片，候選人有時仲會拎起咪宣傳。
小編坐喺屋企都可以清清楚楚聽到佢哋講咩，仲要講足一個鐘。
香港嘅馬路兩邊通常都會掛下候選人嘅banner或者旗去拉票。
韓國都有，不過唔止係banner，仲有掛喺大型建築上面嘅poster，離遠已經睇得好清楚。
每個選區都有好幾個候選人，以小編住緊個區為例，因為比較多10層以下嘅樓宇，所以基本上係比較高少少嘅大樓，就一定有張大型poster。
事前與境外投票
韓國好重視選舉，所以會將選舉日定為法定假期，方便市民投票。
投票當日，Naver Map （韓國人常用嘅地圖APP）就會標出最近嘅投票站，甚至會有通知提你去投票。
香港選舉日當日結如果唔可以喺票站開放時間入面投票，咁就等於放棄投票，更加唔好提喺境外嘅香港人，除非飛一轉香港，如果唔係就冇得投。
韓國政府為咗方便市民，設有境外投票，畀一啲喺國外居住嘅韓國人事先喺當地嘅韓國領事館投票。今次選舉嘅境外投票亦已經喺4月1至6日完成。
Donga.com
另外，韓國更加設有事前投票（4月10至11日舉行），方便喺投票當日唔可以投票嘅市民投票。
今年，文在寅夫婦都有參與國會議員嘅事前投票，10號一早就去咗投票。
2020年9月，香港會有新一屆立法會議員選舉。
希望每一位香港人都可以盡佢哋嘅公民責任同義務，登記做選民，並且投票啦！
咁多位，我哋下次再見！
✨馬上Follow我哋IG
instagram.com/creatrip.hk
其他延伸閱讀 | |
 韓國選舉文化 |  深入韓國文化 |
